DUKTRINA KRISTYANA
PANGUNGUDOS
Say tandá nan Mansanton Kudos (Santa Kros),
say panglaban mo sa kumi, Katawan min Diyos sa kukabunó (kawkabunó)
mi, Sa ngaran nan Amá, tan Anak tan Diyos Masanton Ispirito
(Ispirito Santo), Amin Hisus.
AMA MI
Ama mi isen ka sa lulangit, sambawan mi a ngaran mo
miká sa kumi a nag´adian mo, unoren mi a nakem mo,
iti sa lutá a bilang sa langit.
Byan mo kami sawanin kanen min inawru-awro tan kadwan
mo kami sa uutang (aw´utang) mi a bilang pangingangádo
mi sa kunran nakautang sa kumi tan andí mo kami ibin umaburoy
sa tukso tan ilaban mo kami sa sarban maraet, Amin Hisus.
PAMAMAGALANG (ABI) MARYA
Pamamagalang (abi) Marya, napnó kan grasya,
si Katawan a Diyos isen ya kumo, bindita ka sa sarban bubbayi, tan
bindito yaynamaet a bungan tyan mon si Hisus. Santa Marya Ina nan
Diyos ipasisingádo mo kamin makasalanan sawanin tan sa udas
a ipati mi, Amin.
PANGIGALANG
Igalang yay Diyos Ama, Diyos Anak tan Diyos Masanton
Ispirito (Ispirito Santo). Bilang sin kamumula anggan sawanin anggan
makánuman, lawas, Amin.
TUMPER
Tumper ako sa Diyos Aman makapangyayadí sa
sarba, namarsan langit tan lutá; tumper akuynamaet kuni Hisukriston
Anak nan bugtong a Katawan tamo; nirumbit Ya ibat sa paksá
nan Diyos Masanton Ispirito (Ispirito Santo); niyabing (niabing)
naya ni Santa Maryan Birhin; nipapaidap naya ni Punsyo Pilato; nipasak
ya sa Kudos (Kros); nati Ya tan nitabon (Ya); nunaoy Ya sa uimpyirno
(inpyirnos); sin ikatlon awro sinmublí Yan mabyay; nuli Ya
sa lulangit, mantekré Ya sa wanan nan Diyos Aman makapangyayadí
sa sarba; itaw Ya lí mangibwat a makudtin mangukom kunran
mabyay tan nati. Tumper ako kunan Diyos Masanton Ispirito (Ispirito
Santo). Tepren ko et a Santa Iglisya Katulika; si pitatagman ran
susanto (susantos), si pamakain kasalanan, si isusublí ran
mabyay nin sarban tawo, tan si byay a kasan anggawan. Amin.
SALBI SANTA MARYAN ADÍ
Salbi Santa Maryan Adí, Ina nin ingangádo,
síkay byay, sam´it? tan ilalo mi. Salbi, síkay
mantawagan min pinalakwan a ának (uanak) ni Iba, síkay
ey´eyan min mansinek tan man´akis iti sa lutá
nin lulwaan. Mangingitnoy mi ilingay mo pa edet kumí a mata
mon mapaingangádo, tan no mayadí anay nipamalakwan
kumi, ipákit mo pa kumi a binditon bungan tyan mon si Hisus.
O Madunong, O Maadó, O masam´it lawas Birhin Marya.
Ipasisingádo mo kami, Santan Ina nan Diyos. Pigaw kumamá
kamin kibiang sa susaad ni Hisukristo. Amin.
GAN-GAN NAN DIYOS
Siray gan-gan nan Diyos mapulo sira. Siray tulon múna,
butang sa pangigalang sa Diyos, tan nabang sa kapadan tawo.
Say múna, labyen (labien) yay Diyos múna
dyan sarba.
Say ikarwa, andí ka sumamba sa ngaran nan Diyos
no kasan kaptegan tan kapatunglan.
Say ikatlo, mangilin sa awron Linggo (Dumingo) tan
pistan pangilinan.
Say ikápat, igalang mo si Ama mo tan si Ina
mo.
Say ikalima, andí ka mangmatin kapada mon tawo.
Say ikánem, andí ka kadamagan.
Say ikapito, andí ka manakaw.
Say ikawalo, andí ka mamarsa tan andí
ka magbulá,
Say ikasyam, andí ka umibeg sa ambo mon asawa.
Say ikapulo, andí ka umibeg sa kayadian ran
kapada mon tawo.
Siraytin mapuló a gangan nan Diyos, rway kadinepan
ra; say múna labyen(labien) moy Diyos múna dyan sarba,
say ikarwa labyen (labien) muynamaet a kapada mon tawo a bilang
panglalabi mo sa kumon diri. Amin Jesus.
GAN-GAN NAN SANTA IGLISYA
Siray gan-gan nan Santa Iglisyan Iná tamo,
pitó sira:
Say múna, kimisa nin masibulot a misa sa awron
Linggo (Dumingo) tan pistan pangilinan.
Say ikarwá, magkunpisal mísa man tana
sa tinaon sa Kwarisma, tan no main atap tan patiti.
Say ikatlo, magkumulgar (take communion) sa Paskon
nisubli nan mabyay nin Katawan tamon Hisukristo.
Say ikápat, magkulasyon no main gan-gan nan
Santa Iglisya.
Say ikalima, gumayad sa Santa Iglisya nin kakapuló
tan kamumula nin bunga nin tanaman. Amin Jesus.
SAKRAMINTO NAN SANTA IGLISYA
Siray Susakraminto nan Santa Iglisya Ina tamo pito
sira:
Say múna, sa binyag, o Bawtismo.
Say ikarwa, say kumpirma, o Kumpirmasyon.
Say ikatlo, say pagkunpisal, o Kunpisyon.
Say ikápat, say pakikinabang, o Kumyunyon.
Say ikalima, say Santa Lana, o Ikstrimaunsyon.
Say ikánem, say Urdin ran Susasirduti.
Say ikapitlo, say Matrimunyo.
GAWÁ SA PAMEMPER, PANGILALO TAN PANGLALABI
GAWÁ SA PAMEMPER
Tepren ko a main sayan sayay Diyos, tuloy Katutawo
(Persunas) a say ngaran, AMA, ANAK tan MASANTON ISPIRITO (ISPIRITO
SANTO). Tepren ko a si Diyos Anak nag´in lalaman tawo ya,
nag´idap tan nati ya sa sayay Kudos (Kros), pigaw madudon
na tamo. Wanin anamaet mantepren ko a Diyos byan na siran primyo
siray nakasunor tan nakatukid nin gan-gan na, dusawen na siraynamaet
a duduká sa mumakapalimon dusa sa Impyirno (Inpyirno). Tepren
ko ngámin a sarban man´iyakay nan Santa Iglisya Katulika,
baná ta Síkan Diyos a Katutuwan tan nangiyakay, Amin.
GAWÁ SA PANGILALO
O Diyos ko! Baná sa kasan anggawan a kaabigan
tan pangagkó mo, man´ilalwan ko a pakay´en mo
lí a sarba ngámin kasalanan ko, sa tulong nin Mablin
grasya mo tan say byay a kasan anggawan baná sa sangkaalagawan
tan kukakanaan ni Hisukristo, Diyos tan Manunundon.
GAWÁ SA PANGLALABI
O Diyos ko! Manlabyen taka múna dyan sarba
nin leseb sa pusó tan kararwa (karerwa) ko, baná ta
Síka a Sangkaabigan tan makaná nin labyen. Manlabyen
ko siray kapada kon tawo nin bilang sa kungkon diri baná
sa labi ko Kumo. Man´ingáduan ko siray ginumwá
duká sa kungko tan man´ipakidawat ko siran ingangádoy
nakagawaan kon duká.
KUNPISYON HINIRAL
Síkoy makasalanan, síkoy mampagkunpisal,
kunan Katawan tamon Diyos a makapangyayadí sa sarba kuni
Santa Maryan Birhin, kuni San Migil Arkanghil, kuni San Huwan Bawtista,
kunran Susanto Uapustol, San Pidro tan San Pablo, kuni San Agustin
a Ama tamo, kunran sarban Susanto tan sa kumuynamaet Padri nagkasalanan
ako sa pinanemtem, sa saritá tan sa gawá; síkuynaod
a nagkasalanan, síkon pagé a nagkasalanan, sangkabyatay
kasalanan ko. Kanyá anaod ipasisingádo muko kuni Santa
Marya lawas Birhin, kuni San Migil Arkanghil, kuni San Huwan Bawtista,
kunran Susanto Uapustol San Pedro tan San Pablo, kuni San Agustin
Ama tamo, kunran sarban Susanto pigaw ipasisingádo rako kunan
Katawan tamon Diyos tan síkaynamaet Padri ipasisingádo
muko ibat sa kasilyan naka ni Hisukristo iti sa lutá, ukbaan
muko sa kasalanan ko tan dusawen muko, Amin.
GAWÁ SA PAGBABAWÍ
Katawan Kon Hisukristo, Diyos tan tawon pagé,
Síkay namarsa tan nanundon kungko: Síkay manlabyen
kon múna dyan sarba; Síkay sangkadunungan sa sarba,
kanyá anaod magbamawí akuynan pagé nin masibulot
a nakem ko sa sarban kasalanan ko a makamatin kararwa (karerwa)
ko. Kai kuyna lí umanen, Katawan, a magkasalanan Kumo; gaw´en
kuynay máget a ipakisaad, tan pakaday´an kuyna lí
a sarban makapanabó kungko sa kasalanan; kanyá, Katawan,
tulungan muko, ta síkay manilalwan ko; kádwan muko
pa kumon alang-alang sa uidap tan patiti Mo sa Kudos (Kros), Amin.
DASAL (URASYON)
(A Dasalen no tugtugen a kampana no yabina)
Anghil nan Katawan nipatandá na kuno Marya:
Ket naginaw ya ibat sa paksá nan Diyos Ispirito Santo.
Pamamagalang (Abi) Marya ... Santa Marya...
Iti kon aripen nan Katawan,
Magawá kungko a bilang saritá mo.
Pamamagalang (Abi) Marya ... Santa Marya...
Tan si Saritá (Verbo) tinmawa Ya,
Ket niikap yadti kuntamo.
Pamamagalang (Abi) Marya ... Santa Marya...
Ipasisingádo mo kami masantan Ina nan Diyos.
Pigaw kumaná kamin kibiang sa susaod ni Hisukristo.
PAMASISINGÁDO
Dawaten mi Kumo, Katawan, a ibúbó moy
grasya Mo sa kukaisipan mi pigaw no síkamin nakaalilbí
sa nipangipantandá nan Anghil sa nipap´in tawo ni Kriston
Anak Mo, magámuran mi a gluryan kasusublí nan mabyay,
sa nipag´idap tan Kudos (Kros) Na, a mangibwat kunan lamang
ni Kriston Katawan mi. Amin.
RIYNA NAN LANGIT (REHINA KUWILI)
Dasalen mangibwat sa sabado santo angga sa pista
nan Mansanto a Katulon Saya (Santisima Trinidad), no tumugtog a
Dasal (Urasyon) sa yabina.
Riyina sa langit, rumiriket ka ALILUYA.
Ta si Hisus tinumauk ya sa Kumo. ALILUYA.
Sinmublí yan nabyay a bilang wana, ALILUYA.
Ipasisingádo kami sa Diyos, Sinyura, ALILUYA.
Birhin Marya, rumiriket ka, ALILUYA.
Ta si Katawan tutuon sinumublí yan nabyay ALILUYA.
PAMASISINGÁDO
O Diyos, ibat sa pinaririket moy mundo baná
sa kasusublí nan mabyay ni Hisukriston Anak mo, dawaten mi
Kumo, Katawan, a ibi mo kumi a pakaraté mi sa saytin ririket
sa byay a kasan anggawan, sa pangigalang ni Birhin Marya a Ina na
ibat a lamang kuni Hisukriston Katawan tamo, Amin.
Tao Tepet tan Ubat (Ebat) a Nepeg tan Makaná
Pag´adalan Nin Tawon Kristyano
