Adubo

Say adobo nangibwat ya kano sa Mihiko. Baná ta say dalan sa Pilinas ket mako sa Akapulko yapó misa mako sa Pilinas, saray Kastilá ket niáwit ray kalutuan ran Mihikano. Mákit ti sa rikado nin nangibuwat sa Mihiko a bulong nin lawrel tan atsuiti. Say lutuan nin Adobo, wanran Kastilá nin Adobe, ket maibarbar a karni sa suká and tuyó. Kunan sitin laok a nangibuwat yay Pilipinon luto nin Adobo.

Ipasiya no makáno a rabay nin lutuen. Say nasusukat iti ket makagwá yaytin maipakangan saray ápat nin tawo.

Rikado:

• 1/4 tasa nin suká
• 3 kutsaron nin tuyó
• 1 kutsaritá nin asin
• 6 pisí nin bawang a napipit
• 2 bulong nin lawrel
• ½ kutsaritá nin paminta
• 1 kutsaron in masam´it
• ½ tasa nin ranom
• ½  kilo nin karnin baboy (takyay undino tumbong)
• 1 kutsaron nin tabá undino ladák nin panglutó
• ½ sibuyas a naiiwá
• paprika udino atsuiti* (no rabay sigon makuluran)

Ilaok tan ikiwar ngámin a rikado balé ibatí yay sibuyas, tulon pisi nin bawan, karni tan tabá, sa mangkok nin plastik. (Andí ya usaren a latan aluminom ta main mangyadi sa taway kunan lata tan suká.) Ikalamó yay karni sa nailaok nin rikado ta ikiwar anamana tan ipabarbar udino say wanran ipaadubwen yan sayay udas udino máteng et. Mabista et no ipababar yay anggan yabina.

Iká yay napabarbaran nin rikado sa alakin kawalí ta ilutó ya sa ayupa nin amot. Ipaburek-burek yan sayay udas udino anggan malumo yaynan karni. Galaten yay karni tan ipisyay yay kasawsaw.

Ipámot yay tabá sa kasirulá ta ipamatektek yay tulon bawang mísa yan ilaok yay sibuyas anggan lumumo yayna. Galaten yay bawang tan sibuyas ta ipamatektek yay karni sa tabá anggan natektekan yaynan ngámin.  Ipalaok saray kasawsaw, bawang tan sibuyas ta ipaburek-burek yayna sa nakaayupá nin amot anggan mapaletan yaynay sawsaw. Isambugen yan bugá a paprika udino say atsuiti. *(Ibarbar sa ápat a kutsaron nin ranom nin sayay kutsaron a bibikoy nin atsuiti tano maglat a kulor. Iyusar yay nakulor nin ranom sa luto, ibatí yay bibikoy)