1 Say ipakákitan na ni Hesus Kristo, sayti a nibi nan Diyos kuna tano maipákit na kunran magserbi nin ani lí nin mangyayadí. Naipatandá na nin binakí nay anghil kunan magserbi si Dyun. 2 Síyay mangibaritá nin saray ngámin nin náki-nákit na ket saraytaw a saritá nan Diyos tan say pakabaritaan nan Hesus Kristo. 3 Mabindisiyunan yay sayan mamasa kunan sitin susaritá a pakamangyayadian, tan mabindisiyuan saraytaw nin umingar tan ipaká sa pusó ra saytaw a nakasuratan baná ta adani ana a taon. Makapaabig kumuyo tan makaparaywen yay Diyos.

4 Dyun, kunran piton sambawan sa prubinsiya nin Asiya: Magrasiya tan matinek kumuyo mangibuwat kuna a síyay sawanin, tan síyay intaw, tan síya et lí ay rumaté, tan saray piton uispirito itaw sa adapan nan pag´adiyan na, 5 tan si Hesus Kristo, síyay mapteg nin nakákitan, síyay núnan naianak sa nati, tan síyay pagnulo ran uadí sa babon lutá.

Kunan síya a mangadó kuntamo tan nangilibri na tamo sa kukasalan tamo kunan dayá na, 6 tan ginuwá natamo nin pag´adiyan tan pupadí a magserbi kunan Diyos tan Ama na—kunan síya paraywen tan say kapanyadian nin anggan-angga! Amen.

7 Kikiten muyuyti, síya a rumaté iti sa rerem tan saray ngámin nin mumata, mákit rayalí, saraytaw et a nanaksak kuna, tan saray ngámin nin tutawo sa babon lutá a makaluluwá saralí baná kuna. Mangyadí yatilí. Amen

8 “Síko ay Pakanúnaan tan Pakasuyutan.” Wanan Katawan nin Diyos, síkoy sawanin, tan síkoy intaw tan síko et lí ay rumaté, si Kapangyadian. Sayan barámo si Anak nan Tawo.

9 Síko, si Dyun, busat muyo tan kalalamó muyo sa ampadiyá-diyan tan say pag´adiyan tan say umanusan sa mananágan, sarayti a kuntamo a ngibuwat kuni Hesus, ket iti ako sa puro nin Patmos baná sa saritá nan Diyos tan sa pakabaritaan nan Hesus. 10 Sa Awro nan Katawan, itaw ako kunan Ispirito tan narngé ko sa kagurutan ko say maksaw nin nag´irgo a barámon tururot, say wana: “Isurat-surat mo sa nalukot say naki-nakit mo ta ipáwit mo sa kunran piton sambawan: itaw sa Epesus, Smerna, Pergamum, Tyatira, Sardis, Piladilpiya tan Laodisiya.”

12 Tinmursi ako tan nákit kuyay ampag´irgo kungko. Tan sin tinmursi ako, nákit kon piton ipamaumdingan nin lampadawan, 13 tan itaw sa ipamaumdingan nin lampadawan main saya barámo sa Anak nan Tawo, nakapag´batan anro anggan sa ayi na tan main et a mabalitok nin barikes a nataker sa kerep na. 14 Say ulo tan sabot a maputí ya baramon lana. 15 Say ayi na ket barámon gambang nin naibaya sa pugon tan say pakairguan na barámon umagos nin ruranum. 16 Sa gamet nan wanan gináget naray piton bubituen, tan sa bebey na linumwá yay beneg a matadem sa ruwan rigrig. Si rupa na ket barámo yan awro nin sumileng sa ngámin nan pakapaslagan.

17 Sin nákit kuya, natumba ako sa ayi na bilang nati. Mísa naiká nayay gamet nan wanan sa kungko tan wana: “Andí ka malímo. Síkoy Múna tan Duloy. 18 Síkoy Sayan Ampabiyay; kikiten mo nin mabiyay ako anggang-angga! Tan ginágetan ko saray tutulbek nin kapatiyan tan panabunan.

19 Sumurat ka, sarayti a naki-nakit mo, sarayti sawanin tan saray mangyayadi l´sa mainsan. 20 Saray palimed (kai makatarusan) ran piton bubituen nin nákit mo sa gamet kon wanan tan saray piton ipamaumdingan nin lampadawan a mabalitok ket wanti: Saray piton bubituen sísaray uanghil nan piton susabawan tan saray ipamaumdingan nin lampadawan sísaray piton susambawan.

Ipatuloy et...