Ikarwan Pedro

1 Si Pedro, síyay apustol nan Hesus Kristo, kunan pinilí nan Diyos, saray dayuwan sa babon lutá, naitayak saradtaw sa Pantes, Galasiya, Kapedusiya, Asiya tan Bitiniya, 2 sísaray napilí sa katandaan nan Diyos, si Ama, sa makasantuwan nin gawá nan Ispirito, sa pakasunuran kuna ni Hesus Kristo tan sa ipawisikan nan dayá na: Sawá pa kumon tan katinekan ikumo sa pakábawan.

Raywen kunan Diyos Para Sa Ampabiyay Nin Pag´asa
3 Iparaywen ya si Diyos tan si Ama na ni Katawan atamo, si Hesus Kristo! Sa alakin pangangádo na a biniyan na tamo yay báyon iniyanak sa ampabiyay nin pag´asa kunan pakasubliyan na ni Hesus Krista sa patiyan, 4 tan sa kunan panawilan nin kai gapo a mati, bumangles udino kumasa-naiyator sa kalangitan para kumuyo, 5 síya kunan sa pakatepran ket maipakasakban ya kunan kapangyadian nan Diyos anggan sa pakaratean nin pakasalbawan a napaiandá ana nin ipákit sa duloy nan panaon. 6 Kunan siti maksaw kamon rumiriket, bilang sawanin a náteng anan bugá ket nakapadiyádiyá kamuyna nin abaw anagsikarang nin pagsubok. 7 Rinmaté sarayti tano say pakatepran-mabli yaet no kai yay balitok nin masidá et abirno maipuró ya sa puor-makapapteg yan mapuró tan makapayadí sa karaywen, sa gluriya tan sa pakapetegan sin síyalí, si Hesus Kristo, maipaikákit ya. 8 Abirno nin kai muyuynan nakákitan intaw, kaaduan muya; tan abirno nin kai muyuynan makákitan sawanin, tumemper kamo et kuna tan napnó kamon magluriya nin riket a kai maibalikas, 9 ket ampangalap kamo say anggaan nan pakatepran muyo, say kasalbawan nan kukaruwa muyo.

10 Kunan sitin kasalbawan, saray mangibaritá nin mangyadí, sísaray nangibaritá say sawá pa kumon nin rumaté kumuyo, naningkap saran kadadani tan sabtan kaingatan, mansumarínen ran ipakaitandá yay panaon tan kaikaan a Ispirito na ni Kristo kunra ket mantumudó sin síyay ngibaritá nin mangaydi a kadiyádiyan na ni Kristo tan say kagluriyawan nin sumunor. 12 Naipákit ya sa kunra nin kai sara ampagsirbi sa kunra balé sa kukuyo, sin sarayti a naibaritá ran nin naipabaritá ra ana kunran saraytaw a nagpangadal nin mabistan patandá sa kumuyo kunan Ispito Santo a nagibuawat sa kalangitan. Saray uanghil anamaet ket mailiw saran mangkit sa saraytin bubarang.

Mantuwen Ka
13 Kanyá, ipasadiyaen muyoy isipan sa gawaan; magtimpien kamo; iká muyoy ngámin nin pag´asa sa sawá pa kumon nin ipaibi kumuyo no maipákit ya lí si Hesus Kristo. 14 Ta matulok kamon ának, andí kamo sumunor sa kadukaan nin karabayan ket main intaw kumuyo sin síkamo nin umikap sa kasan makatandaan.15 Bale síya det a nangayab kumuyo ket masanto ya, kanyá masanto kamo anamaet sa ngámin nin gaw´en muyo; 16 ta naisurat yayti: Masanto ka, ta masanto ako."

17 Ket síkay mangayab kunan Ama, síyay manguhukom nin kasan kilingan kunan sayan-sayan tawo nin gaw´en na, ikapen yay bubiyay muyo bilang saray dudayuwan iti sa limo nin main kaga-galang. 18 Ta tandá muyo nin ambó sara yayti a bubarang nin umanted yay nginaan ra bilang sa pirak tan balitok nin síkamo a nadundunen sa biyay muyon kasan laman nin naibi-ibi kumuyo a nangibuwat kunran kapupúnan, 19 balé kunan mablin daya na ni Kristo, síyay karniro nin kasan mansa undino sidá. 20 Napilí yayan sin saytaw et nin pakataránan nin babon lutá, balé naipákit ya sa duloy nin panaon para kumuyo. 21 Sa kuna ket tumepren kamo kunan Diyos, síyay nangibiyay kuna sa nati tan nangiraywen nayaet, tano say katepran tan say pag´asa muyo ket itaw ya kunan Diyos.

22 Sawanin ta nalinis muyo nin síkamon bukod sa mansumunor nin kapetegan tano main a kaadó nin diri sa kumuyon bubsat, ikaadó kamon sayan-saya a makarareman, nangibuwat sa pusó. 23 Ta síkamo ket naianak kamo anamana, ambó sa dumuká tampor nin bikoy, balé sa kai dumuká, kunan ampabiyay tan ampagwantawan a saritá nan Diyos. 24 Bilang sa wana, "Saray ngámin nin tutatawo ket barámo saran didikut, tan say ngámin nin gloriya ket barámo yan buburak itaw sa tatalon; saray didikut ket pumakrí sara tan saray buburak ket manabó sara, 25 balé say saritá nan katawan umumdeng anggan-angga." Tan siti yay saritá nin naipaadal kumuyo.