Maximo Magrata tan Ernesto Borce

Dumalan sa Kinarmaan
Ni Maximo Magrata tan Ernesto Borce

Say byay iti sa mundo dumalan ngámin sa kinarmaan
Kai nin maisigudo no pulos ngámin indam
Bilang sa agamiren no kai ginágetan
Abaw saray umimbel kanyá nepeg kumon a pagawan.

Say agamiren anaod no kawánanen mo
Andí nin imúyang ta abaw saray matukso
No kai ra didaen kalapen ran sikrito
Lalo no umbó man kadiriyan kai raka ikalímo.

Sarban bagay a gawá maidap no isipen
Mimula kaman wadí wamon pakinabangan
No gumurak ana lí abaw matangtang
Wanin et sa bunga, apay raruma kasan laman.

Balé main lí a lamang sumili maitawir
Putyen mon matua pigaw kai na maaley
Mimula kaynaet pigaw main pasirong
Balé say báyon patubó ket mainumay ran dutduten.

Sansyay nan Lamang
Ni Maximo Magrata tan Ernesto Borce

Síkoy nay pásar a sangkaidapan
Naanor, napal´is sa butlay taw
Man´itken koy anos wá kumon makaabay
Mas bale na udet maipataaw.

Say wangko no síkoy nay makaduong
Ta no pasta-pastangen ket adani nan tuloy
Say agos nin siblet a manpangiyanor
Naglat a ilalo nasilyan bereng

Wangko ta kasayna anggan kon badánan
Ta say tyimpo ket kasabyan anan makanarang
Malinak a pirmi a kasaynan burakan
Andí ka angangkon síkoy makaabay

Sansyay nan lamang a kai ko makarigrig
Ababawí ana layin andí ana isuet
Kai paet tandá Sali mairebreb
Pangibwatan lí sesel sa awron susuyot.