3 Saray pakagayeman kon diri, rabay kon talaga a sumurat kumuyon sa pakatauwan tamo nin pakasalbawan, iniisip ko a matkap ko nin sumurat tano maipakidagdagen ko kumuyo nin tumungkol tamo para kuntamon pamemperan nin sin saytaw ket naipasimalá kunran susanto. 4 Kunran tawo nin main kunran pakabalawan nin napakasuratan sin saytaw ket main ana nin linmuob a uumno kumuyo nin naipakaadi. Sísarayti nin tawo a kasan Diyos, sísaray manili a grasiya nin Diyos sa pakaaburuyan nin anggan-anggan mabiyay tan ipakai rayaet si Kristo Jesus a síyay tamó a Pangungulun-pangulo tan Katawan atamo.

5 Kanyá nin tandá muyoy nayti, rabay ko tamó nin ipakapanemtem kumuyo nin síya si Katawan a nangilipiyas (nangilibri) a tutawo na nin lumiwá sa Egipto, balé sinidá-sidá na sara sa maisan nin saray kai nin tumemper. 6 Tan saray uanghil a kai nin tinmuloy a gumáget kunran makagaw´en (makatungkulin) ra balé ta pinalikwanan rayay pammali ra—sarayti niyator nasara sa madedlem, napataker sara sa tumuloy-tuloy a kawar (kawing) sa pakaumukom mangyadí lí sa Awron nin Maalagá. 7 Barámo sa wantaw, sa susiyudad nan Sudom tan Gumura tan saray adadanin bubabali ket naipaibi ra kunra say kadudukáan nin mangungubet tan raruman kadudukaan et. Sísarayti ket bilang sara nin saraytaw nin madudusawan sa tumuloy-tuloy nin mapúran.

8 Sa kapa-kapada nin ugalí ra, saraytin manga tumaynep ket ipakasamá rayay lalaman ra, umaway sara sa konran makabibilinan tan pammaduká a irgo kunran makalangitan nin kukararwa. 9 Balé si pangulon anghil Mikael anamaet, sin saytaw ampiaway ya kunan dyablo sa pakalalaman nan Moyses, kaina gapo nin pináwit a sabtan duká nin pamarsawan laban sa kuna, balé wana, “ Balawen nakan Katawan!” 10 Balé saraytin tutawo ket umirgo saran dumukaan laban sa animan a kai ran matarusan; tan ani abay a matarusan ra sa pangugalí ra, bilang sa pangugalí ran uayep—sarayti a saray talagan bubagay a maninidá kunra.

11Pakakadáduwan sa kunra! Naipadalan sara bilang kuna ni Kain; inapuraen sara nin mako sa pakaganansiya nan pakaabasan nin Balaam; nasidaan sara sa magribiliyan ni Kora.

12 Saraytin tutawo ket sísaray padudungis sa pangadó nin pagpipista kumuyo, pakidunong sara kumuyo nin kasa gapo a isep nin madúda—bilang saray pamasturan a pamakanen tamó nin kunsara. Sísaray rurerem nin kasan rapeg, naipaysep sara tamó kunan siri; kukayon sa gapasan, kasan bunga tan nabunuten—naikaruwan nati. 13 Sísaray maksaw nin daluyun sa baybay, bumurá sa ding´eyan ra; magkadaw nin bubituen, say kunra say sabtan mangisit nin dedlem a naibi kunra anggan-angga.

14 Si Enuk, síyay kapito na ni Adan, nangibaritá yan mangyayadí lí kunran saraytin tutawo: “Kikiten muyo, si Katawan a rumaté ya tan nakalalamó na saray yuyasut nin uangil sa yuyasut a makudti nin 15 umukumen rasaray ngámin nin tutawo, tan ipaptegen nasaraytaw nin nanguwá sa dalan ra a kasan Diyos, tan saraytaw nin makasalanan a kasan Diyos sa ngámin a kaduduká nin susaritá ra laban sa kuna.” 16 Saraytin tutawo, sísaray makariklamuan tan maniningkapan nin pamagkurang; tumbuken ra tamó a kunran duká nin pakarabayan; mararangas (mayayabang) sara sa kukunra tan makaiua sara kunran saraytaw nin rabay ran kalapen nin magunguna ra.

Say Kayaban Nin Pakatuluyan

17 Saray pakagayeman kon diri, balé pamanemteman tamo saray uapustol nan Katawan tamon Kristo Hesus a nibaribaritá ran mangyayadí lí. 18 Nibaritá ra kumuyo, “Sa duloy nan pananaon main saralí a umirgo nin kapabalawan, sísaray a tumumbok sa karabayan a kasan Diyos.” 19 Sísarayti nin tutawo a mangitaw´en ra kamo, sísaray tumumbok sa kunran kaugalian ra tan kasa kunra yay Kururwa (Ispirito).

20 Balé síkano, aray pakagayeman kon diri, ipamaksaw yay sabtan masanton pakamemperan tan dumasal kamo kunan Ispirito Santo. 21 Ipangiká sa kumuyon-kumuyo say adó nan Diyos tan tumágan kamo kunan pangangádo nan Katawan tamon Kristo Hesus a síyay mangibi sa para kumuyo sa anggan-angga nin biyay.

22 Mangagnádo kapa kunran saray mangadúda; samsamen mo saray raruma sa puor tan isalba mo sara; kunran raruma ker ipákit moy pangadó, nahaló sa límo—mangumuraen saytaw et nin aysing a nadungis nan kaduduká a lalaman.

Pakaraywenan Nan Diyos

24 Kunan síya a kai naka a puryan nin manabó tan iká naka sa kaadap nan pakaraywen nin kasan pagkurang tan main maalagan parigsawan—25 kunan sansayan Diyos síyay Mangasalba main pa nin say pakaraywenan na, say kapag´adi na, say kapangyadian na tan say kapamaguwá na, baná sa Kristo Hesus a Katawan atamo, sa adapan a ngámin nin pananaon, sawanin tan anggan-angga! Amen