1 Sitaw say nangibuwat sin saytaw sa pakataránan, sitaw say nakarngé tamo, sitaw nákit nan mata tamo, sitaw say kinákitan tamo tan naapros nin gamet tamo—siti a maipabaritá kunan say Saritá nin Pakabyayan. 2 Naipakít yay pakabyayan; nakákit tamo tan nakapaptegen tamo kunan siti, tan maipabaritá atamo kumuyo yay pakabyayan nin anggan-angga, itaw ya kunan Ama tan pinaikákit ya kuntamo. 3 Maipabaritá tamo kumuyo say nakákit tan nakarngé atamo, tano maipakamain kumuyo anamaet say pakalalamuan kuntamo. Tan say pakalalamuan atamo ket pinakalamó yay Ama tan si Anak na si Hesus Kristo. Sinurat tamuyti tano maguwá yay ririket mi a pinayadí yayna.

Manlumalako Sa Silaw

5 Siti yay ipabaritaan nin narngé mi a nangibuwat kuna tan ibaritá mi kumuyo: si Diyos síyay Silaw; sa kuna kasa gapo nin dedlem. 6 No ipawantamo nin main a pakailalamuan tamo kuna balé lumalako tamo sa dedlem, mabulá atamo tan kai tamo nin mangikap sa pakapetegan. 7 Balé no lumalako atamo sa silaw, ket síyay isen sa silaw, main nin pakailalamuan tamo kuntamon sayan-saya, tan say dayá na ni Hesus, si Anak na, mailinis atamo sa ngámin nin kasalanan tamo.

8 No ipawantamo nin kasan kasalan tamo, maibulá tamo sa kuntamo tan say pakapetegan ket ambó ya sa kuntamo. 9 No ipabari-baritá saray kukasalanan atamo, síyay mapteg tan matimbang ya tan pakawánen (patawadin) nayay kukasalanan tan ipalinisan na tamo sa ngámin nin ambó pakakustu-kustuan. 10 No ipawantamo nin kai atamo nin nakasalan, ipaguwá tamo a síyay mabulá and say saritá na a kasan kamínan na sa kabibyay tamo.