BABALIN PASUBRAY

Ni Pelagio de Perio

Magpasantabi ako sa kumuyudtin sarban,
Matetek a rumngé tan maanos a umingar,
Ta main akon matungtong kumuyon naimatunan,
Sayay bida sa babalin Pasubray.

Sa kunan siin a babali main nin nákit ko,
A sayay miasawa a main siran kumersyo,
Mabistay piaduan sa yabi tan awro
Linoy pangingisip a kasa nin gulo.

Main siray namaet inadó a anak,
A mangalu-galuen tumbuken ra lawas,
Animay gusto na tamporan makalap,
Tan main saray naod umbó (ambó) bilang sa maidap.

Sa kunan siin a babali main sayay nipadpad,
A alakin barko a nilayag yan padad,
Main yan pasahiro makarma ganap
Dukisa Leonora tan Dukin Mangngagab.

Siraytin miasawa bangsay nangibwatan ra,
Duki Kandido tan Dukisa Leonora,
Adayó a lugar say lutá balé napasaya,
Pamungaray Mangngagab a dirin babali ra.

Ibat anaod sa kasa et katanda-tandá ra,
Sa kunan siin a babalin nipadpadan ra,
Sitaw si main barko inayat na sira,
A itaw miikap sa dirin bali na.

Ket sin main saraynan tuloy bulan,
A mampiikap sa babalin Pasubray,
Abaw siray nay aw´amistad ran,
Keen ra nin pikadaw-kadawan.

Sa udas nin yabina mako sira magpasyar,
Mangukikit tan mamasta-pastang,
Nin bawburak tan tawtanaman,
Ran bawbalin main hardin itaw.

Sa andá pilabian ran siraytin miasawa,
Kasa gapon pisublangan saya tan saya,
Say wanan babayi sawá ta wanti tana,
A adó mo sa kungko lawas anggan-angga.

Awron mapalaway a sinminag (sinmilag) sa baytan,
Kaalimbawaan a sayti tan piaduan,
Kerep a niabri a mangkapay-payan,
Pusó a pinasayan kasa nin katimbang.

Kaalimbawa ay masitas a linugud-lugod,
Sa hardin nin adó napalawayan ni Venus,
Sa adó a sigpot kasan kipaday naod,
Ririket nin pusó inson luub-luob.

Awron magayaga a kaalimbawaan,
Sa istadon main tan kapapásar,
Banglo man´pisagrap kasan pidumawan,
Sa adó mo kungkon kasan anggawan.

Sawá kumon Didoy sayti magnayon,
Sa kerep mo imula sa pusó mo iyator,
Mauyos may inanawa anggan síkoy itabon,
Aduen taka sa kaanruwan panaon.

Kapisí nan pusó tan kapitngá (kapikngá) lalaman,
No say adó ko kumo kai kapadawnan,
Syay krus ko nepeg kon sambawan,
A lalaman koy nidáton a síkay pagsirbyan.

Luray kon inadó kai mo et para natarusan,
Limay taon tayna sawanin main et surok a bulan,
Alaki mainakem ko a main akon inibgan,
Baná sa adó ko kumo kai ko maibusngaw.

Didoy kon inadó kawaen sira payna,
A man´aturen mon biní a kai mo imula,
Mayin ket iduda kai mo isukit ana,
A palabasen moy tyimpo udas pangmumula.

Síno yain ket Didoy a mampakaaburidwan,
A niyator sa kerep mon kai mo maibusngaw,
No inadó mukon pagé a kai pagtraiduran,
Ibaritá mo pa tana síko et a makauray (makúray).

Ta maidap Didoy a main atur-aturen,
A lemlemen mon iyator sa nakem,
Kasalanan sa Dios a sabtan mangitainger,
A kai mo nin ibaritá no kawkulanen.

Luray kon inadó kai ma para naasikaso,
Sin awron Sabado nako tamo sa baryo,
Mauya mo a nakem na bilang yan tuloy kumo,
Ayupá a pamamastang maadi kunay sikrito.

No siin Didoy a mankaririktan mo,
A man´aturen ni (nin) laman sa pusó mo,
Aduen mayna udet no main kan gusto,
Dapot andí pauryan a sayti tan istado.

Mako kayna udet andí ka pakáteng,
Mintras bukod na si asawa na kai yadsen,
Uryan mukuyna yapó andí panemtemen,
Ya duká mangator ibeg sa nakem.

Ta say pusó Didoy a nasugatan,
Bilang nin duwin (diwin) naipanek sa bukraw,
Ket no maglat ya a kasa kaynan maingar,
Kapadan sain kasan pidumawan.

Kaingar nan pagé saytaw a saritá,
Nisili nan seket tampor a nibwat ya,
Kai nayna pinayadí a saytaw nan istudya,
Pulidon pulitika na pubri nan asawa.

Itaw yaynan birus-biros a diri nan asawa,
Maririket yan tuloy say wana libertad ya,
Nako ya tinum´ed mangidáton ibeg na,
Kunan amiga nan diri nan asawa.

Karaté sa baraybay sitaw a bali,
Nibi nay unor tan sa kurtis yay nibi,
Andí mo pa pakángapan a niká main kudti,
Ta ugalí nin tawon mampailibri sa patiti.

Wangkon nanaritá ta nangibwat ana,
Sin nialuyon atamo sa sayay pasiada (pasyada),
Say patiti ko byay kai maumaglat (mawmaglat) ana,
No umbó (ambó) mangibwat kumo a pakalibri na.

Sitaw ana byay puon tan nangibwatan,
Kai na makapitinek diri kon kanakman,
Ta say liksin ringgas moy kai ko nailagan,
Nasulpot yay pusó ko kaya nasugatan.

Ta say kaalimbawaan nin karinggasan mo,
Matadem a punyal a man´gágetan mo,
Nipanek sa pusó ko kai maglat gapo,
No umbo (ambo) say saritá tan pinon ringgas mo.

Ket no kai wadí sumalambit sa diri mon kanakman,
Saytin pakaibeg ko tan say kaaay-ay,
Pusó mo pay pukawen dumalí mangimansan,
Sa manpilunos (mampilunos) a pusó wamo masamsam.

Kanyá naod O byay ko andí mupa isiblet,
A pinon ringgas mo a makatambar kerep,
Ta sa udas patiti ko no síkay mangaget,
Byay koy kai mipatuloy sa kumo magsirbi et.

Ket no maakó moy saytin dawat ko,
Isuyo (isuyó) koy lalaman a maglingkod sa kumo,
Síkay pagsirbyan kai sawaan gapo,
Tan unuren ko ngamin sarban gusto mo.

Sa saytin sam´it nin nipanaritá na,
Naayat yaynaod sa andá pangakó na,
Nigawang nay gamet sa babon kerep na,
Nisuyo (nisuyó) nay pusó kai ya inumbat ana.

Say adó main no sabtan kapibtar,
Say kunswilo sa kunray abaw,
Mikayatan siran rwa báyo sira mimulmulan,
Say rupa ran rwa pulos anan ngámin lawaw.

Ket sin main anan tuloy bulan ra,
A mampiaduan siraytin mikamalala,
Aburidoy nakem nan pubri nan asawa,
Ta kaya dum´en mugot ana sa bali ra.

Ipáká koy ulit kunan linakwanan,
Itaw yan man´sangit undu-unduen ay kanakman,
Kai nayna matunoy diri nan pangangan,
Sa nikasidá istado ran napauryan.

Didoy kon inadó pakadani kapa,
Dum´en dumalí ta ingaren mo pa tana,
Masyadoy naytin gawá mo nalingo kayna,
Sa dalan a maturir nabarang kayna.

Mayin kare (kari-kadí) Didoy a wantin ginawá mo,
Kai koy pinuryan ginlat sa pusó mo,
Andí muko kumon udet pinatnagan gapo,
A dinusá mukon kapingmat adó a nisakalako.

Adti naytaw kare (kari-kadí) Didoy a sam´it saritá mo,
A síkoy pagsirbyan sa yabi tan awro,
A say wamon ipamákan a daya nan pusó mo,
A kai muko sawaan sa anggan makáno?

Adti nay krus tan adti nay samba,
Tan katuturó lwá mon sin mampaabagey ka,
Adti nay pangakó liningwanan muyna,
Kai muyna pinanemtem a paklap mon samba?

Nisamba koy naod Luray sa kumo sin saytaw,
Nipangakó koy naod a síkay pagsirbyan,
Dinawat ko balé kumo síkoy inaburuyan,
Mangadó ka wamo ket andí muko uryan.

Naning kon inadó umbo (ambo) paran wangko,
Main akon kinaririktan inibganan pusó ko,
Say wamon nanaritá dapot isikrito,
Tan andí pauryan a sayti tan istado.

Say wangkuynaet ta kai ko kaunanepan,
Ta sali agrabyadoy diri mon kanakman,
Kai ko rabay rumere (rumeré) main tan piaduan,
Sugsugen muko paet mintras wamon bukod nadtaw.

(ipatuloy et a panguluran)

Mako kayna udet wamo andí ka pakáteng,
Mintras bukod na si asawana kayadsen,
Uryan muko yapó andí panemtemen,
Ta duká a mangator ibeg sa nakem.

Say wamo paet intaw a itáway-táway mo,
No main lí nin kuná ra síkoy ikitao,
Báyo sawanin mansangitan pusó mo,
Kai muyna ipangan tan kai kayna kidungo.

Andí kayna kadí sumangit Naning a inadó ko,
Say lwá sa mata syay panyó punasen mo,
Mako ta lí udet a rwa sa kuna kiirgo,
Pigaw maglat anay bereng nan pusó mo.

Tutuoy naod Didoy ta nakió ako,
Inunor koy naod a main mon gusto,
Kai mo balé tandá a iti sa nakem ko,
No panunubok kon sain a kanakman mo.

Nibwat kayna a síkay nay nako,
Nisili nan seket báyo síkay nibanglo,
Kai ma tana liningay a dungdungan a bali mo,
Miabri ya kasi uno syay sirrado.

Sarban sayti man´ituro lwá ko,
A nibi mon idap nipamakan mo kungko,
A nin kastigwan a nangipasaran mo,
A saytin dyá-dyá a man´irangepen ko.

Ay undo kapayna Luray kadó kapayna,
Niintak ka sa bereng nianaka sa dusá,
Mampagmartir ka Luray sa kasan alaga,
Sa adó a paklap tan labin pakalala.

O langit a malino a sangkatágayan,
Sa lapag nan mundo síkay manpamastang,
Main ka para et a mangkadungdungan,
A makaundu-undo bilang kungkon pásar.

Ta bukod kuyna palayi sa babo nan mundo,
A mantanguyen koy lwá sa agos mata ko,
Mangetpel nin idap tan alakin turminto,
Kerep a naulila sa yabi tan awro.

Mayin kare (kadí) Didoy a wantin ginawá mo,
A síkoy pinuryan ginlat sa pusó mo,
Andí muko kumon udet pinatnagan gapo,
Nin linuod parawpaw tan paklap a adó mo.

Sarban sayti Didoy no napanemtem ko,
Isip koy mámet nakem koy magulo,
Mayin kare (kadí) naiyanak ako et sa babon mundo,
Dyan maraté koy wantin ligyas a karma ko.

Naning kon inadó andí kayna sumangit,
Syay panyó punasen muin a dungis,
Adti yaynay ladak mako tayna sa silid,
Ta kuto moy galaten mitagem say rikrik.

Rabay mo para Naning a ipambilin taka,
A sayay butitos mo itaw sa Australia,
Kai ma para nákit taw a nisulot ni Gestacia,
Mabistay kulor pinasyan rabrab na.

Ta dilap lí no yabina mako ta sa Binabalian,
Mamalabas atan binilwitan a tamban,
Gaw´en ta lí Naning tinapa tan kinanasan,
Balunen ta lí no mamunta tan ripay.

Umimis kayna kadí Naning síkoy kakálisan,
Tano say adó ko kuna kasayna sa kanakman,
Ta dilap lí no buklas mako ta sa simbaan,
Magnubina tan rwa sa kai kuyna pangrarabay.

Gumlat kadti Didoy kai kata nin rabay,
Andí muko apru-aprusen ta umbo akoy way,
Umbo (ambó) akon anak a daité a lamlamiisan,
Awit muynay seket mo pigaw maunor moy gusto.

Umalis kayna pakadayó sa dani ko,
Ilaman muynay seket mo kunan kaban mo,
Galaten muynadsen iyalis sa baol ko,
Ta misyay atan rwa pigaw maunor moy gusto.

Naning a inadó nang lapusan nin byay,
Etgen muyna kadí a sain mon kasagran,
Tano say adó ko kumo kai nin kapadawnan,
Síkay naod a byay ko síkay naod a bulan.

Naning a inadó no say nayadí, nayadí ana,
Gumlat ataynadti pigaw no mapdá ka,
Mako ta sa Ibali itaw pinasyay riga,
Abaw a makaririket pastangen mata.

Sa udas nin yabi mako ta sa tiatro,
Abaw a ipaliwá ran kai mo et náakit sa mundo,
Ta pigaw maglat anay irab nan pusó mo,
Kunan siin a babayin samal sa mata mo.

Taros kuynain Didoy wani Luray,
Sarban saritá mo kasan kabalikasan,
Sarban sain pulos kabulaan,
Palson pangakó samban parawpaw.

Sarban sain Didoy tandá kuin a padalan,
Kumuyon rumurubak tan siray manininan,
Maglat may ugalí kai maglat a natural,
Ta isen anan gindat inmalep´ep sa lalaman.

Mangimaton ka Luray pigaw no mapdá ka,
No kai muyna tepren a sayti kon samba,
Madaras a isip nisagrap a nakem na,
Main anaet udin báyon inadó na.

Para sinubok-subok kuya tamó a mainan kanakman,
Tano pasta-pastangen ma masyadoy nikapurmal,
Kaya gapo umimis ni (nin) sa kumo kipastang,
Wanin main a babayin lawas mampanágan.

Ta sin primiro ko Naning a nangimuwistran ririket,
A mangidarom anaod alakin pakaibeg,
Say wanan nanaritá ibaritá na kano yapó et,
Sa kunan asawa na tan sa kumoy namaet.

Ta báyo ko lí kano nin magámuran,
A ipangisuyó sa kungkoy mainan lalaman,
No umaboroy kamo kano kunan rumabay,
Sa pangangadó ko kunan maiay-ay.

Say wankon inumbat nanaritá sa kuna,
No síkoy ipadusa mo sadag tana ta síka,
Buluntaryoy lalaman teed nigagara,
Sa gamet moy kamatyan pakabyayan ko no sya.

Sa kábawen anaod napalalakon ulit,
Ulidan ran dimunyo tan say ringgas nan langit,
Rinmay´ep a pusó na sa kungko inumimis,
Lalamanay nisuyó pusó mi nay nilaktip.

Kai kaet tumper Luray nibaritá koynay sarban,
A nangiadí sa kumi nangibwat sin saytaw,
Sawanin a pagé Luray kasay na sa kanakman,
No kaiká wadí tumper síkami imatunan.

Sa saytin saritá a narngé ni Luray,
Bilang nin natimpa bereng sa kanakman,
Ket balé ta kai ma umaglat anay,
Irab nan pusó na sa saytaw a dinmalan.

Bang siti si Luray say ginawá nan padalan,
Kunan asawa na pigaw nan kaprubawan,
Say wana kuni Didoy nanaritá namusngaw,
A keen na sira tiruen a bubsat ran nalakwanan.

Ta mayin kadí báyo-báyon nanaynep ako,
A itaw ako kano sa simbaan manggalatan kuto,
Pyistan (pistan) alaki pinasyan kábawan tawo,
Tan say kanta nan padí tagalog tan iluko.

Inisip kon maong umnoy awro,
Kasa gapon malisya a inapnakem (inapanakem) ko,
A nangyadí sa saytaw a taynep ko,
Kapingapan od (naod) ana main dispatyo.

Ta si kano si Charing (Tyaring) main masakit na,
Dayá yaynan dayá sabtan ran imuragya,
Uno síkoy mako ta suratan taka lí ana,
No tutuon pagé grabi masakit na.

Síno yain Luray a nakapag´irgo kumo,
A main masakit nan busat mo,
Main paran surat a nibi na kumo,
Pigaw tandá koy mangkit nin baluto.

Si taga inirangan intaw a amigo mo,
Umbo (ambo) yay namaet mabulá a tawo,
Sya sa kungkoy nakapag´irgo,
A main anaod masakit nan busat ko.

Ta dilap no buklas main mamuntadtaw,
Baluto ni dadá Karlotan sarampikaw (Sarampikaw),
Mayi kuyna yapó ta síkayna lí a suratan,
No mabyat wadí mainan kaingaran.

Adti ket Luray a kamainan bali na,
A main baluto ta makuko kiistudia,
Ta sali apuradon mibwat sirayna,
Ta pigaw tanda ran tagánan raka.

Tandá ma para Didoy a bali ni Lungas,
Kadani nan bali ni bapá Lukas,
Sa ugsuran bali na main sayay puon pyas,
Tan sayay puon manggan dakap.

Bang sin kabuklasan anaod ana,
Siti si Didoy nako ya nakiistudya,
Kunan main baluto no main et lugar na,
A kipasahiro yaynaod a pinabli nan asawa.

Say wanan main baluto sa kona inumbat,
Mako yaynadti udet ta siray maganat ta si balot (tasibalot?),
O ko ket main sambuten na dilap,
Iyater nayay duktor itaw sa lukap.

Siti si Didoy masyadoy ririket na,
A sabtan ibatí nayan asawa na,
Pisuk-pisok yan mamaibwat kuna,
Ket kai na balé tanda pulitika nan asawa na.

Niyater nayay nay pinabli nan asawa,
Pinatu-patuyutan angga sin kai yayna,
Sin kai nayayna matamuraw sinmubli yayna,
Itaw anaet a lamang kunan inadó na.

Kaya et lamang nikadayó a diri nan asawa,
Itaw ya naet umadog kunan inadó na,
Manguyung-kuoyong a mamasukat ya,
A sayay tirno a dikartira.

Ibat anaod sa andá pilabian (pilabyan) ra,
Nin siraytin miaduan a mikamalala,
Say wani Naning umno ket a badá,
Bantyan mo udet ta mamadá kuyna.

Say wani Didoy sa kuona inumbat,
Pitoy badá sa kungko makasadag,
Say wani Naning subrawan kuyna bungat,
Pigaw kai magkamalí say subra-subrayna bungat.

Namadá yay pinabli nan inadó,
Si pinilí nan abel marka pollo (polo?),
Masedsed a abel kasan almidon gapo,
Say wani Naning pigaw main anaet mapaluob mo.

Say wani Didoy tandá muko parayna,
Nakem koy nisagrap a bilang konran raroma,
Andi muko kadí iyarig no sínoy napurba,
Tano umbo (ambó) taka tamó inadó nayadí kayna.

Say wani Naning pinasyay saro mo,
Para wangko tamó karinyo kuin kumo,
Andí kayna kadí masager manilap kungko,
Tandá mo nin peteg ket nirbyusa ko.

Siti si Didoy kaya magaraw-garaw,
Say karinyon saritá sain main a kasagran,
Syuoy (sya ey) tirno mo keen muyna ipatabasan,
Tan awit maynay upá na pigaw nan idandan.

Kinalap nayay abel tuloy nibwat,
Iyater kunan sastri abel a nadurugas,
Inabot pinasaitan, oy lalakin makalas,
Butunis tan apuro kai kayna para mangalap.

Sitaw si Didoy syay naod a sinmubli,
Say wanan nanaritá say suy´ot kasa et iti,
sin mákit na a kasan makasawiri,
Yinakap kinayat a pispis nan wiri.

Say wani Naning pinasyay kabastusan mo,
Kai ka para et mankapda sa karinyo ko kumo,
Syuoy (sya ey) apuro tan butunis mamilí kaynan,
Itudol madti panyó ta siin a pamungusan ko.

Sin makalap nayna a sarban magsirbi,
Niyater nayan tampor kunan sastri,
Say wani Didoy idandan kumon ti,
Ta say upá mo man sawanin ko ibi.

Idandan mo tana kumon anggan dilap,
Ta main keen ko kumon a maganat,
Ta si kalamó ko main ya kungkon surat,
Tan main kiayan kon baluto mibwat ya dilap.

Kinalap nayan tampor tuloy tinabasan,
A niyater na kunan sastri abel a nadurugasan,
Say wanan sastri salamat ta main akon puunan,
Syuoy (sya ey) manok kon barado kai kuya maibulang.

Say wani Didoy maong paray kuri na,
Ta síkoy makauray a mangyuyo kuna,
Ta dilap no buklas syay primiron sultada,
Dapot kumon no umbo (ambó) mabli abang na.

Say wanan inumbat sitaw si sastri,
Main sayay tahor a nakudti sa bali,
Mantawaran nayay naod labin-rwayti,
Ket si kalamó ko kai naya nibi.

Ket amigo no main ka nin gusto,
A mangibulang kunan manok ko,
Ibulang mayna bungat kasan kwenta kungko,
Dapot maiposta kuytin nibi mon upá ko.

Sa eteng anan saritá a pag´isturya ra,
Kasa gapon tegenan mampagmakina,
Napigagalet nayay naod a mantay´en na,
Ta mampagkuryen (mampagkurien) nayay naod a makina.

Napigagalet tan nipasarí naya,
A sitaw a amerikanan man´ipasambot na,
Say wanan sastri palastado yana (yayna),
Dilap no buklas ipakalap mayna.

Kai kuyna udet pakáteng patanid akuyna,
Ta main et sambuten kon raruma,
Ta dilap no buklas ipakalap kuyna,
Ta ipaalmidon ipasambot kuya.

Bang sin kabuklasan a nayadí anay misa,
Nako ya kunan sastri ta kalapen naya,
A manok sa bilang nag´irgwan ra,
Ta ibulang yaynaod no main kapada na.

Karaté sa pibulangan syay inuyuan,
Múdit yan pandaka ikoy nay maganaygay,
Rinmabay yan tampor ta si manok nay atágay,
Kasay namaet dipirinsya sa kalakyan lalaman.

Ket sin nayadí anay main ran nitaratuan,
Siti si Didoy manok naynay nipatadian,
Ta nakadipirinsya ya si manok nay midyo atágay,
Say wana sa nakem na si manok nay kai masugatan.

Bang sin nayadí sirayna tinadian,
Niluob na sira sa ruwida ta siray nay mibulang,
Say kwarta ni Didoy a nakasadwan,
Main rwam-pulo tamó tan syam.

Sin kapibul´is a largaynay bulang,
Si manok ni Didoy syay mipukay-pukay,
Si pandaka balé syay siniriban,
A manok ni Didoy ta syaynaod a harang (dyarang).

Si manok ni Didoy pinasyay kuri na,
Ta mistiso yan balulang pinasyay lupad na,
Si pandaka balé pirmin dapdap ya,
Kaya mayi sa tágay ta dinmalupani ya.

Tuloy udas a kai sira nakapisugatan,
Ta pariho siran maong ansyano sira sa labanan,
Sa eteng pibubulang ra nagkamalí yan kapingapan,
A manok a pandaka syay pinalekpekan.

Say wani Didoy a nangiburya-buryaw na,
Udas muyo wana tan dinawat nay sintinsya,
Ta kai yayna nakaibangon manok a pandaka,
Ta nagket ya sa kudos, mangusay-kusaya (-kusay ya).

Sitin sintinsyador sin siray naimatunan,
Si manok a pandaka syaynay matalaw,
Si manok ni Didoy syaynay nitágay,
Maong yan pagé ta kai nasugatan.

Ket sin nayadí yayna naglatan tadi,
Manok naynay inawit niyater kunan sastri,
Tan say upá na intaw a naiyayi,
Kai nayna pinalasadawan ta ririket nay alaki.

Tuloy nayna kinalap a amerikana na,
A nipatayí na intaw a nipasambot na,
Sa kunan inadó na itaw yanaet (yaynaet) namunta,
Ta nipakikit na kuna no palastado ya.

Nipasulot naya ni Naning a inadu-adó,
Say wanan nanaritá talagan palastado,
Magawá nan ikuntis no iti tamó kuntamo,
Tan say pangungwá nan uhalis talagan ispirto.

Syaynay nisketan kai nayna ginlat,
A amerikana intaw a nadurugas
Pinaibwat naya ni Naning lwá a barag-barag,
Panyó nay kinalap sa duyo ya inmadap.

Say wani Didoy mayin ket sumangit ka,
Ginawá mukon nati a paibwaten muyna,
Sinmubli si Didoy syay inaruko na,
A man´arka-arkan tan punasan nay lwá na.

Siti si Naning sin naaru-aruk (naare-arek) kuya,
Tangar-tangar kuni Didoy a gágetan nay babá na,
Sin napagustwan yay namaet inumdeng yayna,
Tuloy namungos balunan awit na.

Ánem ray salay tan sayay karnin dilata,
A nipatumbok pinungos sin nibwat yayna,
Say wani Naning pigaw kai kayna magmulistya,
Tan sa udas kabibitil mo mangan kayna.

Mako kuyna inadó andí ka mabereng,
Ta iti ka man layi sa pusó síkay pipanemtem,
Pagustwan ko sira tamó umbo (ambó) akon lamang máteng,
Apurado kon tuloy ta main akon lamang gaw´en.

Pinaibwat nayaynay inadó nan manok,
Sa pwirta tindawan itaw ya namatuyot,
Ta kasan magawá ta adi-adi naod,
Ta umbó mapalaway adó a sigpot.

Karaté sa baluto angklay inunat,
Inisa ray layag tampor a nibwat,
Say andá bulon ra kai sira napaidap,
Angga sin rinmaté sira sa duduongan Lukap.

Ket sin main anan masurok a tuloy linggo,
Kasa nin surat a pakatandaan gapo,
Say nakem na pinasyay pakaaburido,
Say tyinda (tinda) na kai nayna gapo maasikaso.

Siti si Naning pinasyay bereng na,
A kasa gapon pakatandaan a surat na,
Say daité tamo a gawá pinasyay ses´ew na,
Kaya magaraw-garaw sa pakaaburido na.

Isen ya sa tindawan kasan tanda gaw´en,
Lumuob-lumiwa pakiisyay tamurawnen,
Pangselan nayay anak na syay ambaken,
Nakem nay aburido rupa nay nimusanger.

Kasan kai na kano wadí inaingar-ingar,
Nikapayan panyó ulo nay pinutungan,
Máwer ya kano wadí anta iliw na kunan
Inadu-adó nan manpakaaburidwan.

Sin m’akit nayan pubri nan asawa,
A nikapayan panyó tan pinutungay ulo na,
Nangaprak yan apay ta syay pinaidá na,
Ulo nay kinakap lalaman nay inapru-apros na.

Sin nailut-ilot a sarban lalaman,
Lalon inumalalaki areng-eng nan maingar,
Nunaoy yan tampor mangayab manambar,
No ani masakit a sa inan maingar.

Sin rinmate yaytaw a albularyo,
Pinakadani yan tampor ta kinikit nay pulso,
Say wanan nanaritá pulson lukso-lukso,
No umbó (ambó) mangibwat kuna kaya (kai ya) matambar gapo.

Sitin muneng a pubri nan asawa,
Kai na gapo mataros kasan inap na tana,
Anta say wanan albularyo kasan masakit na,
No umbo (ambó) iliw na tamó kunan inadó na.

Inumbat si Naning say andá nan nanisimula,
Ta pigaw kai na kapapalawayan a main inadó na,
Para wangko tamó kumo wana kunan asawa na,
Ta kinikit ko tamó a pundo mo no tutuon maadó ka.

Say saritá nan albularyo nabarang ana,
Ta napuntay na sa pangangadó nan asawa na,
Say lumuob main sa sain a gawá madunong siray na,
Tandá ray nan tampor a pamalbu-palbutan ra.

Kai sirayna nin sukat iyakay-akay,
Ta tandá ran tiku-tikuen a maturir a dalan,
Pánon paninit tamo no main yan kasalanan,
Pwira lí tamo no syay karundawan.

Ituloy koy saritá kunran miaduan,
Baná koni Didoy sa eteng naynan linmakwan,
Kai ya gapo sinmurat kasan pakatandaan,
Say wani Naning lalakin malamang.

Sa umnoy taon kasa gapon surat,
Pinapas nayayna ni Naning sa pusó ginlat,
Ta say piaduan a pagé no sa kerep naitatak,
Mati kan kai ma mákit sa sayay udas.

Kanyá lawlaki (lullaki) bawbayi (bubbayi) isipen tamo kumon,
Ta say dilá tamo kasa ya gapo nin but´ol,
Naayat ka sa saritá linadakan a maong
Ta pigaw dumamba ka síkay makuyong.

Sawanin pa busat ta nayadí kayna,
Gawan (Gawá) anan syansyay tepel tan pasinsya,
No main kan masakit ingar-ingaren tana,
Tandaen ra tamó no inumandá kayna.

Kai rakay namaet keen apru-aprusen,
No umirab ka wadí ta síkay reumawen (riumawen),
Anta say nakakalapan mo munaoy madedlem,
Baná sa traton keen raka surutan.

Sayti nay balé, siti nay natumang,
Sa adó kon nisuyó madaras a kaisipan,
Kai ko gapo tumper sa simbawa ran naynay
Ta say babawí main iti sa kalansuyotan.

Sa koni Didoy isin kuyna et ipáká,
Ta main sayay taon nako yadti nikipyista (nikipista),
Ginagará nan linmabas sa temben bali na,
Kai naya inasikaso ni (nin) pastangen mata.

Sitaw anay nangibwatan rayna,
A nikapisyay main a piaduan ra,
Kuyungen nay ni Didoy pakalisin naya,
Kai yayna kidungo tan lakwanan naya,

Say nayti anggawan kon masalaysay,
A matungtong ko sa sayay piaduan,
Andí ana kumon kiarig sa naimatunan,
Masarita kuyti tamo kai ko ipasuet a lamang.

Etgen kuyna yapó ta sikuynay painawa,
Ta ararem yaynay yabi makakalek akuyna,
Kasa kon masesel ta síko tamó a sayan-saya,
Kasa sa kungko nangangan (nangan-gan) bukod ko tamó pa.

Sarayti et a kurido ni Pelagio de Perio:
Astros
Siete Colores
Beatriz tan Leonido

Sumublí sa tágay