1Si pangulo, kunan babayin napilí tan saray ának na, síyay kaaduan ko sa kapetegan—tan ambo ako tamó, bale sara ngámin et nin makatandá sa kapetegan – 2 baná sa kapetegan, iti yan mabiyay sa kuntamo tan iti yalí anggan-angga:

3 Say grasiya, pangaduan tan katinekan a nangibuwat sa Diyos si Ama tan si Hesus Kristo, Anak nan Ama, iti yalí kuntamo sa kapetegan tan sa kaaduan.

4 Nakarigsa ako talaga nin main mapakákit kon sa uumnon ának nin manlumalako sa katepegan, bilang sa naiibilin nan Ama kuntamo. 5 Tan sawanin, babayi kon diri, kai ako nin mansumurat sa kumo a báyon ibilin bale sitin saya ket main ana sin saytaw sa pakataránan. Itepet ako ta umadó atamo sa sayan-sayan kalalamuan. 6 Tan siti yay adó: ta lumalako atamo sa kasunudan nan naibilin na. Bilang sa narngé muyo sin saytaw sa pakataránan, say ibilin na ket lumalako kamo sa adó.

7 Abaw saray makabubulaan, sísary kai marabay nin ipakaitandá si Hesus Kristo a rinmaté ya sa lalaman, ket limuwá sarayna sa babon lutá. Si tawon wanti, síyay makabulan tan síyay laban nan Kristo (antikristo). 8 Bumantayan kamo ta kai muyo nin maipirdi yaytaw nin pinakagaw´enan muyo, bale síkamo kumon a mapnó nin makapagungunaan. 9 Sínuman a lumalayo sa adapan tan kai ya tumuloy sa pangiyakay nan Kristo, kasa yay Diyos kuna; sínuman a tumuloy sa pangiyakay ket isen yay karuwa ran Mitraama. 10 No sinuman a rumaté sa kumo tan kai na naáwit sayti nin pangiyakay, andí ma pasrepen sa bali mo udino andí man ipamaabigen (salabaten). 11 Sínuman a umaabigen kunra ket mangitao sara sa kaduduká nin kagaw´enan na.

12 Abaw a suraten ko kumuyo, balé kai ko rabay nin gamiten yay papil tan tinta. Imbis, mangapos ako nin makabisita ako kumuyo tan umadap tamon makapag´irgo, tano say pakadalanen muyo ket makayadien ya.

13 Saray ának nan busat mon babayi a napilí ket ipáwit ray kamaabigan ra.