Akay Na Ni Budha

Say Kadunungan na ni Buddha maagabá ya bilang nan taaw tan say Kararwa Na napnó yan Pangungundó nin makapangyadí.

Kasan dimlog na ni Buddha balé makákit yay Kadiryan na sa Andá tan mamatunong ya kuntamo kunan pusó nin Pangungundó.

Sitin pamasawan maalaga ya baná ta kalamó nay pipákaan nan akay ni Buddha nin naisurat sa abaw et a liman ribo nin babasawnen. Saraytin uakay naiyator sara tan naipatawir saray na sa máteng et dyan rwampuló liman yasot nin tutaon a maiyagwang sa labas nan ketegan tan teped nin kadayaan sa sansinakban.

Saray susaritá na ni Buddha naisurat iti sa babasawnen a mangibaritá ngámin a susakop sa byay ran tutawo tan matandaan a kaipa'kaan ra.

Bikoy nan Dharma

Naipataros yay Bikoy nan Dharma a nangibwat sa saritá nin sanskrit “Dharmacakra.” Bilang sa bikoy nan gariton tumuloy yay tumulin-tulin, mapanandaan ya kunan akay na ni Buddha a tumuloy maibantog nin maagabá tan kasan anggawan. Saray walon rayos nan bikoy mapanandaan ra sara kunan Dalan nin Walon Sakop a Maatágay sa Budismo, sa sangkaalagawan Dalan nin Gawá-gawá. Say Dalan nin Walon Sakop a Maatágay sa Budismo maitambay sara sa matunong nin teper, matunong nin isip, matunong nin saritá, matunong nin ugalí, matunong nin kabyayan, matunong nin gayod, matunong nin talimanek tan matunong nin pangumámeng. Sin saytaw báyo sara nangawá nin tawu-tawo tan raruman kinitikitan na ni Buddha, sitin Bikoy nin Dharma mapanandaan ya a sayan bagay nin galang. Sawanin say Bikoy inagamir ya sa sansinakban a mapanandaan sa Budism.

Dhammapada
(Dalan sa anggan-anggan kaptegan)

Saray gugurá kai gapo tumgen sa gugurá iti sa sansinakban. Say adó tamó nin makapatgen kunra. Siti yay kadaanan nin Gan-gan.

Si lungas nin umisip síyay lungas ket baná kunan sitin pangibwatan síyay madudunong. Si lungas nin umisip síyay madudunong síyay lungas talaga.

Anta síyay makadaeg kunran sanribon lullaki sa kamínan nin bakal, balé síyay makadaeg kunan kadiryan na síyay sankatágayan nin mananalo.

Anta mabyay yan sanyasot nin tutaon, ket kai naya mákit a Makapangyayadí nin Kaptegan; maong et talaga sa sayan awro kunan saya a mákit nayay Makapangyayadí nin Kaptegan.

Maidap yay pakaiyanak nan tawo, maidap yay byay ran tutawo, maidap yay rumngé kunan Makapangyayadí nin Kaptegan, maidap yay pakákitan nan Buddha.

Andí muyo gaw´en a duká, sukaden muyoy maong, palinwen muyoy nakem, siti a simbawa ran saray Buddha.

Kasa gapon ának nin makapangiyagel, kasan ama udino kanayon; síyay umadap sa patiti kasa gapo nin pangiyagel nangibwat kunran kanayon na.