Kunan sitin siksyon, main nákit kon nailawuk-lawok nin surat kunran sarayti nin gawá nin literaryo. Ayus-ayosen et lí balé naikalamó anadti kapada sa napadenepan nin kasuratan a nagwá ana.

PANGUNGUTANA

Ni Maestro Tomas Calado

Pasinsyawen muyo kami sa kawkapusuan,
Sa andí nin guránen a sayti min nipamukaw,
Baná sa ririket min kai napukpukan,
Patiti may mawa (maimawa) syansyan pakisalamatan.

Mataman tana iti kami tana angga,
Sa baraybay bali muyo a magliwa-liwa,
No ipagkanakem ta dungdungan kami pa,
Ta say awit min kaberengan wá maliwa-liwa.

Ta abaw anan riga a namápuingan ko,
Kain syansya kumpa a iliw ko sa kumo,
Nipalamang-lamang ko pay kumo tanan paasikaso,
Tan ngaran mo lawas a manpagmatyan ko.

Kiririket kami kumon sa kumuyon kiriga,
Kasa ta mankapaed sa alakin mulistya,
Kunran mangalangen kon pinablin matua,
Tan nanglalo paet no main kamon bisita.

Tandá ko pa ta kai muyti mankaamingaw,
Tan kai sumbang sa nakem muytin kaáay-ay,
Ket no ibin aburoy ta síkami dungdungan,
Tawa rumiriket yay pusó kon nailiwan.

Si pusó ko byay a manpangirangep
A mankagunigon sa alakin pakaibeg
Kai kuyna kumaya sa gaw´en kon manepeg
Ket kai nin mapaed ta sikay mataynep.
fin

Say sugat nin kapusuan,
Lalon rumda no pukpukan,
Ket no isangit mo matambar,
Ta mauyas lwá mon abaw.

Say sugat no akit-akiten,
Say sakit kai gapo tumgen,
Ket no pauryan man´urayen,
Kasan tambar no kai sinakem.

Yabin makanarang a nabo kasan gunem,
Nakap nin abig sa silag ran bituen,
Say puon nakadagdag kapipilit nakem,
A itin ginmagará sa mabli muyon temben.

Mablin matua mi wamin mangkutana,
Agamiren muyo kumoy tepel tan pasinsya,
Maabig a yabi sa kumuyon sarba,
Magámuran muyo kumoy abaw a inawa.

Say kaka midti sa ruros kanakman,
Say rabay mi kumon lawas mabanaan,
Aligriyadoy nakem a kasan pangumanan
Napasaya kami sa kawkanakeman

Kanyá anaod say main min dawat,
Imansanan muyo pa a andí nin makángap,
Tano ipagkanakem muyo a síkami mapasarag,
Paulinen kami a mako kumuyo kiikap.
fin

Kunan sitin yabin matinek,
Sa andá main muyon pangangálek,
Iti kamin lawas mansin´ek,
A pubrin niawit ririket.

Say ririket mi kai kasabtan,
No saytin lugar lawas maitambay,
Kai mi maglat sa kanakman,
Sa anggan nin makánuman.

Ay mimarmar kamuy-oy byay ko,
Saringring síko pay sir´epen mo,
Mibangon kayna ta ingaren mo,
A man´iay-ay nan pusó ko.

O Amay mi tan Inay,
Mankanara kami pan dungapan,
Ta ingaren muyo kaáay-ay,
Nin Anak muyon nailiwan
fin

O sangkagayagaan tan magrasyan yabi,
A múnan ko tanan mablin main bali,
Dawat mi pay dispinsa sa kakábusan mi,
Baná sa mulistya intin ginawá mi.

Sa saytin abig tan andá nin lugar,
Hardin a mariga minas kaririktan,
Kayná masambey sulit kailiwan,
A kumapet itin iliw ay kanakman.

Makabos a tuloy a niraté midti,
Ta bukod say iliw a guia (agwia) min nakudti,
Ket matalek a syansya ta mangulet kami,
Sa raros nin kerep mo O Aman main bali,

Kanyá man´isirong sa lulem labi mo,
A kawkapusuan a napungos ilalo,
Wami makapuet a pwirtan hardin mo,
A makudtin mangikap nin inso.
fin utro Pangutana

O mangalangen min Aman main bali,
Sa ngaran nan Dios tan maabig a yabi,
Dawaten mi pa kumoy dispensan alaki,
Baná sa mulistya inten (intin) ginawá mi.

Ta say makadagdag sa kumi nin sarban,
Sa hardin nin labi a man´umalemeem ya,
A nasanglap mi a nagsirbin giwa,
Iti payti main a lugar kamain ana (kamainan na).

Kai kasa ba ay ririket kanakman,
Sa nikaraté midti sa main muyon ugsuran,
Andí pa isiblet dudungaw ay abryan,
Ta dungdungan kami a itin manay-ay.

Kanyá kumon andí nin isiblet,
A saytin tied min lipos nin ririket,
Sa leal a kerep muyo isen kami nangalot,
Tan raros pusó muyon kumin mangrisibi et.
fin utro Pangutana

O Aman main bali síkami manpamukaw,
Sa baraybay bali muyo sa temben dudungawan,
Andí pa kumon tin ipagkasalanan,
A saytin atribimyinton pubri min pásar.

Say man´idaan muyon maalagan kama,
Katrin kamainan sa luob nin silda,
Mimata kamo pa tana Ama mi tan Ina,
Ta iti kamin Anak mon lawas mankutana.

Kanyá anaod Ama mi tan Ina,
Abryan pay dudungawan ta kikiten tana,
Say mata mon perlas wá nin (wanin) uminawa,
Sa iliw a mantágan sa tyimpon náteng ana.

Síkoy makaundo maalagan Aglaides,
A mankutana man´ay-ay mansangit,
No kai kami awnen sa man´idarumen sakit.

Sumublí sa tágay

PAKISASALAMAT

Elimintos tan kalutaan,
Rinumiriket a kalapagan,
Say bituen sa kalangitan,
Padapadan kinmalaway.

Kai mamin a ririket mi,
Sa silag lino ran diamanti,
Alakin pakikisalamat mi,
Sawanin sa niraté midti.

Kaalimbawá ay paraiso,
Sa luob bali muyo,
Ririket mi kumoy kagámuran muyo,
Tan grasyan kasan paso.

Salamat mablin kasira (landlady),
Sa leal andá kanakman muyo,
Ririket mi kai miunáno,
Tan rigan kasan paso.

Salamat mablin kasera,
Salamat sa kumuyon sarba,
Sawanin ta nadungapan mi na,
A paraiso tan mablin gluria.
(fin) nayadí

Sumublí sa tágay

PANGRARAYO (1)

Say abig tan riga moy kai maibalikas,
Kasaynaod kipara mo sa andá mo nin rusas,
Kanyá say wangko ta lenged moy nangayat,
A nangibwatan ana sin síkay masilap.

Minas ririket no síkay lumingay,
Tepé mon umimis inson kanakeman,
Kasa nin dwá-dwá awit mi kaibgan,
A nangibwat ana sin síkay mapastang.

Bukod mo nin burak a linumtaw sa mundo,
Malino mon mata kalimbawá ay pebo (fevo),
Síno may makákit pilit yan (pilit ian) uminso,
Say main kaberengan maliwa-liwa mo.

Andí pa ipáká sa pagmuda-muda,
Saytin pangrarayo sa kumo nigagará,
Sa kátengan (katingan) nin tyimpon main lí a syansya,
A pruiba nin saytin sa kumo nitalaga.
(fin) nayadí

Sumublí sa tágay

PANGRARAYO (2)

Sain a masudí mon karingasan,
A nanaeg sa sarban kapusuan,
Binaror muko a ibyay a ibyay,
Nipagkaibeg kasan kiuribay.

No ilingwes mo sira in a mata,
Tekep nin imismo dwinya (owner),
Siray mawmanok kantawen ra,
A galang linkod mo tan riga. (2 bisis [mirwa])

Sira in a gading mon ngipen,
A manaeg sa sawsileng,
Kai kon tuloy maitpel,
No kai ko nin raywen.

Siin a bebey mo aninay bista,
Iti sa mundo kasan kipada,
Anghil ya sa langit ay wanra,
Mako yadti mangliwa-liwa

Say gusto moy magawá,
Ta kasan balinya (valiant),
Akuen muytin adó ko,
Sa kumo nigagará,
Ibi muyna kadí a pusó mo kungko,
Ta binyan mon duso mati ko kumo.

Ibi muyna kadí ay byay,
A pusó mo kungko,
Andí muko kadí pákitan,
Tan balinyan kasagran,
Ta karo akon kaurarwan,
A sa kumo mantagan.
(fin) nayadí

Sumublí sa tágay

AMURIS (1)

Say abig nin ringgas mo,
Rinumsa sa kerep ko,
Nipagkaibeg sa kumo,
Pusó koy kinautibo.

Si udtin pubrin pusó,
Dinakep binaror mo,
Isen mo ninang nipriso,
Sa karsil (karkel) nin ringgas mo.

Ani ay magawá no syay karmá,
Sa nipamiriso mo duinya (owner),
Dusán nibi mo kasan kipara,
Ninang nin byay etpel kon syansya (2) syansya.

Say rupa mo ninang bilang nin rusas,
Say bebey moy bilang kural, (2 bisis [mirwa])
Say ngipen moy bilang nin perlas,
Say labi moy anghilikal (2) anghilikal.
(fin) nayadí

Sumublí sa tágay

AMURIS (2)

Sayay (sayay) pakaibeg sa pusó sinumibwal,
A man´awiten ko lawas tana naynay,
Iti sa pusó ko síkay nitiunay,
Ngaran mon masudí lawas pitamitam.

Mangkálek may lalaman ko,
Manpukawen pilit pakagusto,
Manpanenden yabi awro,
Baná sa alakin pakagusto.

Maumildi (maomilde) mon mata no siraynay ilingis (ilingues),
Palastadon tuloy mitagem kaiimis,
Mangulon kanakman mitagem pangingisip,
Baná sa ringgas mo namin kapipilit.

Ay kikiten mo,
Lingayen moy saytin pásar ko,
Manpanenden yabi awro,
Bereng a manpangibwat kumo.

Alang tamó (tamo) ta kai makakitimbang,
A pásar ko inti ta say kakabusan,
Wanin man wadí no paabigen bilang,
Alaki kon syansyan pakisalamatan.

Ket balé ta kasan raruma,
A mankagulwan no umbó say síka,
Kanyáa kumon andí isiblet tana,
Ta karo iyay (yay) pusó kon manpagdusá.
(fin) nayadí

Sumublí sa tágay

IBEG A KAI MASARITÁ (1)

Náting anan tyimpon pinala-palabas ko,
A man´umibeg yay pubrin pusó ko,
Kai ko makapangan ni makakálek gapo,
Páno kadí makana a gaw´en kon remidyo.

Ay mundo aninan byat,
No wanti nan wanti lawas,
A pakaibeg nanin pusó kon kai ko maibalikas,
Sadag tana palayi a ipangikap-ikap,
Ririket nin mata ko sa kunan manilap-silap,

Si pusó ko syay lawas yan manpangirangep,
Alakin dyá-dyá tan dusá nin peteg,
Makáno kadí a hudas a manipeg
A ipangidarom kon alakin pakaibeg.

Ay mundo aninan byat,
No wanti nan wanti lawas,
A pakaibeg na nin pusó kon kai ko maibalikas,
Sadag tana palayi a ipangikap-ikap
Ririket nin mata ko sa kuna manilap-silap.
(fin) nayadí

Say kasisin´ek nan pusó a naima-ima,
Man´unduen kuyay pusó kon lawas mansin´ek,
Baná sa ilalon inumapay ka a apes,
Milalo kuyna wadí bara kuyna no peteg,
A kumpliminto na kungkon kai ko gapo mar´eb.

Páno naynan pusó páno naynan mata,
A manpangilalo sa buklas tan yabina,
Andí na kuyna udet kumon pinatnagan ana,
Inson pamamastang tan kaiimis nin rupa.

Sadag ana byay a nilawan (nilauan) kon ririket,
Tan kumpliminto mon inakó nan kerep,
Ta mataman wadí kai ko namalikas´et,
Matya man tin lalaman lipos yan ririket.

Kanyá naod (kaña-od) O Dyos a iyawis (yauis) moy kanakman,
Say ririket nan mata andí ipabukudan,
Mataman wadí kasa ta et nag´istudiawan,
Man´aduen nakan pusó kon kai mo mankadlaw.

Undo yaynay pusó ko no masilap takan mata,
Say suri (sore) ringgas mo a ibi mo sa raruma,
Say dawat ko pa balé andí kumon tana,
Isiblet sa kungkoy lugod ula-ula.

Ani ay magawá ko no kabos a pásar ko,
Mangitpel ka laman ta sayti karmá mo,
No kai ra nin unduen pánon gaw´en mo,
Patitin syansyay pilit maraté mo.
(fin) nayadí

Nablag a kapingmat sa ririket mata,
Isip tan karakar lawas mangkagutgot,
No mapanemtem koy karmá kon kabos,
Kawaen (kawaen ) paynaytaw a imis na tan lugod,
Bigrá nin namet tan kapingmat a naparot.

Ayi kaynan sirin namayapayan kerep,
A namaila-ilalon main kon ririket,
Sumublí kapa ta kai naupapda et,
Sa pusó a man´ay-ay a kasan pangangálek.

Ta no iti ka kumon ta síkoy maimatunan,
Guloy pangingisip lamang (limang) a kanakman,
Sa andá pangangálek bigrá akon mapukaw,
Ta bara ko no itikan kasimba-simbatan

Undo ana pagé a sayti ko nin pásar,
No mapanentem koy lingis (linguis) a makapainsay,
No mailaway bereng milunos a ingar,
Liwa-liway sangit lwá a ipanambar.

Ta maong ana udet kumon no kai nitaray,
A lambot asikaso nilugod kanakman,
Ulilawen mo man kai, kain syansya dumlaw,
Ta kasan isip-isipen a pangiliw-iliwan.

Bilang sa dawdikot tan barang a kayo,
Kasan subú-subo' kasan pugpog gapo,
Kai nin rumeré mataman no bagyo,
Ta kasan pangiliw-iliwan a pangalu-galo.
(fin)nayadí

Mangidáton iliw tan pakaibeg,
No isip-isipen ko undo anay karmá,
Sa kapipilit guston kai masimbawá,
Sa pwirtan ririket no main makasadá,
A kai ra pan nakem a kai nin masaritá.

Kanyá naod (kanyá od) say tepel a ginawa' mi sawanin,
Ta dumago sa kumon mangidáton iliw,
Kai gapo maupapdá tan kai nin maumánen (maumánin),
A iliw mi sin taon anta anggan sawanin.

Kasay naod raruman sukat min man´iliwen
Bukod tamo a simpit mo tan deen,
Sa inudas-udas síkay pipanemtem,
Say talintawo moy bilang kiten-kiten.

Kanyá naod (kanyáod) say tepel sira.
(fin) nayadí

Peteg payti main patbang nin andá,
Lenged ra nin hasmin,
Nangayat pinanemtem,
Tan ririket a kai nin masamben,
Kanyá naayat kamin,
Dumaraw kikit a mangidaton iliw,
Pigaw mapuryas koy kapipilit guston,
Niglot sa nakem.

Sawanin muyna nin peteg mákit,
A pruibas nin apes kapipilit,
Atagay ya may langit,
Magsirbi ta syay manepeg,
Ta kasan masudí sa mata,
No umbó say liwa-liwa,
Sa pusó ko nipasaya a kai
Maglat sa anggan-angga.

Páno kuyna lí kasi,
No sayti ket kaimaaksibi,
A buluntad (wish) kon magsirbi,
Rinumsik sa pusó a diri,
Pilit sain kai nin(kain) sumili,
A kaberengan tanan pirmi,
Agwantaway dusán patiti,
No kai mo maakó kasan bali.
(fin) nayadí

Sumublí sa tágay

ILALON NAIMA-IMA

Makagutgot nin isip no umamengen ko,
Kakisidan karmá sa ririket a ibi mo,
Maong anay pangirangep a ipangmati mo kungko,
Dyan say payagan muko nin pangila- ilalo.

Sa yabi tan awro lawas kon piisip,
A rimidyon makaná sa man´itpel kon sakit,
Bang say síka balé luuden muyna udet,
Kai tana nin manabó a ingangádo mon peteg.

Ibaritá mo pa no sayti gagaraw nin
Paidapen moy lalaman tan say byay koy laosen
Anta ngalí-ngalí (ngali-ngali) bilang gluryay rat´enen
Anta kai payti main no kai síkoy ima-imawen.

Mankapdá akon kumpliminto mo kungko,
Ta kai ko mairangep animay idap ko,
Adti may keen (kaen) maisalambit a ngaran mo,
Ay inadá wangko makánoy glurya ko.
(fin) nayadí

Sumublí sa tágay

ADÓ A KAI RA NIN MAAKÓ

Undo ako payna byay no masilap kan mata,
Say suri (sore) ringgas mo a ibi sa raruma,
Say wangko pa balé dapot andí tana,
Isiblet sa kungko lugod ula-ula.

Ani ay magawá ko no siin anay wamo,
Itpel kuynan sansya (syansya) maraté karmá ko,
No kai mo nin unduen a saytin pásar ko,
Patiti nan sansyay (syansyay) pilit maraté ko.

Páno naynan pusó páno naynan mata,
A manpamasta-pastang sa kalngeran mon múna,
No isiblet mo wadí bilang kasa kon alaga,
Ani ay sukat gaw´en itpel kuynan sansya (syansya).

Pánoy na lí kasi no kai muyti maaksibi,
No kai muko aduen ta say wamo layi,
Kai ko nin numepeg ta pásar koy pubri,
Itpel kuynan sansyay (syanyyay) anggaway (angauay) patiti.
(fin) nayadí

Sumublí sa tágay

PASADUBLI PANGRARAYO

Say ringgas moy naipatnag,
Sa intiron Pilipinas,
Síno iyamay makasilap,
Pakaibeg ray kai nin maglat,

Peteg ta say karinggasan mo,
Naibantog iti sa mundo,
Bukod mo tamó tan sulo
A man´ikapen a kasan paso.

Pánoy na lí kasi no ringgas muynay makai,
Siguroy nan sansyay (syansyay) rat´en koy patiti,
Ay (ay ay) byay ta síno yay manikap ikapen mi,
No umbo say palaway tan lino mon diamanti.

Pirmi tana nay-nay,
A kai mi kalingwanan,
A sa kumi ipastang,
A mata mon sangkalinuan

Ay byay síka imanilalwan mi,
Burak ririket sa awro tan yabi,
Páno kadí main lí et kasi,
Mamin inawan alaki,
No umbo say nakem mon diri.
(fin) nayadí

Sumublí sa tágay

PASADUBLI PAKAIBEG

Say ringgas moy múnan man´galangen ra,
Nin lapag sínuman a pinarsa,
Bilang ka nin sayay inkantadura,
A nangayat kaiibeg mi nin sarba.

Ibat ta kai mi na nin maitpel,
A man´awiten min irap tan bereng,
Say guston kai nin masamben,
Iti sa pusó mi síkay nitanem.

Bang ta síkay nangibwatan,
Nin ibeg kapusuan
Síkay namaet a manilalwan
A mami sa kumin palaway mantagánan.

Kanyá kumon andí isiblet mo,
A sayti mi nin pangingilalo,
Say andá surí (soré) kanakman mo,
Magnayon kumon lawas kasan paso yabi awro,
(fin) nayadí

Sumublí sa tágay

BALS (WALTZ): PANGRARAYO

Say silap nin mata mo lino ran diamante,
Malnged a rebi ka maalagan tyismi,
Dinaeg mo siray bawbaton mangabli,
Nárep a silag ra tan siray nag´in klipsi.

Kai mamin a ririket ra,
Nin intiron sarba nin pinarsa,
Sadag rayna nin glurya,
Sa mundo sin iyanak kayna; Ay!

Suri (sore) nin linged mo sa miong ra nin burak,
A dining´eyan ra nin bawbato tan perlas.

O byay ta sin síkaynay masilap,
Say ririket mi na sa kumo ay byay kai nin maibalikas,
Sa kerep mi kai gapo maglat,
A alaki min pakaibeg mi kumo maalagan burak.

Páno ket say kading´eyan,
A mampambuel sayti páno layi,
O ket andí ka nin mabereng,
Ta main lí a sansya (syansya) inawan sumili,
Sa sarban saytin turminton alaki.

Bang ta síkay namin kairapan,
Sa kerep a nadedleman,
Síkaynamaet lí a sansyay (syansyay)
Mami nin palaway.
(fin) nayadí

Sumublí sa tágay

BALS (WALTZ) (1)

A susinan masudí sa mundo nibusyag,
Say andá banglo mo rigan makasanglap,
Bistan pirurutong a manpiwakawak,
Ináwit nan sirin lawas manpismak.

Kasanglap kon banglon dinumpá sa kerep ko,
Tinmaros sa pusó a pakaibeg ko,
Nangibwatan anan niglot sa pusó ko,
Awit kon ibeg a mangté sa kumo.

Síkoy alina (flavor) síkay palaway,
Síkoy gawgunem langit ka byay,
Mandádaan koy dwi (dui) síka balé a inum´ay
Kaniyá say adó ko síkay panuyuan.

Iyaburoy kumon a síkoy makagté,
Sa andá mon burak a pirmin pitaynep,
Ta pigaw uminawa yay ibeg a manled-led,
No maipunya kayna sa babó nan kerep.
(fin) nayadí

O mapaya-payan sirin dinumpá sa kerep ko,
Siplog na nin amyan (amian) a nangangaw´an prisko,
Matan mauyamo pusó a makumpliminto,
Katutúwan lí kasi inadó muko anggan makáno.

Sa taaw na nin dyá-dyá a maburakan,
A mantanguyen ko mataman maglat a byay,
Bukod ilalo ko sa sayay buyangin a namatawan,
Nitudol na nin pusó mo pruiban (to prove) síkoy mankawánan.

Wanan suminag nin awro ayi naytaw a ririket,
Napatutúwan ko a síkoy inadó mon peteg,
Say ilyo (ilio) sa pusó ko mumalep´ep,
Liwa-liwa nan kerep ko iyator mo pan máget.
(fin) nayadí

O burak a mariga a mangkaibgan mata,
Síkay makaliwa sa pusó a sidudusá,
Lalo no yabina sa udas mibusiag ka,
Say banglo moy kasan kipada a manpismak lawas tana.

No wangkuynan masanglap,
A banglo mon manpismak,
Nakem koy madag-dag,
A mako sa kumo mangikap.

Iyaburoy mo pa kumon,
A get´en ka tan iyator,
Sa pusó kon sa pusó ko,
Sa pusó kon manpanaton,
Nin labi sa kumo nisapon,
Ta bukod moy pinilí kon,
Liwa-liwan magnayon,
(fin)nayadí

Abaw anay nákit ko sa babó nan mundo,
A mangalinon mutya a narayo-rayo,
Kai yaet napukaw a ibeg na pusó ko,
Sulo tamó sawanin sa nipakákit ko kumo.

Ibeg a nanaeg sa intiron simpit,
Nanidá nin karakar tan nangiugó inisip,
Namin kaberengan tan abaw a sangit,
Mangwatak kerep ko no kai kuyti maisangit.

Maidap a sung-sungen a kaagos(kaaagus) nin lwá,
Ta ledeg yay pusó saytaw (sataao) nin dyá-dyá,
Say daluyon nin ibeg kai gapo kumpa,
Say siplog ringgas mo kaiv na masaba.

Kaalimbawaan moy kayo kan mablong,
A manpangidya-kidyap sarban bawbulong,
Rabay ko pa kumoy kumapet sumirong,
Sa mablin alinamo no wadí iyaburoy.
(fin) nayadí

Sumublí sa tágay

BALS (WALTZ) (2)

Nalibot kuyna ngamin a Pilipinas,
Mayaman a lugar tan rigan naganap,
Kai ko et nakákit bilang kumon burak,
Nanginkanton ibeg sa pusó sin mugat.

Kanyá payti main sarba ran mawmanok,
Kunan sitin lugar a naganap nin birtud,
Biig mampairag-rag (manpairagrag) sa ringas mo Binus,
Mangidáton ibeg labi tan say lingkod (linkod).

Baló ana kungko sawanin,
A mampiáwit (manpiawit) alakin iliw
A kai umarak sa lenged mon hasmin,
Maangot (mangangot) banglo mon main.
(fin) nayadí

Báyo-báyon delaw (délaw) nitanem sa kerep ko,
Sinidá moy inisip tan pubrin pusó ko,
Sumiplog ka pan siri a pangipáwitan ko,
Iliw ko sa inadó suldong na nin byay ko.

No nayep-yep tan nakakálek kai nabilang,
Taynepen pa kumoy andí panglilingwan,
Malamang wangko ta main akon mankadlaw,
Tinmab´ang (timmab´ang) a nakem ko anta nadalí et a lamang.

Sarba nin gawá mo pulos makapasangit,
Pináwitan muko nin surat nin umno kadatig,
Tinupí (tinope) man daité(daiti) báyo ma nipáwit,
Sin nabasa kuya inadó matakoy sinumangit.

Main (maien) kan mata wangko sa nakem ko,
Main (maien) sangitan moy malamang a tawo,
Malamang wangko ta main mankadlaw ko,
Ipurok naynay nakem na tan kasa yaynan asikaso.
(fin) nayadí

Ta tutuoy naod a bilang nin wanra,
Sa sira ran bawbato itaw ka kipara,
Balo ana layin (layen) kai ka kaibgan mata,
Say mandádaan mon dikot manrumiriket sira.

Sarba ran dawdikot sa babo nan mundo,
Katagem (kataguem) tinmubó sa babon bawbato,
Mangkalanes (mankalanes) lawas sa sira nan awro,
Bigra a linumambot (linumanbot) a naalinawan mo.

Ta bilang ana layi sa sayti kon pásar,
A kai nin umibeg sa ringas mo tinsay,
Sarba nan mawmanok a manlelpad sa tágay
manpairagrag sira norengas muynay mapastang

Ta ayin (ayen) dilaan kari (kare) a kai makabalikas,
Siray sipod a umel tinmurir dilá ran kapingmat,
Siray bulag a kai makákit lwá ray barag-barag,
Balo ana sa kungkon a kai nin maayat.
(fin) nayadí

Sumublí sa tágay

DANSA (DARSA) MILAN

Sayti payti maidap a iragnepen (irangepuen),
No say peteg a adó ket kai ra nin asikaswen,
Sinyal (sinal) ta mapatnag ambó tin (ombotin) mantinkapen,
Nin mandaringan kon maslag a bituen.

O bantog a awro ra inabó mo pa kumon,
A subor ingangádo sa kungkon(konkon) mantangoy,
Sa taaw nin dusá alalakin daluyon,
Pigaw kai ko lumdeg iyabaten (yabaten) muko kumon.

Ibaritá mo pa no ani kai mo pangrabayan,
Ta silyan kon tampor main mon kaririktan,
Dapot tana kumon kai ko kading´eyan,
Sa saytin manapsen kon síkamoy pagsirbyan.

Ilalwan mon ilalwan tuyó (toyo) ran mata ko,
Ta sayti umbó bulá no kai tutuo,
Ta kasan kai magawá kunan sitin mundo,
Dapot kumon iyaburoy a saytin dawat ko.
(fin) nayadí

Nateng mi nan man´iliwen,
Karingasan mon mantaynipen,
Kai mamin a uliten,
A ririket sa pusó nitanem.

Nipatnag a kapalawayan,
Sa mundo sin síkay linumtaw,
Bituen kan sangkaslagan,
Sa mundo a kasan kiuribay.

Mantuekan raka nin bawburak,
Ispirito ka tan asosinas
Say banglo sa kumi paiismak (pay ismak),
A mamapas bereng mi tan irap.

Sarag mi nan pakisalamatan
Sa mundo sin síkay linumtaw
Bituen kan sangkaslagan,
Sa mundo a kasan kiuribay.
(fin) nayadí

Burakan múnan mariga,
Girasol (mirasol-sunflower) klabil (carnation) tan sampagita (native jasmin)
Hasmin liryos (Kas. Iris-Tag. lily) tan Alihandriya (type of rose)
Say banglo moy múna sa sarba.

Ay bukod mo, bukod mo, bukod mo, tan sulo
A man´uraramen ko urarammen ko sa yabi tan awro.

Si yabi nanganggawan dedlem,
Bukod linumoy (lino moy) man´ikapen,
Bilang kan sayay bituen,
Sa suri simpit mo tandaen (tan deen).

Ay kasayna,
Kasayna kasaynan raruma,
No umbo say síka,
Ay byay ko tan liwa-liwa.

No buklas ta síkay mimata,
Sa dudungawan a tampuren muyna,
Bilang kan sayay istrilya(estrella-bituen),
Maslag ka dyan sayay awrura (dawn).

Ay bukod mo,
Bukod mo, bukod mo tan sulo,
A man´uraramen ko,
Uraremen ko sa yabi tan awro.
(fin) nayadí

Kapada (kapara) mo nin peteg a nibusyag a burak,
A man´ikap-ikapen ra nin bawbituen sa leas,
Kai gapo sumawá a mata min mangikap,
Sa nikaistadó mo nin (inin) bilang mampamalikas (manpamalikas).

Kapada (kapara) mon peteg ay byay ko,
No mákit taka,
A sayay mutyá a malino,
A kasan dumá,
Sin síkay linumtaw sa mundo,
Liwa-liwa ka,
Glurya nan pusó tan kerep ko.

Pari kayna byay ko a tambar nin irap,
Lingayen mo paytin pusó a mantawag,
Sa yabi tan awro pitambay ko lawas,
A mablín litrato (ritrato) mo sa kungko nangayat.
(fin) nayadí

Sa kerep ko rinumsik a burak nin Heriko(geriko)
Malambot a palman marab-rab a liryo,
Imansanan rengen a saytin idarom ko,
A nisibwal nin ibeg adó a masyadó.

Sugatan yay pusó sa pilit kararabay,
A rinsawan mon burak kaalimbaway (kaalimbawaay) bulkan,
Say abig tan lenged mo tan andá mon mamastang,
No umimis kapa et karmá wangko byay.

Mataman wadí nisaad koy sayti,
A kai ko umibeg sa sabtan bawbayi,
Sin mákit takayna ririket koy alaki,
Say wangkon mangisip kakarmaan kuynayti,

Ta kai nin masundo masuyat kon itpel,
A kapipilit guston kai nin masamben,
Kanyá no sumukat rabay kon tandaen,
A dispusisyon mo no síkoy maabagey.
(fin) nayadí

Sumublí sa tágay

IBEG A KAI MASARITA

Náteng anan tyimpon pinala-palabas ko,
A man´umibeg yay pubrin pusó ko,
Kai ko makapangan ni makakálek gapo,
Páno kadí makana a gaw´en kon rimidyo.

Ay mundo aninan byat,
No wanti nan wanti lawas,
A pakaibeg na nin pusó kon kai ko maibalikas,
Sadag tana palayi a ipangikap-ikap,
Ririket nin mata ko sa kunan manilap-silap.

Si pusó ko byay lawas yan manpangirangep,
Alakin dyá- dyá tan dusá nin peteg,
Makáno kadí a udas a manepeg,
A ipangidarom kon alakin pakaibeg.

Ay mundo aninan byat ina (yna).
(fin) nayadí

Sumublí sa tágay

MURINA KARMIN

Sa sayay awron sangkakarmaan,
Nákit ko in a rupan sangkabistawan,
Tan sain a pispis a kasan kiuribay,
Bilang nin kuralis taaw.

Síkay karmá a kai pagdwadwaan (pagduaduauan),
A tinmubó sa makarmá a lugar,
A bilang liryos sa sangan rusal,
A kai malanes makánuman.

Kai ko tandá no magin kinautibo may pusó ko,
Sayti kai ko katarusan sayti kai ko kaunanipan,
No kai mo nin akuen sayan karaetan,
Ay say patiti magawá kon ipapalaway.

Síkay burak a man´apsen anayna (anay nay),
Síkay byay nan Bolinao,
No kai ka kaadap aninay bereng ko,
O mutyá ran mata ko.

Kádwan udet (odet) ta ingaren mo,
A pusó sa kumo man´ey-ey.
Say palaway muyna kumoy risibyen,
Nin sitin manpangádo anan náteng.
(fin) nayadí

Sa sayay bituen naparot sa mata,
Lino nay mabli sa pusó ko naiduma,
Puon ya nin ririket kasa nin kapada (kipada),
No udas nin yabina puon ya nin riga.

Adti kayna tikapen mutyá a malino,
Puon nin bereng pusó tan kerep ko,
Mapanemtem mo lí et kasi a adó ko kumo,
Sawanin sin isen kayna sa subor a malino.

Kunan sitin tyimpo narayo in a lugar,
Sa ray´ep nan yabin mandumalan-dalan,
Amog a masyadó maidap nin kumrang (komran),
Wanin pay kapada sa iliw a mantágan.

Kai para maiyayi a adó sa pusó ko,
No sumiplog yay siri pigaw maliwá-liwá (maliwa-liwa) ko,
Sa bereng a manirangepen ay naulilá yan peteg kumo,
Ay naulilá ya ay naulilá ya a pusó sa kumo.
(fin) nayadí

Palaway a naipuya a nami kungkon ilalo,
Bukod moy a naiduma sa babo nan mundo,
Aain a ringas mo sarba mampangrayo,
Naisuyó in tuma na a birtud sa kumo.

Umaburidoy kaisipan no síkay mapastang,
Papasen ko monti ta pigaw mabarang,
Pinauryan kuyna ta pigaw maribang,
Makaduká balé ta byay koy maranod a lamang.

Ribo may mákit a mapastang mata,
Kasa ta kain lamang makakipada,
Sa sain a ringas mo tan palaway a múna,
Ta bukod moy naod sa mata ko naiduma.

Naiyator kayna sa main kon kapusuan,
A pinalutó kuyna a iti sa kanakman,
Naisinyal ka sa pusó ko tan kawkaisipan,
A kai nin mapupos sa anggan makánuman.

Iningkanto may pusó kon kasan anggawan,
Naribang a isip naayat nin karingasan,
Dwin (duin) makamati a kaalimbawaan,
Tan matadem a punyal a kai ko nailagan.

Ginumunga yay adukon napurok ana nateng,
Sa nipakákit kon main mon tayongaring,
Rinumsik sa kerep kon kai gapo mabring,
Lalo sin matandaan koy ngaran mon puring.
(fin) nayadí

No síkay kadanyan pinabli kon byay,
Sarban aw´idap ko kai ko mankaaraman,
Sa animan a udas síkay manbantayan,
Nan pubrin pusó kon lipos kaberengan.

Mayin kadí byay kai mo tana malingay,
A man´ay-ay a pusó sa kumo mantágan,
Ta no bato kumon ket (kit) pilityan mamaymay,
Sa lwá a man´agos sa alaki nan kaidapan.

Ilingwis (ilinguis) mo payna byay a mata mon makarinyo,
A mamin palaway sa dedlem ka mainan ko,
Mataman isen tana no siin a rabay mo,
Dapot maabot akon sira palaway mata mo.

Makasadag ana byay no isen muko tana iyangga (yanga),
Palaway a ibi mo sa pusó kon mampagdusá (manpagdusá),
Inumibeg ako ket kai mo tandá a sansya (siansia),
Maong sawanin ta naipapalaway ana.
(fin) nayadí

Pusó koy lawas mansinek a mampagdusá yan peteg,
Nakem koy aburido kai makapangan kai makakálek,
Kerep koy pakimagrebinta tan say inanaway niseslet,
Sa yukib a kamínan (kamainan) ko aninan raet, aninan raet.

Aninay tepel [mainan kanakman] (2 bisis) mirwa
Sa lugar ko intin (inten) [sangkadedleman] (2 bisis) mirwa
Tib´ey nan pusó mo kai nin matunaw,
Bilang nin apoy, bilang nin apoy a kai kaseb-seban.

Nakem muyna kumoy mauman a lingesen (linguesen) muynay sayti kon pásar,
A manpangirangep nin dusá dyá-dyá tana lawas nayna (naynay),
Mata tana kumoy isilap mataman no kasaynan balikas,
Sadag kuynan glurya mataman wadí paklap.

Parina inadó ko [andí pagsentiran] (2 bisis) mirwa
Ta pusó koy leal [ani ket páselan] (2 bisis) mirwa
Pusó koy maririket tandá mo man a máran.
Ta say adó ko, Ta say adó koy kasan pangunguman.
(fin) nayadí

Isip tan karakar lawas mangkagutgot,
A mipane-panemtem sa karmá kon kabos,
Kawaen paynaytaw a lingis mo tan lugod,
Bigrá nímet mo tin´ed tan nigurot.

Samal naynan petég a adóko sa kuna,
Tinumper yaynan tuloy sa palson nutisya,
No isip-isipen tan uraramen a sarba,
Badánan a tamo ta síkoy nay nisyay na.

Tano síno kadí a kai nin makadlaw,
A main yayna sawanin a báyon nákitan,
Nipwira (nifuera-outside) nay lugod walnay(ualnay) nanguman,
Ta kai nakuyna rabay mapastang.

Man´ingel yay pusó sa yabi tan awro,
Mangkaguloy putinsyas limang a sentido,
Adó (aró) koy linamang a pinaila-ilalo,
Sinilyan (sinilia) nan samal sa kungko ipangilo.

Ta main lí a sansyan (siansian) gawá mon sangitan,
No mapanemtem mo lí a awron dinumalan,
Ta say adó ko sa kumo kai na kapadawnan (kapadaonan),
Sa adó na lí nin báyo mon nákitan.

Kasaynan rimidyo betang (buetang) kuynay mangitpel,
Ta say nalayuyna (ran off) ket duká anan kamaten,
Maabot mo man wadí umbo nin mateng,
Malayo yan lamang lí ta rumaw nan gagaw´en
(fin) nayadí

Sumublí sa tágay

MABULÁ A LWÁ

Sin balitok mo et a pubrin adó ko,
Mapait moy udas a kai ta pidungo,
Tepé kon patanid no main keen ko,
Síkoy ipatnugot nin abaw a lwá mo.

No míteng a awron kai ta nin míkit,
Manbilin kaynan main kan masakit,
Ket no rumaté ako ta síkoy masirep,
Iyadap mon duyo ta itaw sumangit.

Arakan takayna ta dapiney (dapuiney) lwá,
Tuloy pidte-pidten maimyas (maimias) mon babá.
Ula tan lugod mo kai nin matimpá,
Anggan sambawan koy puon nakabadá.

Awroy linumabas naribang a panaon,
Inso tan gayaga kayna nagnayon,
Adó tan lugod mo bigrá a napuotol,
Kasan nakabadá tan kasan nakap´on.

Ta bigrá anaytin nanguman kan uso,
Dumayna sa gindat a sarban kimey mo,
Pati say makuyep intaw matama mo,
Makasugat ana ipastang mo kungko.

Saytin a palayi kasilyan tan suklí,
Sa nipuskon adó nikamin kon lami,
Tan máget tan samba miunano kasublí,
Sa sínuman sa kunta kasan magbabawí.
(fin) nayadí

Ngalí-ngalí kabulaan no umaméngen ko,
A páselan moy piaduan suldong nin byay ko,
Say maong usisain mo sa dirin nakem(nake) mo,
Báyo mo ipulisay a adó ko sa puder mo.

No ituloy moy saytin kapapásel mo kungko,
Rabay muyna paray kikitey bangkay ko,
No baná sa kungko umbo ko et kumagusto (kungusto),
Ta apes ko kuomon et byay magsirbi sa kumo.

Mayin ket pulana ani nakap´unan,
A nagibwatan páselan mon kai mo rinabay,
Ay ustuyna (hustuyna) pusó ko itgen anay ay-ay,
Ustuyna adó ko ta kai rakayna rabay.

Makasidá sa tawon manpaglinkod,
A báyo-báyon ugalí mo sa matan makabisok,
Siraytaw a lami mon glurya kon nanglapos,
Sinilyan mo balé dyádyá a masurok.

Mayin ket pulana kayna para sumadag,
A gamet mon ipanusa no síkoy miabas,
Dyan síkay kumasel ana kaping´mat,
Ket mauray mo kungkoy nakem mon gindat.

Anyay sukat gaw´en no kai muyna mapalumo,
A nilawan a tib´ey a pangungurá mo kungko,
Sangkadawalan anamaet sa anggan-anggan ko,
A pasueten maynay kai marabay kumo.
(fin) nayadí

Maraet a karmá kai ko nailagan,
A nangyadí sa byay kon kai ko naaraman,
Inilalwan kuyna wadí a bilang kon kinan,
Ta bará kon magnayon a main tan piaduan.

Ay kai ko ilalwan a adó koy lamangen,
Sa nipákit mo kungkon maong a nakem,
Mayin kadí byay ko síkoy ulilawen,
Say nákit mon adó ko sain kumon a panemtemen.

Adti nay adó mon nipangakó tan samba,
A kasan magbabawí (magababaue) sa sínuman sa kunta,
Bukod makapanyay wamon nag´ustudya,
No márep tan masyay main tan inanawa.

Kawaen anay pangakó samba mo sin saytaw,
Inuringan moy lalaman mon kasan nakap´unan,
Ta mayin udet sawanin bigrá mon linamang,
A adó ko sa kumon kasan nangibwatan.

Mayin kadí (kare) inakó moy pubrin lalaman,
Anta kai pa dedketen tan kasan kakanaan,
Mabulá main a lwá a nipákit mo sin saytaw,
Niadap mo sa kungkon bilang inilalwan.

Salamat ana sa saytin ginawá mo,
No kai muyna mapanemtem a palson pangakó mo,
Sa yabi lí nin matinek no maisip-isip mo,
Sumager ka kasi o lwá mo lí a paturúnen mo.
(fin) nayadí

Sumublí sa tágay

MALAMANG A ADÓ

No isip-isipen koy adó mo sin saytaw,
Saytaw say lugod mo na kai nin (nakain) kapingmatan,
Mabitkel (magbitkel) ako kumon ket umbo katunungan,
Wanin man rabay kuyna dyan natin mangkabyay (mankabyay).

Ay aninan pait mangirangep kalamangan,
Say sam´it pangakó mo biig liningwanan,
Mapait dyan apro naraté piaduan,
Sa lamang mo pulana ta síkoy nay nisyay.

No umamengen koy kuntra sa katunungan,
Baná sa ginawá mo ibat sa kapubrian,
Uno main anan báyo ibat sa mayaman,
Gintang moy kadina tan seer piaduan.

Ani magawá no siti nay karmá ko,
Mangitpel ka lamang (laman) no maagwantawan mo,
Síkan pubrin panyó punasen moy lwá mo,
A umakribey ana baná sa idap mo.

Ayin pusuan kadí (kare) makatpel sa sayti,
No kai nin sumublí a piaduan a mabli,
Mangkabyay may adó no siulilan pirmi,
Kasa gapon anggawan no kai say patiti.

Mayin liningwanan moy pangakó mo kungko,
Umbo para intaw say wamo ket balitok muko,
No tandá ko kumon ket saytaw ngamin palso,
Masbalé na udet kumon naglat anay byay ko.
(fin) nayadí

Bilang akon mampireb-reb (manpireb-reb) sa lwá kon manturó.
No dale-dalepdepen koy pásar kon nangadó,
Say pagan kanakman tan seet kon naglinkod,
Siti nay nagunguna tan siti nay natubó.

Ta naisip-isip nayna layin kasa kuynan pangumanan,
Nin sam´it pangadó ko tan labi ko sin saytaw,
Tan nisamba napa et sa diri kon adapan,
Síno iyamay makasbwel wana say adó koy kai ko rabay isyay.

Pinaka-pakandá ko tana tan pinágetan koy linkod,
Ta gagaran kanakman koy nitanem sa pusó,
Kasay na udet ta bilang garaw naytaw tamó,
Kai nayna pinipigaw ta gagará nan isyay a adó.

Ta main anan ugalí nan bilang mampanguman,
Umadap ya sa duyo tan kai yayna gapo linumingay,
Ta itaw anay nakem na kunan báyo nan nákitan,
A lawas nan kalingi-lingi sa temben dudungawan.

Sayti payna ngámin a mampagbitkelan ko,
Ngali-ngali misyay a pusó sa kerep ko,
Nákit kon nanudulan kunan sayay pulano,
Ta rumawna(romaona) main gindat sa adó a sikrito.

Kanyá anaod pinabli-pabli kon byay,
Say inulit ko sa kumoy itanem sa kapusuan,
Ta no say pangangadó no isyay nayna bilang,
Isaad mo sa Dyos tan ikitabay moy byay.
(fin) nayadí

Ay Naning a byay ko no maimatunan ma,
A pubrin andoy (endoy) mon itin mampagdusá (manpagdusá),
Sa inudas-udas no mapanemtem taka,
Lwá koy umakrebey sa rwa ko nin mata.

Ay Naning a byay ko no síkoy maimatunan,
A pubrin andoy (endoy) mon ani áwit (aniauit) kaberengan.
Ta no wangkuynan dumungo no udas pangangan,
Tan wangkuynan manubo lwá kuynan kirngan.

Ay Naning kon inadó no mapanemtem ko,
A síkaynay umalis kumadayó sa dani ko,
Adayó ka man lí Naning dapot itambay muko,
Alaki naynan salamat pubrin andoy (endoy) mo.

Ta pánuyna lí kadí sayti kon pásar,
No mipatben a bigra sa balin ibwatan,
Tawagen takan sansya (siansia) sa bilang kaugalian,
Kasaynan sansya (siansia) umbat lí ta kai, kai nan byay.

Ta pánuyna lí kadí sayti kon kapapásar.
A lumalakon pirmi sa lawlangsangan,
Tumuró a sansyay (siansiay) lwá a kai kapukpukan,
Baná sa bereng ko sa main mon kalalakwan.

Iti kuyna itgen a sayti kon ula-ula,
Ula-ula ni ninong mo ay undo yapayna,
Áwit moy nay ririket ta say bereng ibayat ana,
Ta syay makaná sa tawon maulilá.
(fin) nayadí

Magunigoy inisip no adó a marintak,
Isangit ibereng sa pusó mangibwat,
Say iyatek (yatek) mata ko tan lwá kon barag-barag,
No isip-isipen koy saritá mon makasugat.

Ta adti nay pangakó adti nay pangawánan,
Salingsing tan iyamot (yamot) nag´in kalamangan,
But´ol may riking ko ibubor sa piaduan,
Kasa nin magawá no mapait a sumubray.

Ta no síno ket a tawo sa mundo marabay,
A kaririktanen ay patiti a kasan pangibwatan,
No síkoy tepeten (tepetan) mo ta síkay ubatan,
Akuen koy patiti no síkay pangibwatan.

Ta mabli payti adó no tawoy ustoy (hustoy) inisip,
Dusá tan patiti balatay nin a pilit,
Talugtog maialaki (may alaki) a maidaeg sa kerep,
Kasan kwinta kungko nakem ko et a maririket.

Iti muyna matarusan a adó tan labi ko.
Ta balitok kuyna ngámin a dusán ibi mo,
No sidaen moy piaduan ta umbo nangibwat kungko,
Salamat ko byay no sayti maabot mo,

Ta maidap anamaet mamaed sa tawo,
Ta gaw´en na lí a lamang ta sain a bisio (vice, bad habit),
Kasan badánan byay ko tan kasan seselen mo,
Ta inusawsa (inosa osa) kuyna ngamin a kaabigan kumo.
(fin) nayadí

Say peteg a piaduan,
Sin´er nin kaririktan,
Kasan makapanyay,
No umbo bukod kamatyan.

Ta kai madlaw sa endengan,
A hunor (honor) sa sansinakban,
No kai say panunukid,
Sa diri nin kakitratwan.

Kanyá asikaswen a maong,
Báyo ka nin manguyong,
Sa sam´it diskurson,
Ipanidá ra nin hunor (honor).

Ta sa mundo nagsikasadí,
Kanyá nepeg tamoy ma milí,
Nin adá a masudí,
Ta pigaw kasan babawí,
( fin parte) nayadí parti

1
Byay nan pusó ingaren tana,
No kasayna sa nakem mataman ana,
Say kumpliminto ibi tana,
Ta kai ko nin kaunanepan,
A adó koy bigrá nin isyay,
Ta kai ko kaunanepan,
A adó koy bigrá nin isyay.

2
Ay kakarmaan kon duká a rinumsik,
Iti tumaná sa parar ko nigurit,
Ayi naytaw kare a lugod kaiimis,
Dilá mon namalikas nangangawan sam´it,

3
Ay aninan kalamangan, ay!
Main mo nin kanakman, ay!
Dyos ko síko kumoy karwan, ay ay ay ay ay ay
Ta say adó koy nipulisay.

4
Adti kadí a kamínan (kamainan),
Dyos ko a paningkapan,
Síno ket a pangidaruman ko, ay!
Hisus ko síkoy ilaban, ay!
Ay andí muko paurayan, ay!
Sa adó ko intaw a nagámuran.

5
Ayin paraisoy mangkaribangan,
Ta say adó koy bigrá nin isyay,
Ayin glurya a mankaririktan,
Ayi naytaw kadí (kare) a kanakman,
Samba nin nagpangakuan,
Ayi naytaw kadí (kare) a kanakman,
Samba nin nagpangakuan.

sumublí sa 2 Parti
sumublí sa 3 Parti
sumublí sa 4 Parti

Aninay tib´ey tan tepel nan pusó mo,
Dinaeg nay patadem a kai gapo lumumo,
Ta bigrá mon nibantak a adá tan labi ko,
Nikwinta mon samal a peteg sa kumo makailo,

Ket balé kai ko sintiren sa dirin kanakman ko,
A nikasyay nin adó tan labi mo sa kungko,
Ket balé andí muko lí sisilen sa suyot a tyimpo,
Ta umbó man kungko nangibwat no kai nangibwat kumo.

Mistisa kapa tan maong a indengan,
Bilang bakas umbo nin malamang,
Kanyá ako nagmatalek sa andá kanakman,
Anta babayi ka main lipos kalamangan,

Kanyá sawanin dumará akuyna,
Mangádo sa maong a indengan tan maong a pustura,
Maong sira payna bungat kiupa taga pisa
Ta pubri sira man ket pirmi adóra
(fin) nayadí

A, ay byay kai ko katpelan,
A makai-kai nan bigrá sa pamamastang,
Ta bukod mon peteg a kasan ikarwa,
Niglot sa pusó sa anggayna nin angga.

Ta no tutuon peteg a pinabli muko,
Kasa kumon bereng a wantin naraté ko,
Ta say pangangádo ko kumo ay byay ko,
Kasa kan badánan ta manipatnag ko kumo.

Kasay nan tandá kon gaw´en ta rimidyo sa sayti,
Pilit a sansyay (siansyay) maraté a patiti,
A, ay byay ko rumiriket ka kasi,
No maimatunan muyti,

Ta say adó ko kumoy niláwan,
Kai ko sintiren a nisangitan,
Ta anroy a maityimpon (may tiempon) pamanemteman,
Mataynep muko lí sa yabin katinekan.

Sa akton yabin mataynep muko,
Kai mo lí katpelan tumuró a lwá mo,
No maurará moy kalamangan mo,
Sisilen mo lí a dirin kanakman mo.
(fin) nayadí

Sumublí sa tágay

KAIILIW

Say iliw ko kumo byay nan pusó ko,
Pitambay kon pirmi sa yabi tan awro,
Laluynay (laloy na oy) byay no mapanemtem ko,
A nipangakó mo inadó ko.

O malamang a pusó tan sangkatib´eyan a kanakman.
Kasan kumpliminto sa inadó mon masyay,
Ginagará mon peteg tan kai mo tana kinawánan,
A adó ko kumon naitelep (naitelip) sa lalaman

Inanaway márep,
Sa manirangepen kon mabyat a dusá sa babo nan mundo,
Nitumang mon peteg a kalamangan kungko,
Nitpel kuyna byay ta karmá ko,

Imatliken mo byay ta uliten ko,
Dispidida nan pubrin inadó mo,
Pusó koy mansangit patanid ako kumo,
Isilap moy mata ta síkoy patuyutan mo.

Patiti may pirat´anan sadag kuynan sansyan (siansian) liwa-liwa,
Ta karmáa kon sigpot a maglinkod sa dusá
Pusó mangumereng sa manirangepen kon dyá-dyá,
Samal a makamati sa kungkon peteg a nipakaná.
(fin) nayadí

Udas yaynaytin sangkabereng-berengan,
A saytin pisisyay a sangkapaitan,
Si pubrin pusó ko ngali-ngali matunaw
Sa sayti kon pubrin kalalakwan.

Say kalapusan nin saytin adó ko,
Nasilyan anaod bereng a masyado,
Páno kadí makana a gaw´en kon rimidyo,
A ipanimpa nin saytin bereng a masyado.

Risibyen muynay ultimon patanid,
Say dawat ko tana andí ka sumangit,
Ta sadag akuynan sukat mangirangep,
Saytin dyá-dyá pigaw kai nin lumed-led.

Siti na byay ko awron dispidida,
Udas a maréré ultimon píkit ta (pikita),
Ginurá muko man a ginlat sa mata,
Kai ko balé magawá a ilingwan taka.
(fin) nayadí

Nainkanto kan pusó sa saytin kakarmaan,
Nangibwat ana sin síkay mapastang,
Sa inudas odas síkay pitamitam,
Say sin´ek nanin pusó sa saytin kalalakwan.

Patanid akuyna sawanin kumo byay ko,
Andí tana papasen a saytin ula-ula ko,
Tumáganan (tamoga anan) tamo a inson nibi mo,
Ayidti ko man lí sansyan (siansian) tukiden ko.

Nanayungaring kan burak kunan sitin babali,
Inikap mata ko sa leg´an(lig-an) kon iti,
Dinaeg moy masitas a kai ko pinuti,
Say ringgas mo byay ta síkay pinabli,
Sumublí patanid kamina sawanin kumo byay ko.
(fin) nayadí

Ay umutya a niáwit palaway,
Palinged inawa ran (inauaran) tawon mangkabyay,
Ay undo anay wantin kapapásar,
Sa sudí linged mo kai tana nasinagan.

Pánon kai ko wanin dinlaw koy ugalí,
Kasa yan panglilingay tan kasa yan pamamabli,
Bará kuynan peteg saya kon masudí,
Anta payti tamo adó layin kano wadí.

Sawá ana kumon ta síkoy ipada,
Sa kunran pinabli mon mangasudí mo sa mata,
Nanglapusan ririket kuyna sa anggaynan angga.
Ta ikarwa nakan Dyos a pagsirbi ana.

Main et man wadí labi sa raruma,
Say adó mon diri kai nin (kain) sansya (siansia) kipada,
Ta bukod kuyna sa intiron pinarsa,
A namásek nin adó a kai nin ginimunga.

Mataman ana wadí márep tin ilalo,
Andí manguráram a síkay lingwanan ko,
Mataman kasan matagánan bungat anan adó mo,
Síkan lamang lawas a paglingkudan ko.

Márep maytin ilalo andí manguráram,
Sa sudí linged mo kai tana nasinagan,
Andí magdwá-dwáa ta síka lí a lamang,
A pagsirbyan anggan panabunan.
(fin) nayadí

Nangibwat sin síkay lumakwan inadó,
A nablag sa mata tan nikadayó,
Si linakwanan mo naulilan pusó,
Sa karsil (prison) nin dyá-dyá itaw ya nanabó.

Ta no maunor tamo a diri kon kanakman,
Kai ko itulok a síkay lumakwan,
Ta mamuda paraytin gawá a sabtan masyay,
Sa sayay inadó a kasuldong nin byay.

Nangibwat sin síkay patanid,
Kai et naupapweng (naopapueng) a nákit mon sangit,
Ta kasay nan kai ko pangiliwan sakit,
No kai say iliw ko sa kai ko mangkákit.

Priso yay pusó sa karsil nin dyá-dyá,
Ta kayayna na arawas sa daloy nin lwá,
Kayakap a bereng ta syay nag´in karmá,
Sa nikaulilan nalakwanan sa lwá.

Sa inin sain san (ininsainsan) no sumbang sa nakem,
A saytaw a ririket no síkay kadunguen,
Makalukso kuynan keen taka sinaen,
Ta say imismo byay koy potyen.

Ket ay no kasa ta kai kadtin lamang,
Ta taynep taw tamó a siplog kailiwan,
Nabaror yay pusó ko ta kayayna makalaban,
Sa manpangautibon bereng a kabakal.

Wanti tanay maraté (marati) sayti kon karmá,
Sa nikaulilan nalakwanan sa lwá,
Salamat inadó no kasa nin duká
Sa karigsawan mo Dyos a mangalilá.

Ta lalon salamat no andí ka manglingwan,
Sa nibi mon balon lwá kon abaw,
Ta kasan raruman mampangis´eran byay,
No kai say kai mo kungko pangilingwan.
(fin) nayadí

Mangkamatin akon bereng sa alakin kalawakan,
Makder a dudoy (adodui) adó koy nibarang,
Ta ginagará mon peteg sa pusó mo nipulisay,
Ta say pangangadó mo palson pangawánan.

No síkoy paberengen sadag akuyna udet ana,
Andí muyna lí gaw´en sa inadó mon raruma,
Ta pigaw bukod ko tanay mangirangep nin dusá,
Ta kasa kon lamang kakanaan sa rwa mo nin mata.

Ípos muyna ay (oy) byay a sarba nin kalamangan
Mintras mangkabyay ako et a pamaingaran,
Ta say mabyat ko nin dusá sa pusó managwantawan,
Tasay pangangadó mo palson pangawánan.

Ta patnagan taka kumon a adó a kuntra kumo,
A pamanemteman sa saytin ginawá mo,
Ket kai ko balé magawá a mamabereng tawo,
Nanglalo pa et no sabtan inadó ko.
(fin) nayadí

Say ringgas nan langit tan palaway nan awro,
A mampamin birtudis tan grasya sa tawo,
Aguhon (agojon) tan mapa a mampangunuran(manpangonoran) ko,
A mampangidaruman irap bereng sa pusó ko.

Sa gayága tan lino nan awron linumwá,
Mata koy naklep napulag nin sirá,
Sayti kapada ko no ipag´alimbawá,
Sa ringas mon nibantog a namin dyá-dyá.

Alakin dyá-dyá a naraté nin laman,
Sa mugá a inawá bilan ginágetan,
Inilalwan kuyna wadí (uare) a bilang kuynan kinan,
Ta bará kon magnayon a nibi mon inum´ay.

Aninan idap (irap) mangirangep sayti,
Martiryon masurok bitkel nin patiti,
Kunsiderawen mo pa sa nake mon diri,
Maong kasinakem mo(kasi anakemo) no magawá kan wanti,

Ta say irap tan dusá kai kuyna kumaya,
Sa maningel a pusó a napadyá-dyá,
Kasa nin raroman rimidyon kumana,
No kai say pangabagey tan diri mon ampaya.

Sadag yaynayti byay ultimon maabot ko,
Kansyon ya maytin bilang nipag´ula-ula ko,
Tan rupan aligryan nipákit ko kumo,
Say idap nan pusó inmalep´ep sa but´ol ko.
(fin) nayadí

Mati kuynan isipen,
A ginawá ran makapabereng,
Mayin adó koy akuen,
No kain lamang kawánanen.

Masudí yan gindat,
Síno ya ket (yakit) balé,
Itya payna bungat,
Aninay tepel na,
Ay-ay talaga,
Kasa yan pangawánan,
Uryan mayna bungat,
O ket kai ko balé tumgen,
No kai kuyti kuna maibalikas.

Maririket yaynan tuloy bará na (barana) tumana,
Maong a nakem kon kidungo sa kuna,
Ket kai na balé tandá no páno,
Sa tyimpon raruma.

Sin tyimpon maririket ya,
Say adó nay kasan kipada,
Aburidoy kanakman na,
No kai nako mákit nin mata.

Báyo na linamang,
Náteng paraynain,
Umbó et pa nin náteng,
Mayin edet wanin,
Ay-ay talaga,
Kasa yan pangawánan,
Uryan mayna bungat,
O ket kai ko balé tumgen,
Anggan kai kuyti maibalikas.

Bigrá yayna sawanin a kai mangasikaso,
Ibat palayi ta nakákit yaynan báyo,
Ket say wangko balé,
Ta anro et maityimpo (may tiempo).
(fin) nayadí

Mangkálek (mang kalik) may pubri kon lalaman
Nakem koy pirmin mangkapukaw,
Sa adó ko kumuynan nilawan,
Báyo sawanin rabay muynan isyay.

Bará kon peteg saytaw tutuo,
Samba mon máget sin sítay nidungo,
Ta nisamba mo pa et sa babon kerep ko,
Toloy mo nikayat (nikaiat) sa babon suso ko,
Sayti Naning nepeg a sangitan,
Ta kai namaet ti nipadalan sa garaw,
Say bigat ngipen mo sa anggan makánuman,
Daeg dyan sayay nipanutaryuwan (nipanotariouan).

Báyo kumon magawá a sarban sayti,
Dale-dalepdepen mo sa nake mon diri,
Báyo kumon masidá a nakem kon mapirdi,
Sa babalin Bolinao no síkuynay makai (maka-y).
(fin) nayadí

Talin tawon maslag orengas ni Pibo (fevo),
Mutyá a nibantog sa lapag nan mundo,
Byay ko tan gayága inawa tan inso,
Si múnan karmaen a maaripen mo.

Ayidti sa mundo a mangkálek a pusó,
A kai mapukaw sa ibeg pangangadó,
Ni say (nisay) pasak ya et pilit yan mapikló,
No sain a ringgas ket mabatak yan adó.

Yasot man o ribo a pusó sa kerep mo,
Pipísawen ako a nin (akoan) tukduan ayi mo,
Wá sa barang kibo (talk) ket matarusan mo,
A ibeg nan sayay nabaror ringgas mo.

Náteng anan tyimpon pinalinak sa pusó,
A matuan ibeg ket kai nin lumutó,
Ta kai malem-lem sa lulem nin adó,
Ta múnay ding´ey kon mampangikadayó.

Erpen pay ibeg ket kai nin maitpel,
A em-eman tana pukuken sa nakem,
Ket kai nin magawá ta byay koy ranuden,
Kanyá (kana) man´iay-ay(man yay ay) ta kuntray magbitkel.

Paed´en a ibeg sa abaw a sangit,
Andí em-eman ta ipatin pilit,
No kasa kan karmá ket bangkay kan mákit,
Maong dyan mabyay kan kai mampilangit.
(fin) nayadí

Say surí (sore) mo tan karingas, síno byay,
A lawas kon mampagmatyan síka tanay,
Rimulinoy (remollenoy-whirlpool, eddy) kaisipan lawas tana,
Pusó koy nadedleman.

Bukod mo tamó ay byay ko,
A man´ikapen rway mata ko,
Kanyá (kana) andí isiblet mo,
Say surí (sure) karinggasan mo,

Nangibwat ana sin saytaw sin síkay,
Masilap matan midmang síka tanay,
Rimulinoy (remollenoy) kaisipan lawas tanan,
Sa matan nadedleman.

Pánoy na kadí maraté na,
No si pusó koy naulila,
Patiti sansyay (siansyay) maraté na,
No kai kayna mákit mata.
(fin) nayadí

Naning a inadó andí muyna panemtemen,
A main tan piaduan sa tyimpoy nan náteng,
Ta si inadó kon báyo pirmin pipanemtem,
Niglot sa pusó kon kai ko rabay syayen (siaien).

Kasan seselen mo ta síkay nangibwatan,
Sa kaanruwan (kaanroan) tyimpon sítay niaduan,
Kai moy namaet maitpel no síkay konsihuan (consejo-advice),
No aduen takamon rwa kai mukoy namaet aburuyan.

Andí mo sintiren a kai ko kaaayi kumo,
No makapidungo ta wadí a kai ko kiirgo,
Ta kai kuyna sidaen a adó kon nirigalo,
Etpel muynan sansya (siansia) ta siin a gusto mo.

Wanin man wadí no katpelan,
A say awit mon bereng no kaagwantawan,
Ta main lí a sansyan (siasian) tyimpon udas a sawaan,
Ta kasa kanon bulong kayo(kaio) a kai rumagrag sa tangkay.
(fin) nayadí

Maidap anay tumper sa saritá a nilawan,
Say politikan adó kai mar´eb tan kai katarusan,
Mapdá kan ilalo tan karingon sangkasam´itan,
No siplugen yaynan babawí abaw anay rumsan badánan.

Ta bigra ana lí kai na kayna tunuyan,
Pásel yaynan kapingmat kano wadí síkay nangibwatan,
Anta gagará nan paninidá sa sam´it piaduan,
Kai mo madlaw a gawá sa pino nan padalan.

Lalo no mibaná sa akton isin yay inadó na,
Bilang kaynan samal a pastangen mata na,
Abaw anay kasalanan a rumsa a ibaritá na,
Matyay nan magrimi-rimidyon sa maong a padalan na.

Say sikriton adó no pagdwádwawan(pagduaduauan) kai mo katarusan,
Idyawan mo maong ta sa lí kasa yan pihon (fijo-sfixed, set) pid´enan,
Ipati mo man a adó mo kaiya(kaia) nin kidamay,
Ta itaw anay nakem na kunan báyon nan nákitan.
(fin) nayadí

Naning a inadó andí nin kaberengan,
Ta nakem taynamaet a rwa báyo ko inuray,
Pulitika layí wangko pa et sa kumo intaw,
Ket andí ka mami ni wamo iyator sa kanakman.

Tandá koy naod ta main atan nag´irguwan,
Main atan pangakó tan main atan sinambawan,
Bukod tamo naod (od) patiti sa kunta mamisyay,
Ket dinawat ko balé kumo síkoy inaburuyan.

Kai ko inuray tan kai taka linamang,
Nipagketan tan rwa tan nimaan kanakman,
Ta kai koy naod rumeré main tan piaduan,
Sugsugen muko pa et anta maiyomani (mayomani) kanakman.

Kanyá Naning etpel muyna yapo,
No kai taka malabi tan kai taka maasikaso,
Ta kai kuyna sidaen a adó kon nirigalo,
Kunan siin a babayin samal sa mata mo.

Maidap kuynan pasublien a saritá a nilawan,
Kai kuyna rabay sidaen a adó kuyna kunan,
Ta bilang sa masitas (flowerpot) o bungat anan tanaman,
Kasa nin kaabig no kai anggaway kamatyan.

Andá man Naning ta kai taka pauryan,
Sarban mawmákan tan bungat anan animan,
Sa udas matkap mo a pubri tan lalaman,
Iti ko sa dani mon lawas kaantabay.
(fin) nayadí

Byay ko tan liwa-liwa,
Palaway rwa ko nin mata,
Say bereng etpel ana,
Sawanin uliten ko pa.

Sawanin ko kumo ulíten,
A reré sa pinanemtem,
Say man´áwiten kon bereng,
Ket kai mo tana nin asikaswen.

Daeg a sayay martiryo,
A naraté nin saytin pásar ko,
A mampiáwit nin turminto,
Sa kai mo pangasikaso.

Kai mo tana inundó,
A kasasangit na nin pusó,
Mataman síkay adayó
Ilíwen kan pangangadó.
(fin) nayadí

Mansangit ako Naning sa yabi tan awro,
Baná sa saytin nangyadí sa pubrin pásar ko,
Anta kasan nangibwatan kapingmat ginurá mo,
Páno kuyna sawanin a mipane-panemtem kumo.

Kasa tana para gapon ingangadó mo kungko,
A sukat nin tubalé sa saytaw a linkod ko,
Dawat ko pa tana edet (udet) a ultimo kumo,
Mag´irgo ta tana edet no wadí ta aburuyan mo.

Panemtemen mo Naning a sayay masitas ta,
A napatubó ta sa sayay lagwirta (laguerta),
Simbwan (simbo-an) tayan ririket inson naiduma
Dayá naya nin pusó a pinabungat ta (pinabongata).

Bará mo para Naning kasan rinanod mo,
Sa sain a dusá a ginawá mo kungko,
Main lí sansyan (siansian) sumbang sa nakem mo,
Babawí mo lí a sansya (siansia) no mákit may inulilá mo.

Umbo para Naning ginlat ay kalímuwan,
Ta pinágetan tay nakem a kasan babawínan,
Ani balé a nangyadí sa main tan piaduan,
Nasugsug rakayna ket maong a manglawan.

Maikánem a taon ana a sítay miaduan,
Kasa kan masaritá bungat anan pisublangan,
Báyu-bayoy nayti sawanin a kai muko tunuyan,
Ket kai ko tandá lí no ani main tan pirat´anan.
(fin) nayadí

O Langit a mapaingangadó,
Aninan idap a manirangepen ko,
Ta si inadú-adó a pinabli-pabli ko,
Naparot ya ket bukod kon mansangit,
A kasan mangabagey tana gapo.

Nangibwat ana sin síkay masyay,
A nablag sa mata kon midmang,
Say kasisin´ek kai kuyna kakayaan,
Ta bukod mon peteg a pinabli-pabli,
Kon kawa-kawánan.

Adti kadí Dyos ko a kamainan,
A keen ko sawanin paningkapan,
Pigaw síko kumoy kainawnan,
Saytaw adó a nagámuran.

Kikiten mo kadí a laman kon nipasag,
Ibat sa duksa kungkon nibansag.
Anta síkay liwaliwa ko lawas,
Binyan mukon idap a mabyat.

Sumublí sa tágay

INADÓ ITI KO

A kalabi-labi ko,
A kalaktip nin kararwa ko,
Pakadani ka ta tambayan mo ko.
Ta say iliw kuynan tuloy a masyado.

Linabi andí nin kaberengan,
A sayti ko nin kalalakwan,
Naning barámo tumana,
Ta say adó ko kumoy ilíngwan.

No say adó tan labin nisaadan,
Andí mo kumon kagulwan,
Tan eget nisnaan kanakman,
Sa kerep ko síkay niruran.

Pari kaynan liwa-liwa,
Ta kerep tay miabrasa,
Sa iliw kon nateng ana,
Say lata masyadoy na,
(fin) nayadí

Mutyá mata kon mankawánanen,
Mula sa pusó malned a hasmin,
Bistan ringgas moy kailiw ko Naning (nining),
Sa awro tan yabi síkoy nameneng,

Pipanemtem koy adó ko kumo,
Kai ko ikakálek suldong nin byay ko,
Mayin uryan koy adó ko kumo,
Anta niglot ko sa pusó ko.

Uryan mo, uryan mo suldong nin byay ko,
Kai muynan lamang pinabli adó ko,
Bará kon tutuoy pangakó mo kungko,
Báyo síkaynay manpagmatyan ko.

Sa gamet ni Pulana nákit takayna,
Leg´an kon manimatunay piadó antan rwa,
Kai muyna inisip nikalnged a dyusa,
Andá sin saytaw a piadó anta.
(fin) nayadí

Náteng ana panaon byay ko,
A inibgan nakan pusó ko,
Sitaw anay nangibwatan Pivo,
A nipangadó ko sa kumo.

Ay mundo anina nin byat,
No wanti nan wanti na lawas,
No síkoy mangadó a kapingmat,
Maraté koy wanti nin irap.

Ayin pusuan byay ko,
Makatpel sa ginawá mo,
Anta say adó kumo,
Sa pusó kerep niglot ko.

Síkoy manpangirangep,
Sa dusan nibi mon peteg,
Pusó koy lawas mansin´ek
Pakimagrebentay kerep.

Nakem koy napakapuyan,
Sa dusan nibi mo ay byay,
No kai muyna unduen bilang,
Iká min muynay kalamangan.

Akuen kuynay dusan nibi mo,
No ani balé a ginurá mo,
No kasa wangko ket pamainen mo,
Inagwan (inaguan) tawan ko ngamin byay ko.

Ay byay ani ket nakap´unan,
A bigra kayna kungkon kisyay,
Kasan tandá kon kasalanan,
A sa kungko nanguránan.

Ay liwa-liwa ani ay (anyay) magawá,
No kai muyna unduen karmá,
Ay, ay, ay, Nining patanid akuyna sa ringgas mo, sa ringas mo
No kai muynan lamang akuen a adó ko, a adó, a adó ko, adó ko kumo, ay, ay, ay.
(fin) nayadí

Bereng sa pusó tan kerep ,
Sa awro tan yabi lawas maisesgep,
Sa pásar ko inti,
Makaundo-undo anan peteg.

Pánuyna lí kasi no siti nay patiti,
A sangkapatnagan no isipen pánuyna lí kasi,
Kai muyna liningay ta say wamo layi,
Ibat ta pubri ko kanyá kasa kan pamamabli.

Magin nímet mo parayna,
A pangakó mo kungkon istudya,
No say síko balé
Kai ko kalingwanan sa anggan-angga.

Sawanin pa balé isip-isipen mo,
Maong lí ti kasi a sarban sayti ginwá mo ay byay,
Inakó moy adó kinaririktan mo,
Bigra liningwanan tan kasa kaynan pangasikaso.
(fin) nayadí

Nangalilá akon manok a kinawa-kawánan,
Indeng (inding) anay mabista tan maong et a sinyal,
Inumbak kuya ta maong ya nin kibulang,
Kurinay bakri bakit lupad nay atagay.

Say pangangapros ko buklas tan yabina,
Linmulog anay sabot tan múdit anay paa,
Say pangikurad ko angga sa dap-dap yayna,
Batak kaynan pagitaurong (pagui ta orong) sulong ya.

Say bayaninay kasa gapon badánan,
Tano tumuká ya malabkas a tutulyan,
Makaduké bale sin largay nay bulang,
Nalayo yan kapingmat anta kai a nasugatan,

Kasa sa nakem ko a si manok koy tumalaw,
Ta naparmaw ya sa laban angga sa pukpukan,
Nibantog yayna pa et iti sa babalin Bolinao,
Kai nayna pinanemtem a main kon pangawánan.

A bagay anaytin manok umbó yan pupustawan,
Páno ket main yan salingsing sa taginis a midmang,
Maimpis a rupa tan ararem a kulanlan,
Kai ko gapo tumper ta maong yan kibulang.

Ibulos takaynan manok a kai ka postawan,
Mako kayna bungat sa ayi man a lugar,
Mabutbot yamay tuktok mo no kibulang kan pukpukan,
Síko lí a mapanemtem mo no palong moy maludisan.

Ípos may main kon pangumpuni,
Ta naparmawan muynan kai nin kipati,
Mapagal ako tamó kasan lamang sirbi,
Ta say adó ko main ket iká mo isili-sili.

Alimbawá yayti tamo si manok a ibubulang,
Mataros yaynan tawo no main yan kalamangan,
Pag´irgo na tamó bilang kasan kasalanan,
Siin pay kapada na mabayanin matalaw (matalao).
(fin) nayadí

Wanti payti main a nabaran mansakyan,
Kapaday nabaran máget a piaduan,
Niguroy kuyan maong ta pigaw syay yum´an,
Mabyat yayna udet anta kai a nabarbar.

Sitin baluto ko sin kai ko yaet naitangkar,
Matunong yan dumaras mataman kai a nabarbar,
Ket dinlaw ko sawanin ta mabyat yaynan kapingapan,
Bulon maibirá-birá (may bira bira) maidap yaynan ulínan.

Say balutoy nan náteng no mangkawánanen mo,
Matunong yayna kumon ta syay mangkaalinya,
Bilang sa agamiren mo no mangkawánanen ma,
Matunong yan gágetan a kasan suknad na.

Sin syaynay isaki syaynay wari-wari,
Masernat yaynan dumaras ta mamilí yaynan siri,
Dinlaw ko sawanin anta linayagan kuyan mabli,
Taker nay mairot sa andá nipangumpuni.
(fin) nayadí

Sayay kapaitan a nanagyat nin bereng,
Baná sa pirlas lawas manikap-ikapen
Milalo kuyna wari (uare) sa simpit mo tan deen,
Anta kai ma intaw irap a parat´en.

Liwawen koy iliw kasaynan magawá,
Adti may keen (kaen) ko kasan makatimpá,
Undo ana layi naraté nin karmá
Say kasan kasalanan pinadyá-dyá

Ay siray naytaw a gayaga nin adó,
Lawas pitamitam síka maiadayó,
Nagbaliw sawanin lwá a manturó,
Nin sitin ginurá a makaundu-undo.

Ani ay sukat gaw´en no sayti kaririktan,
Bukod koy irap ta ikumoy inum´ay,
Mayin ket balé síkoy pinatnagan,
Kaabigan nakem mo babawínen mon lamang.
tarlak (fin) nayadí memortes

Naulilan pusó putong moy kaberengan,
Signos ko tumanay kai ko kailagan,
Nasyay sa inadó tan kai rayna kawánan,
Etpel anan sansya (siansia) ta sain a kakarmaan.

Aninay idap manpangagantan bereng,
Lwá koy man´agos kasa gapon tegen,
Bukod mo O byay ko a makapamarigan nakem,
Ta angga sawanin ket síkay pipanemtem.

Aninan sudí mo inadó sa kawkaisipan,
Anta gura mo kuyna riga taka et a lamang,
Kanyá uraramen mo payti sa yabin katinekan,
A nipangakó ko sa kumon kai ko gapo minanihawan.

Guránen muko man ket kai taka liningwanan,
Pagsirbyan kan sansya (siansia) sa leg´an kon mabyay,
Ta kai kuyna mangadó sa raruman kaririktan,
Salí maraté kuyna et lí pait kalamangan.

Sadag kai na inadó sa kungko namasangit,
Teplan kuynay dyá-dyá tan nibi mon sakit,
No kai muyna mababawí etpel kuynan pilit,
Sa nipangurá mo kungko síkoy nay umalis.

Mako kuyna inadó síkay patanidan,
Sa raruman lugar anay piikapan,
Ta pigaw kai ka umaburido sa kungko mamastang,
Ta samal mukuynan tuloy lalo sa kakisidan.
(fin) nayadí

Ay inadó kon peteg ay palaway (Samba),
Say nisaad tan rwa a sítay miaduan,
Bukod patiti sa kunta mamisyay,
Wanin a sambata umbó para intaw,

Báyo sawanin say mankadlaw kuyna kumo,
Ta mangkabawásan anay ngalí-ngalí mo kungko,
Sayti paraytaw a eget pangakó mo,
A say pákitan mukon makasidá nakem ko.

Ay isipen mo kadí ay palaway,
A lwá tan pinaturó nipambó piaduan,
Tan say nipamáget andá kanakman,
Kanyá andí pakuyong sa sínuman.

No kai mo isublí a sam´it asikaso mo,
A bilang gindat sin adó ta et a báyo,
Mamper ka byay a inadó-adó ko,
Ta kai gapo mauman a sayti bereng ko,

Tandá kon peteg a main atan nag´irgwan,
Main atan pangakó tan main atan sinambawan,
Bukod tamo od say patiti sa kunta mamisyay,
Ket nangibwat balé kumo a síkoy nay pinuryan.

Dinlaw kuyna kumo nangibwat sin inin,
No síkay main sakit síkoy ibibilin,
Báyu-bayuyna kasayna gapon sain,
Ta manumilag kayna kungko sawanin.

Báyo tikapen moy kumpliminto mo kungko,
Tan wamon kai ko pakuyon sa sínoman a tawo,
Sarban sain bilang manpaúnawan muko,
Ta nayadí ra kai na et pinasamba anggan ko.

Kai ko ilalwan wangko a adó moy isyay,
Say ringgas rupa mo sin síkay man´ay-ay,
Inakó kon maruros anta payti kalamangan,
Nairebreb akon peteg sa ranom a sanlukan.

Sayti na palayi taw a nipangakó mon samba,
Sa anggan panabunan magnayoy adó ta,
Madtan bulkan saytaw peteg a kapada,
A adó mo kungko bilang inilalwan kuyna.

Salamat ana sa saytin ginawá mo,
Andí raka tana kumon lamangen no sínoy mapunta mo,
Sa suyot a tyimpo no wadí síkoy maitambay mo,
Lwa' mo lí a tumuró sa kalamangan a tubalé mo.
(fin) nayadí

Mangisip kan laman mintras main et lugar,
Kiadó kilabi sa tawon síno yaka man,
Ta magbabawí ka man lí no nipaláwan,
Idap may maraté pilit mon agwantawan.

Kanyá kumon pinabli-pablin busat ko
Andí muyna iruros ta síkoy kaduan mo,
Panemtemen mo kadí sa suyot a awro,
Ta maguloy inisip mitagem say nakem ko.

Akuen takan lamang umbó sa kai,
Ta bukod mo tamó a nangipapalaway iti,
Sa sain mo apes tan say pagsisirbi,
Say wangko sa nakem ko ta maong ana layi.

Andá man ta main ako et matua,
Kasan bilang anamaet ibaritá mo kunra,
Ta pigaw anamaet adayó a sesel ra,
Tan kasan lalaman kon wanti no umbo sira.
(fin) nayadí

No magduadua ka busat andí muyna iruros,
A kiadó sa kungko no umbo lamang masibulot,
Ta sa lisí kai maranod ko sa karmá kon kabos,
Ket kawaen payna lí a lwá mon mapaagos.

Kanyá kumon busat nake moy ibabawí,
Sa sam´it saritá ket maubliga ka lí,
Main layin mantagánan mo a taga paniki,
Kanyá say saritá mo rumabay kan kai.

No ipatutuo mo bueat ipabukod kungko,
A kai pagdwá-dwawan a síkoy kiaduan mo,
Ta báyo ko lí mulí sa poon kunran matua mo,
A byan mukon kákitan mangibwat sa bebey mo.

Say kaalimbawaan mo sayay sasakyan,
A manpamabulon ket kasan tandá puntawan,
Wanin a pakatataros (pakataturos) ko sa main mon pásar,
Kanyá dawaten ko kumoy main kon kágetan
(fin) nayadí

No uraremen koy nikapásar balasang,
Kapaday iyabat sa tawo manpibarang,
Sa peres nin sirin manpakianuran,
Riga may bereng a pakapisapdaan.

Ta say tinay kasabyan say pangakó a máget,
Say kaririktanen moy lawas ran pitaynep,
Tepren muyna lí a pangakó bará moy na lí no peteg,
Maubliga yaynay pusó sa kunran manapes.

Say awron linumabas no pane-panemtemen,
Ginumurak dyá-dyá ginumungan bereng,
Kapadan piaduan no rabay raynan getangen,
Say (si) palaway nan awro ibaritá ray dedlem.

Kanyá kawkulan sa tawo nepeg imatunan,
A manlalakon taon ta siti nay kasabyan,
Pubri yamay pusó no syay mapangawa na,
Iwaksil mo in a riga ta adani kunay samal.
(fin) nayadí

Sumublí sa tágay

MALAMANG
(Anak a kai nanukid saritá matua)

Pusó koy mansangit ya lawas,
Lwá koy pirmin barag-barag,
Kerep koy ngalí-ngalí mawatak,
Satib´ey pusó nan kai ko nin maayat.

Pusó nay ginumalayang,
Nakem kai mabring mauman,
Balitok nay saritá ran iningar,
Ta say saritá ko kasan kakanaan.

Kawaen paynaytaw a nipangalu-galó ko,
Rinambaran anos iti et ko sa yabi tan awro,
Say wali-wali nan pusó kai iningar gapo,
Inuray nay nakem inunor nay gusto.

Sa yabin katinek-tinekan,
Tan yabin kainle-inlékan,
Sa pangangadó ko syay tinepetan,
Say wanan inumbat kasa et sa kanakman.

Milalo ko a saytaw nan saritá
A ubat na kungkon pinasyay andá
Say nakem koy bilang nin natimpá
Anta payti main saytaw ket bulá.

Kawaen paynaytaw anipangalu-galo ko. Ira

Kaiko kumon sintiren a sain a nikagawá
Ta kai naod kalukdangay gurit karmá,
Bukod sintiren ko a man´ituró lwá
Ta say saritá ko kasa gapon alaga.

Anak ko patanid kamina,
Ta si Dyos a makauray ana,
Ta sikami paibarang ana,
Tan andí kami nalí sabtan matua.

Kawaen paynaytaw anipangalu-galo ko. Ira

Si anak a kasan pangawánan,
Sa matuan ibwatan lalaman,
Adayo a ngamin a sarban kaririktan,
No kai say pangingirangep alakin kaidapan.
(fin) nayadí

Makaundo-undo a naraté nin karmá,
Say abig tan ilalo nisyay ray nan bigrá,
Kasa pan tandá kon gawá kon masalá,
Kai nayna liningay ta say gusto ray sinumawá.

Anina layi tib´ey kanakman na,
Ginawá nay wanti kasa yan pamaalaga,
Mataman kumon itpel kuynan sansya (siansia),
Dapot padalanen tana sa maong a pagistudya.

Tepé ko yan mákit syay imánuwen (imanuen),
Ikali-kaliw ana kai nako asikaswen,
Bang say síko balé ta ani ay (anyay) sukat gaw´en,
No kai sadag tanay lwá sa matay paturúnen.

Daité tamó sadag naynan kasagran,
Aninay sinep na sa tepé nakon mapastang,
Kai na nin kipara sin kaintran piaduan,
Aburidoy nakem na no kai nako mapastang.
(fin) nayadí

Say wamo palayi nalingwanan kuynaytaw,
Si papanemtem ko sa yabin kainlekan,
Say lwá kon manturó syay inidaan,
Say inulunan koy kadukaan kanakman.

Kai muyna inisip kai muyna kinaduan,
A dawat ko kumon kai mo inaburuyan,
No síka wadí a main ka nin inibgan,
Duká sansyay (siansyay) nakem mo no kai ka pagustuwan.

Nangibwat sin saytaw kai na mapitinek,
Guloy pangingisip kai nin makakálek,
Bawien mo pa byay andí pa nin isiblet,
Tawá nin masambot a inanay manpirep.

Kai moy na inisip kai muyna kinawánan,
Dinmaloy sa lutá alwá kon barayabay,
Iburwang mo pabyay daité adó dungawan,
Ta síkoy kikiten mon pubrin kaurarwan.
(fin) nayadí

Ay O mutyá a mangkawánanen kon nay-nay,
Rayat kan ingangadó tan subor kan manbukal,
Say ray´ep pangingisip mon lawas mankasbuan,
Wangkon kai ka malingo tan kai ka mibarang.

Nalingo kai na sa kábawan mangkapastang mo,
Ta kai muyna tandá a saytaw tan pidungo,
Sa bubon ni baying (bayen) Anson (anson) abaw nakákit a tawo,
Udas kabubuklas tan awron linggo

No kawkulanen mo siray nakaimaton kunta,
Sa samyong ririket a manpag´irgo anta,
Si bapá Sutiro tan si Huis et a saya,
Tan Sikritaryo nan Presidinti tan si dadá Huwana.

Sirayti nakaimaton a nakaingar,
Magawá ta siran tawagen ta iti sira et sa byay,
Awron linggo abaw siray lumabas mako sa bulang,
Kanyá andí mo ibudí ta talaga kon ipapalaway.

No itainger kuyti a sayti tan piaduan,
Sa kunran matua mo a kai kuyti ipapalaway,
Ani rabay mon saritánen kalapen sa kadedleman,
Kai magawá kungko ta umbó kon rumaw.

Luray kon inadó sin síkoy pinaiyanak,
Bayo ko linumwá dinawat kuynan gindat,
Say trato ko sa kapada kon tawo mataman mawatak,
Kai ko anunuran anggan byay koy mautas.
(fin) nayadí

Main sayay Pulana bigrá kuyan tinay´nep,
Mabista yan pagé ta sinmayandok (simmayandok) a pedek,
Main tádong na sa pispis kinamuduyan madidintek,
Kasisiaway kalaki ana kinmantunis yan mabiskeg.

Si odtin taynep ko bilang yan tutuo,
Ta bilang kuyan napastang kunan sitin kampo,
Ni apakhe nay alipugo mata nay makarino,
Ni bisti yan sedapondie ningipen yan samporado.

Bang say kapapásar na bilang kai na mati,
Nipulbos yan santal tan binabuan kulor iti,
Nisingsing yan binatuan malnged a brilyanti,
Mata nay imis-imisan tan kumpliminto nay alaki.

Say kapada-pada nay kuralis sa taaw,
Kai gapo malanes burak yan anghilikal,
Nibugnuan mapalaway malnged kabon lalakaw,
Naipunya anaod ngámin sa mainan lalaman.

Bang si ulo nay manpangidya-kidyap,
Ta napátikan anaod diamanti tan perlas,
Say kanarang nan yabi tan bawbituen sa leas,
Kasa nin pidumawan kapadan mapatnag.

Ibat sa ririket ko syay kinadanyan,
Man´apru-aprusen koy dimlog nan lalaman,
Tuloy ko kinayat babá nan makapainsay,
Anta si kinayat ko main si diri kon ulunan
(fin) nayadí

Tutuoy naod ta main akon estado,
Main akon asawan mansaritánen mo,
Si asawa koy naod a main gusto kumo,
Sumangit yaynaod a kai ko mako kiirgo.

Tano sínon pusó a kai nin kumo tana (kumutana),
A kai nin umay-ay sa mangkaririktan na,
Si Adí Sulumon tandá tamon masanto (masantos) ya,
Inmibeg ya pa et balé kungkon makabos a pinarsa.

Si Aristutilis narayo yan duktor,
Mangkabasay naod sa libro ni Sulumon ,
Say main pakaibeg wana andí nin iyator,
Ta kasalanan sa Dyos no sa kerep mo iyator.

Kanyá naod (od) O byay ko síko paynay unduen,
Si pusó kon man´ayay syay na kumoy arwasen,
Sa karsil nin adó mo isen ya man´ay-ay,
Pasayakop pa undo sa kumo paabagay (paabaguey).

Sawá payna kumon ta itaw muko ipadis,
Sa sangkakarinaan a prupitan si Dabid,
Ibat sa kadadawat na sa alaki napilit,
Inugsudan yan aydan nangibwat sa langit.

Kanyá naod (od) O byay ko síko paynay unduen,
Kurunawan maynay ririket a man´ey-ey,
Sa karsil nin ringgas mo isen ya maningel,
Mansangit man´ay-ay a kasa gapon tegen.
(fin) nayadí

Aninay andá nin misaki-saki
No malinak yay taaw (ta-auo) tan bulon yay siri,
Kai mo mapanemtem maduksa a patiti,
Lalo no kasa kimaimutyá (kimay mutia) mon pinabli.

Ket no maraté anay awron Wibis,
A awron naitandá kaibwat kaaalis
Buklas et a lamang idulong anay áwit,
Pigaw kai mabatí ket kai mapirdi talis.

Mataman et sungsong a lamang,
Apuradóy nan mamuntan pikukubwan,
Ta kain tandaen no adti a rumuran,
No kuni kualiksyon o kuni kaririktan.

Lalo no mamayá paya yaynay amyan,
Misanugsog siraynan mako rumuran,
Mataman say raruman kargay kalingwan (kalíngoana),
Dapot makaruran kunan kaririktan.

Main idap (inap) kon linulukuyti layi,
Ta masulit siran magkumersyoy bawbayi,
Anta magawá raynamaet nin lawlaki,
Punto suspinsibo o ani sayti.

Kai muyo et mataros a sain a sulit,
Mako sa lukap mataman kasan áwit,
Sadag a sayay apay o rway rubir a sinigpit,
Ta isin yay kunswilo ra sa papitpi-pitpit.

Makapakángap a pagiiti (pagui iti) sa Bolinao,
Ta mayin bawbayi kumersyanti man´umabaw,
Siray bawbabalasang wanin et sa aku-kulaw,
Masuet sira sa Lukap a kityindadtaw.

Ó ta main akon naimatunan,
A umbó raruma dirin kababalyan,
Sa Lukap sin nísa siray nabanánan,
Mabistay ginawá ra tawan balé no pasyawan.

Tutuo ta abaw a ganansya ra,
Nin bawbayi no magkumirsyo sira,
Makaduká balé no Lukap a punta,
Ta ipada-pádam ray main ran pitaka.

Kanyá kapadan lawlaki mimata kamo,
Andí kamo magpya sa babayin magkumersyo,
Milalo kamo lí a masileng yaet a pitaka mo.
Anta mapuyayeng yayna sa édam nin tawo
(fin) nayadí

Inadó kon mutyá kasuldong nin byay ko,
A síkan peteg a inadú-adó ko,
Sarban dawat mo kaaburuyan ko,
Ta buluntaryo ko man a manustini kumo.

No rabay mon wadí a síkay maninda,
Mako tan sansya (siansia) mangkit balin saliwen ta,
Say umbo daité tandá mo no pyista,
Abaw siran sitadoy makon kabaryo wanta.

Páno kadí a panininda mon wamo,
Ta itaw ako sa gagawá ta tyimpon trabaho,
Ket kai mo tandá manglista pánon pangumpra mo,
Mapaliwá tanay puunan kai tana magurdo.

Ybibilín ko sakumo no makoka sa biaje
ipangalap moko tanan sueter kon Kaki
ta isolot koyalí no itao ako sa babalí
tanda mo nofiesta abaw siray san-ilí
(fin) nayadí

Say sudí mo tan karinggasan síno byay,
A lawas kon manpagmatyan síka tanay,
Rimulinoy (whirl) kaisipan lawas tanan,
Pusó koy nadedleman.

Bukod mo tamó O ay byay ko,
A man´ikapen rway mata ko,
Kanyá andí isiblet mo,
Say suri karinggasan mo.

Nangibwat ana sin saytaw sin síkay,
Masilap matan midmang síka tanay,
Rimulinoy kaisipan lawas tanan,
Pusó koy nadedleman.

Pánoy na kadí maraté na,
No si pusó koy maulilá
Patiti sansyay (siansyay) maraté na,
No kai kayna mákit nin mata.
(fin) nayadí

Nanulpot nin pusó reré kanakeman,
Ispadan mataros a kaalimbawaan,
Milalo kuyna wadí sa andá nin pilabyan,
Kasayna udet ta nanglapos nin byay.

Pulanan inadó no magin udas ana,
Ingaren mo tana lí a gunas tan say dubla,
Ibi kon patandá sa lapag tan say síka,
Wamo et matiroy bangkay ko sa tumba.

Lalon gusto ko no byay kuynay maglat,
Sansyay (siansyay) nan lamang lalaman koy mag´idap.
Ta no mabyay ako báyo taka masilap,
Lalon lumed-led in nanway maglat.

Mati ko man wari sa babo nan mundo,
Márep nan ngámin sarban eliminto,
Ispirito ko balé mabatí ya kumo,
Mangalilá lawas sa ani a maibublay mo.
(fin) nayadí

Sumublí sa tágay

KANSYON PARA PULITIKA

Nalibed kuyna ngámin a baryo nan Bolinao,
Nagsikasikmat a ririket kai ko tandá sabtan,
Kai ko makatubalé sa ririket ran nipadungsol,
Lalo kunran liryos burak anghilikal.

Kai nin maupapdá a nakem kon manaritá,
Sa bawbaryon natukduan a siray kialigágá,
Man´uminsoy lalaman sa nibusngaw ran saritá,
Baná sa manilala kumin sabtan pulitika.

Adayó sa nakem ko a sabtan umapá
Sa samyong saritá ran manilalwan na,
Linmambot sa kerep ko ginmurak ginmunga,
Kai ko balé tandá lí no sa litumata.

Kai ko nin kamínen tan kai ko ipatutuo,
Sa ringgas rupa ra a nakudti dinmago,
Tan a tumparan bilang pangrarayo,
Kai nin pagdwádwawan a ibi ran pangingilalo.

Balé sarban sayti andí pakángapan,
Ket say pulitika ket sayti kaugalian,
Sa ayidti man a nasyon sayti nay kasabyan,
Sayti wanran madunong a mansabtan regla (ruler) Gral

Ket sawanin nepeg kuynay maglugay,
Ta síkamoy na yapó a patanidan,
Balé andí tana lí nin lingwanan
No maraté anay awro tan pityan sininyalan
(fin) nayadí

Sumublí sa tágay

MALAMANG

Malino kan sarming a kinawa-kawánan,
Niilag-ilag takan andí ka mansawaan,
Kaban a balitok, motyá a piaduan,
Pinasak ilalo sinanlaan byay.

Ayi naytaw kadí (kare) a miunáno kasamba,
A byay moy adó ko liwa-liwa taka,
Tinaksi may langit tan niglot a byay ta,
Tan bukod patiti makapanyay kunta.

Linmambot sa kerep a nibi mon ilalo.
Nikikápusan koy adó tan labi mo,
Ta kai ininap a galtay ringgas mo,
Nin kuntran samal sa pusó makailalo (makailo).

Alaki tin dusá alakin dyá-dyá,
Nangyadi sa byay ko naraté nin karma,
Nangmula kon adó ta pigaw no sumawa,
Ginmurak ririket ginmungan dyá-dyá.

Mayin kadí kai mo nisiblet sin núna,
No ibi mon lamang payti sa raruma,
A palson adó mo inilalwan kuyna,
A ikon kon bukod sa bilang mon samba.

Ayi naytaw a lugod lami mo tan labi,
Tan barang linggwis (lingues) mo inso kon alaki,
Tan barang imis mo byay moy kai ko isili,
Ayi na langit ko, adti muyna nibi.

No main kan sakit o rere kanakman,
Múna kon malipos nin kawkaberengan,
Barang turó lwá mo mairab kon punyal,
Tan barang saw´et mo ikauyos nin byay.

Ginurutan muynan adó tan labi ko,
Kai ko lamangen a napason adó mo,
Kasa kan maingar lí no kai say saw´et ko,
Ay adyos byay wangko lí adyos inadó ko.
(fin) nayadí

Pinasyan idap mangirangep,
Sa rarem nin karsil nin ibeg,
Mantágan sain dulton ririket,
Anggan sawanin kasa et.

O, brilyanti nan pusó ko,
Kai a manan kudti sa mundo,
Parina ta iliwá muko,
Sa rarem karsil nin ringgas mo,

Ta bukod mo tamó anaod,
A mutyá ko nin pinilí,
A niyator (ani ator) sa rarem nin kerep.
Sa pangangadó ko kumon kai márep.
(fin) nayadí

Kunan sitin udas a naganap nin abig,
Taman suminag siray bawbituen sa langit,
Rumiriket ngámin a sarba nin makákit,
Say main kaberengan mapapas a isip.

Laluyna sa birtud sa maong (miong) ra nin burak,
Mainkantoy matan mangikap-ikap,
Síno ya sa mundo a kai nin maayat,
Sarba ran mawmanok ket siray manpairag-rag.

Kasay naod kipada sa anggan-anggan ko,
Sa andá tayunggaring a mangkákit mata ko,
Bukod tamó sawanin kunan sitin akto,
A nipapasayaw nan sa maong (miong) ra nin liryo.

Ta ayin dilaan kadí (kare) a kai nin mamalikas,
Mangidaton ibeg sa abig ra tan ringgas,
Say man´kakrí a dikot linmambot a kapingmatan,
A nasiraan silap tan sain ran ringgas.
(fin) nayadí

Nainkato (gullible) kan pusó sa main ran balikas,
Busis a naingar sa lalaman mi nismak,
Tunoy anghilis nabatingaw sa leas,
Nakapanimpa bereng a makaayat-ayat.

Kai masaritá a rawririket kanakman mi,
Tan kai nin maupapdá naipami muyon aligri (happy),
Sa nisabwag muyon ririket inabrasan kerep mi,
Sinayakop iliw ko sa nikamain muyudti.

Kai nin maupapdá a nakem in mamalikas,
Sa nibi muyon paga kunran mangabanglon burak,
Si pusó nin sibebereng bigrá yan narmag,
Sinayakop ririket tan kai masaritá a salamat.

Yabi yaynaytin sangkariga-rigawan,
A nangibugnuwan ran aw´astros tan anghilikal,
Naiduman peteg sinag tan palaway,
Paraisuyna layi wankon nasabtan.

Kai ko pagdwádwawan sa kumuyon sarban,
Ta abaw a makabadá a rumaté sa lalaman,
Lalo kunan sitin dedlem a sangkatinek-tinekan,
Kanyá maitepet ko ta sali main kamon kaapuraduwan.

Ket pakángapan koy sayti muyon nikamain,
Sa kunan sitin udas a nagangawan dedlem,
Andí muyuyna kadí ipáká a bilang wadí tabuyen,
Nepeg koy manipata sali main tambar a mantikapen.

Udas yaynaytin sangkariga-rigawan,
A nangibugnuwan ran aw´astros tan anghilikal,
A niduman peteg a sinag tan palaway,
Sa elimintos sa lutá tan astros sa tagay.

Kai ko nin kasabtan a ririket nin mata ko,
Sa kunran klabilis (carnations) tan siray lawliryo,
Si pusó kon sibebereng syay nainkanto,
Kunan sitin udas sa main tamon pidudungo.

Kai nin masakbaan (masabaan) a ririket nin mata,
Sa kábawan ran bawburak a itin mangabista,
Say banglon manpismak banglon aniduma,
Makapalasway isip makapamin inawa,

Ket putulen kuyna yapó a saytin pangrarayo,
Sa kontamudti ngámin a manpidudungo,
Sa mangyadí kumon main suyuen ko,
Si dadá kon inin syay namaet a rabay ko
(fin) nayadí

Anina nin andá pamamastang nin mata,
Kai imis nin bebey mo no síkay magistudya,
Báyo mo isilap sa misamyay rupa,
Liwa-liwan peteg sa tawon main dusa.

Say pispis moy burak nin granada,
Mabalunan depaan kalibangbang no yabina,
Bang ta sirayti kaririktan ray burak a mabista,
Mapatnag ta saya kan mabanglon sampaga.

Sínon pusó tan mata sa kumo makapastang,
A kai nin umibeg tan kai nin umay-ay,
Sarba ran mawmanok a manlilpad sa tagay,
Siray kinmayupa sa kumo mangitáway.

Bang ta sirayti mangrayo a mangigalang,
Sa ringgas tan lenged mo tan sain a karinggasan,
Matkap a hardiniro a mangalilá tanaman,
A mangudí-kudí ta pigaw kai kabrangan.
(fin) nayadí

O, mabanglon burak a nagibwat sa hardin,
Say birtud karinggasan mo a gagará tan say iliw,
Ibi mo pay anos tan say pasinsya sawanin,
Sayay kansyon kumon a kai mo man´ipasigir.

Kai para magawá Nini a síkamoy madawatan,
Sayay kansyon muyo sa kumi ipaingar,
Kai namaet mabyat ta sabtan anamaet eyan,
Para si bebey tamo tan dilá mon mamukal.

Abaw a salamat no síkami maaburuyan,
A dawat mi kumon kai kami kading´eyan,
Itya si Pulano tububáyon sipapadaan,
Kidawat kamoy namaet kai na kamo pading´eyan.

Múnay salamat mataman kai et nangyadí,
A mandawatin min bilang sayay rikwirdo (memory) mi,
Sa ayidti man a lugar no síkay mapanemte mi,
Si pusó ni Naning matulok ya tan masirbi.
(fin) nayadí

Síka kadina (chain) kon baror a bilang sayay traidor,
Maklep ako sa idap a man´irangepen ko lawas,
No mísa mantaynepen ko a adó lugod mo kungko,
Tampor a mipakná ko barag-barag anay lwá ko.

Parina inadó a mangkagulwanan pusó,
Ta unduen maynay tin mampangirangep nin turminto,
Ta kai parayna sumublí a adó mon masudi,
A tinegnepan samban mati sa piaduan taynan pirmi.

Kalapatin mampanaripaspas itgen mo in a kalelelpad,
Ta dungdungan maytin mampag´idap peasiengen no ani sumadag,
Tepeten mo sa kuna no sínon pusó a man´aduen na,
No maririket uno mabereng sa saytin nikagawá na.

Palaway nan awro kai kuyan mákit sa angangko,
Sa dedlem nan yabi a kamainan kuynan pirmi,
O, adó a mangkaletan kukadti ta imatunan,
Ta abirno márep anay sayti kon byay.
(fin) nayadí

Sumublí sa tágay