Saraytin susaritá a naimarkan múdit, matkap et a ipapalaway a patarusan ra. No tandá muyoy patarusan ra, mako kamudtaw sa pamag´irguwan nin Mag´irgo Atamo/Gawá nin Literaryo ta ipatanda mo saray patarusan ra.

• • • • • •

Nubina udino Pamasisingádo (Dudasal sa syam nin uawro)

ni Pelagio de Perio

Dasalen no mísa mo (no) itagay nayay hustyas a wamon mitlo no itagay naya:
Mansambawan taka sangkasantusan a lalaman ni Hisukristo nipasak sa kudos (krus) sa panunundon kumin tawtawo sa kawkasalanan mi.

No man´itagay a masanton kalis wamoy naet a mitlo:
Mansambawan kata sangkaalagawan a dayá ni Hisukristo a nibúbó a kudos (krus) tan nidáton kunan Dyos a Ama sa pamamayad sa kawkasalanan mi.

Gusos 1 (Bawberso)

Kunan Sinyor San Ruki

Síkay naod a pinaalagawan
Dyos a mablin Katawan.

O San Ruki síkami ilaban
Sa sarot a mandumalan.

Si Langit nipáwit naka,
A bilang maalagan bunga,
Ta sa sibulot pakidadawat na,
Ni ina mo sin kasan anak na,
Si rusok mo napunian,
Nin kudos (krus) a sangkablian.

O San Ruki síkami ilaban
Sa sarot a mandumalan.

Say kayadian moy pinaurayan,
Lutá mo et a linakwanan,
Nakipayabor a kinagawaan,
Sa adayó a lawlugar,
Ta say mundoy ginurutan,
Pigaw langit a kagámuran.

O San Ruki síkami ilaban
Sa masakit a mandumalan.

Sumublí sa tágay

Gusos 2 (Bawberso)

Kunan Sinyor San Ruki

Síkay naod a pinaalagawan
Dyos a mablin Katawan.

O San Ruki síkami ilaban
sa masakit a mandumalan.

Si Langit nipáwit naka,
Aa bilang maalagan bunga,
Ta sa sibolot pakidadawat na,
Ni ina mo sin kasan anak na,
Si rusok mo napunian,
Nin kudos (krus) a sangkablian.

O San Ruki síkami ilaban,
Say kayadian moy paurayan,
Lutá mo et a linakwanan,
Sa adayo' a lawlugar,
Ta say mundoy ginurutan,
Pigaw langit a kagámuran.

Sumublí sa tágay

O Dyos a kasan anggawan tan kasan kipada sa kadunungan, iti kon aripen mo tan kaudádwan a pinarsa a manyumukó a si tatalimukod sa sangkablian a adapan mo. Man´galangen taka lawas Katawan a Ama ko tan Dyos ko namarsa nin sansinakban, tan síkan peteg a man´ilalwan ko a mamin grasya tan glurya. Mampakisalamat akon rinibu-ribo baná sa inawá tan kaabigan a nibi mo kungko, lalon laluyna Katawan sa nipamarsa mo kungko ta nipásar mukuynaod a man´galangen ra a sangkapubrian a lalaman ko a anggan sawanin nidatig muko sa kunran mantuekan sa Inan Santa Iglisya; ta tinagánan mukon nagbabawí sa kawkasalanan ko; ket baná sa sayti síkay ilalwan ko a mamin inawan lalaman tan karerwako: manlabien taka pagsirbian taka anggan hudas ipapatikó síkay tagánan ko nin glurya, baná sa kakanaan na ni Hisukristo a Anak mo a man´galangen tan mangilaban kungko; linabi taka O sangkadunungan, sin masibulot a tuloy a nakem nin pusó ko a gindat (kendat) nangibwat sin main anan nakem ko, ket makaná kumon a dinepen a aw´adó a ipangadó ran sarban pinarsa mo. Tutuoy naod a pinirduna mo a sarban nagsikasadi a kasalanan ko; tutuo ta sangkalamangan a nitubalé ko sa nipamayabor mon kaabigan ko; ket wanin man Katawan sangitan ko sira tan kai ko in a umanen, tan pal´isan kuyna sawanin a sarban sumubag sa gawgan-gan nin nikadyos mo. Idáton a ipanglat kasalanan ko a sarban gaw´en kon aw´idap tan say kakanaan ni Hisukristo, ket isaad kon máget a kai kuyna sublien a magkasalanan ta say tulong tan ingangádo min gawá mo syay iregan tan laban ko sa saytin pangakó, ket isaad ko et a pagkukunpisar ko tan panunukid ko sa dusan maiana. Amen.

Sumublí sa tágay

Pamasisingádo Sa Múnan Awro

O magluryan San Ruki baná sa detan pusó mo a manukid sa nailangitan a mampangakay a si Hisukristo a Katawan ko nagpakaypá kan masakit a tuloy baná ta ginurutan moy kagalangan a kasan kabalikasan tan kapatonglang pigaw sa sayti, kasan makasawire kumo a mangyakap kunan mablin kudos (kruz). Dawaten mi kumo Katawan (Sinyor) ta iyakay rakami namaet a magpakaypá sa Katawan tamon Dyos tan sa kapadan tawo galaten mi sa pusó mi a pakararabay sa rayo sa lutá intin lulwaan a pakadagdagan min makon duká, ta pigaw sa sayti kumaná kami lí a kialuyon kuomuyo kuni Hisus a mako sa langit; wanin et a dawaten mi a pakailaban mi sa sarban sawsakit laluyna sa sarot inti, ket say kalan suyut-suyutan say pangangakó mo sa dawat mi sa saytin pagnunubina. Amen.

Dasalen nin mitlo a Ama mi Abi Marya tan Glurya Patri a ipangrayo tamo kunan Santisima (Santikima) Trinidad wá lamang magámuran tamoy mandawaten tamo kunan Sinyor San Ruki, ket sa mayadí dalepdepen tamon maong a pamasibulot nin pusó tamo sa pagdiksyon (pagdioscion)-báyo Dyos a Santo.

Sumublí sa tágay

Pamasisigádo Sa Inawru-awro

O Dyos a Santo, Dyos a sangkaksawan tan Dyos a kai mati, namarsan sarba tan nangilaban kumi sa patiti, mangalangen raka sa sarban gawá mo lalon tuloy sa nipangitandudó mo sa nipagsanto nan magluryan San Ruki a ilalwan mi a mangilaban kumi, a sinuyó moy naod a mangipal´is kumi sa sarot: dawaten mi kumo Katawan, a iligwas (iliguias) rakami sa saytin makalilímon patiti, tan raruman nagsikabarang a sakit, a mamaidap sa lalaman mi, baná sa kaberengan nin pusó mi, ket lalon tuloy sa masakit nin kararwa mi; ipon muyna kumon Katawan kunan santon dipinsor mi, tan wanin anamaet a nipangakó mo kuna a maligwas (maliguias) lí sa sarot a sarban kidawat tulong na. Andí rakami dusawen Katawan sa saytin makalilímon ambak nin nadyusan (nadiosan) a niká hustisya mo; depdepen mo kadí Katawan a sager mo paiyanen (pay-anen) moy pangungo kumo tan katúriran nin katunungan mo, ta síno kadíi a makaitpel anaod no gawen moy kanepegan sa katbenan kadukaan mi: Panemtemen mo pain a Katawan a pinarsa nakami ta pigaw mabyay kami, ket magsirbi kami kumo. Panemtemen mo in anamaet Katawan ta mataman sinubag mi a sangkablian a gan-gan mo, uyasan mina sawanin a sarban kasalanan min kabunó mo, baná sa lwá min man´agus a mandaloy sa rupa mi, ipáká mo pain a Katawan sa mablin dayá ni Hisukristo a manpablien mon anak mo a nibúbó sin pinapaidap ya baná anaod kumi, tan wanin et sa kawkaberengan ni ina min birhin Marya ta sayti sya kumon a pangibwatan a pangiaburoy mo nin dawat mi, ket kagámuran mi a karigsawan nin lalaman tan grasya a pakabyayan nin kararwa mi a mako lí kibabali isen sa sangkarigawan a nag´adian mo a kasan anggawan. Amen Hisus.

Sumublí sa tágay

Pamasisingado Sa Maikarwan Awro

O magluryan San Ruki baná sa detan pusó mo a tumumbok sa sangkalangitan a mampangakay a si Hisukristo a Katawan ko, nipayabor moy sarban kayadian mo sa kunran pubri, báyo ka nako kunran mampagmasakit ta nagsirbyan mo sira sa anggan (anggawan) mababaan mo: dawaten mi kumo Katawan a iyakay rakami a manglabi sa kapadan tawo, a bilang panglalabi mi sa lalaman min diri, mangingádo kunran maidap tan siray mampagmasakit a bilang ginawá mo, ta pigaw sa sayti maglat mo lí a gumasan kadukaan; tan wanin et a dawaten mi kunan sitin nubina ta maiyaburoy kumon a kumana kami li a kibiang sa byay a kasan anggawan sa langit. Amen.

Sumublí sa tágay

Pamasisingado Sa Maikatlon Awro

O magluryan San Ruki baná sa detan pusó mo a tumumbok sa sangkalangitan a mampangyakay a si Hisukristo a Katawan ko; sinuetan tan inagawáwan mo a nitanem sa lalaman mo, ta pigaw sa sayti kumana kan kibiang sa sangkadunungan a kudiro nan Dyos tan si birhin Marya, a pangidátuonan mo nin masibulot a pagdidibusyon: dawaten mi Katawan a mablin tulong mo, ta pigaw mapaglat min madalí a tukson kabunó mi, tan iyakay rakami namaet a mangagamir sa pamamaed nin duká a inesip, ta pigaw sirararos ya lí a kararwa mi; a siti naod syay mangkaririktan ni Hisus tan si Marya. Wanin et a dawaten mi kumo Katawan a pangilaban mo kumi sa sarot, tan raroman makalilímon sakit; ket sa pangilalaban mo kumi, iyakay rakami namaet a gumawang nin masibulot a nakem nin sarban ipuyá nan Dyos a ipanglat nin kasalanan mi. Amen.

Tuloy Ama Mi, Abi Marya tan Glurya báyo Dyos a Santo.

Sumublí sa tágay

Pamasisingado Sa Maikapat A Awro

O magluryan San Ruki, baná sa detan pusó mo a tumumbok sa sangkalangitan a mampangyakay, a si Hisukristo a Katawan ko, ginurutan moy rawririket sa lutá intin lulaw´an ta rinawrabay mon nidáton a lalaman mo a nagsirbi kunran tawtawon mampagmasakit, ta pigaw umabig yay kararwa mo, kanyá mo inanusan. Dawaten mi kumo Katawan a byan rakami namaet nin sangkatayunggaringan a anos mo, tan nipangitpel mo sin mangkadawen moy lawlugar, ta pigaw siuunor kami lawas a mangakó nin ibi nan Dyos , a dusá tan idap a kaikalik-likan sa byay inti, ta sa sayti maipaliis kami lí sa sager na. Wanin et a dawaten mi a andí mo kumon iyaburoy a maglatan kamin nakem tan isip, ta pigaw magsirvi kami kuna a Dyos mi sa anggan kamakánuman nin maong a nakem, ket maidateg kami lí sa kunran man´aduen nan awanak na. Amen.

Tuloy Ama Mi, Abi Marya tan Glurya báyo Dyos a Santo.

Sumublí sa tágay

Pamasisingádo Sa Maikaliman Awro

O magluryan San Ruki baná sa detan pusó mo a tumumbok sa sangkalangitan a mampangakay a si Hisukristo a Katawan ko; pinapaidap moy lalaman mo sa pag´ayunar tan raruoma et a pagpipinitinsya, ket pinaabig tan minamakaná mo a sangkaidapan a pagkabyay a ipanustinton lalaman mo a nangibwat ana sin mansusuka; dawaten mi kumo Katawan a iyakay rakami namaet sa kanepegan a gaw´en mi a paabigen mo baná sa ikabyay mi, ket pasibuluten mi nakem (mi) a bilang anamaet kumo sa pagkukulasyon tan pamamaidap nin lalaman, tan wanin et sa maong a gawá pigaw siririgsa lawas a pusó mi kunan Katawan a Dyos, ket mapadaan kami lí a gumawang sa sangkablian a puya na, ket kagamuran mi lí a sangkabistawan a pakidadawat a pakaigluryawan kararwa mi. Ilaban rakami sa duká, lalon tuloy sa siblet nin makailo, wanin anamaet sa duksa ran manglilipot a mampiikap tan kasaw (kesaw) nin nagkápat a eliminto, iyaburoy moy namaet a raruman mandawaten mi sa saytin pagnunubina mi a karabayan nan Katawan tamon Dyos. Amen.

Tuloy Ama Mi, Abi Marya tan Glurya báyo Dyos a Santo.

Sumublí sa tágay

Pamasisingado Sa Maikánem A Awro

O maglorian San Ruki baná sa detan puso mo a tumumbok sa sangkalangitan a mampangakay a si Hisukristo a Katawan ko, pinapobre moy lalaman mo ba-yoka nakipayabor sa binawbabali; ket kai kan balot nadamba sa animan a kayadian; no kai odet solo tamo' a Katawan a Dyos a piiisip mo, dawaten mi komo ta pakaksawan moy pusó mi sa pagdidivokion, pigaw magorotan mi a kawkayadian iti sa luta ta siay nawd a makatokso, ket maglat kami sa kaagoman, tasi Dyos tana lawas komon a pagservian mi apoon tan nangibwatan nin sarba, ket siay mami tan manglat nin kayadian. Ylaban rakami sa sarban sawsakit lalon toloy sa awidap, ingaren mopa Katawan a raroman dawaten mi konran sitin novena a say makana a kalasag mi samakalilimon apuy sa infierno. Ypaga'-moran mo kadi o pamaingangadon Santo apamalomon nakem tan pusó mi a mangingado tan mamayabor konran kapadan tawo, tapigaw kaga'moran mi namaet li a ingangado tan payabor nan Dyos sa grakia, ket kumana kamili a kibiang sa Gloriana. Amen.

Tuloy Ama Mi, Abi Marya tan Glurya báyo Dyos a Santo.

Sumublí sa tágay

Pamasisingado Sa Maikapiton Awro

O maglurian San Ruki, baná sa detan pusó mo a tumumbok sa sangkalangitan a mampangakay a si Hisukristo a Katawan ko; inapes mon toloy a tenengkap a angan kai mo madumogan a dalan a mamuntan Dyos , sa sawsubang nin idap; dawaten mi komo Katawan a yakay rakami namaet a maningkap kuna sa remidion guinawa' mo, lalon toloy sa Santo Sakramento nin pagpepenitinkia sa pagkokonfesar, ket madumog mili a Santikimo sakramento sa Altar a pakaga'moran nin grakia a viay tan guesen nin karerwami, tapigaw magsen kami lawas a mangipalis nin kataniladan. Ylaban rakami namaet o mampagmatalkan mi sa nagsíkabarang a sakit a omarak komi, ket sali sa kalansoyot soyotan a ipagmasakit mi tampor a mapali-isanli a neguensenan biat lalaman andi nakami , siayan a tolongan a mangitpel asi-aanos sa irab tan idap sa masakit mi, lalon lalo no mawyos anay inanawami, tapigaw matonong kamili a kisiay iti sa luta; ket ba-yo nakamili aloyonen a omadap sa makalilimon pangokoman nan Katawan tamon Dyos ta síkali a galtan mi a toma'-gan sa kentenkia a siali a pakaperduna nin sarban kasalanan mi, ket makakiranod kamili a kasan anga sa glorian kamainan mo amen.

Tuloy Ama Mi, Abi Marya tan Glurya báyo Dyos a Santo.

Sumublí sa tágay

Pamasisingado Sa Maikawalon Awro

O maglorian San Ruki, baná sa detan pusó mo a tumumbok sa sangkalangitan a mampangakay a si Hisukristo a Katawan ko; siniayan mon kinadayan a sangkadukaan a kasalanan a makamaté, ket nirimidyo moy pakaligwas (pakaliguias) mo sa tuloy kabunó na: dawaten mi kumo Katawan a tulungan rakamin mangiawá sa kararwa mi, sa pangmati na sa tukson dimunyio, ket byan man gesenan makibakal sa kabunó a siti naod mundo, diminyo tan tinubuan, ta pigaw kai sira kumon matukso ket kai lí syay pangibwatan isager nan Dyos, ket mailaban sira lí sa idap a kasan anggawan sa impyirno. Ilaban rakami namaet O mabayanin santo sa atap nin patiti ket andí mo iyaburoy a sumya yay kararwa mi sa lalaman mi, no kai mi gawangen a múna a santo sakraminto a pakapirdunawan sarban kasalanan mi, ta pigaw mararos ya lí a mako somublí kunan Dyos a namarsa sa glurya. Amen.

Tuloy Ama Mi, Abi Marya tan Glurya báyo Dyos a Santo.

Sumublí sa tágay

Pamasisingado Sa Maikasyam A Awro

O maglurian San Ruki, baná sa detan pusó mo a tumumbok sa sangkalangitan a mampangakay a si Hisukristo a Katawan ko; sinuetan moy santon grasya a nipamunya mon kararwa mo, ta pigaw syay tandá sa pakipapasaya mo kuna, tan ipanaeg mo sa sireb ran kabunó a mampanukso, dawaten mi kumo Katawan a tulong mo, pigaw suetan min uyasan a kararwa mi nin lawlwá a mandaloy sa kasasangit baná sa kasalanan mi, ta pigaw marigsa ya lí sa byay a saya ket mapasakitan ya lí nin grasya ket sa sayti mararos yan kidinep sa mampididinepan ran sasantos sa sangkalangitan a mampiikapan nan adi sa langit; dawaten mi namaet kumo a andí mi kumon lingatan a tulong nan Katawan a Dyos ta pigaw iyaburoy na a sarban dawaten mi kunan sitin pagnunubina a yadínen min sisasalamat, ta pigaw maidalan-dalan kami sa kaabigan nin kararwa mi, tan wanin anamaet sa pangungunor mi sa inan santa iglisya, say pipapasayan nakem ran prinsipi(s) kristyanos, pagbibinyag ran bugkalot, pagbabawí ran makasalanan, pakailaban ran kawkararwa sa Purgaturyo. Dawaten mi et Katawan sa kunan Dyos a makapangyayadí sa sarba a malamúnan kumon a grasyan ipamabyay nin lalaman mi. Ilaban rakami sa sarot tan sa sarban sawsakit a ipati mi, ket say kalansuyutan, risibyen may kararwa mi tan lalaman mi, ta pigaw síkay mangiyawá sa sarban kabuno; ket kagámuran mi lí kunan sitin byay a inawá, ket lí no mati kami say pakikibiang min kipasaya kunan Katawan a Dyos a namarsa. Amen.

Tuloy Ama Mi, Abi Marya tan Glurya báyo Dyos a Santo.

Sumublí sa tágay

Gusos 3 (Bawberso)

Kunan Sinyor San Ruki

Síkay naod a pinaalagawan
Dyos a mablin Katawan.

O San Ruki síkami ilaban
Sa masakit a mandumalan.

Sa langit nipáwit naka,
A bilang maalagan bunga,
Ta sa sibulot pakidadawat na,
Ni ina mo sin kasan anak na,
Si rusok mo napunyaan,
Nin kudos (krus) a sangkablian.

O San Ruki síkami ilaban
Sa masakit a mandumalan.

Say kayadian moy pinawrayan,
Lutá mo et a linakwanan,
Nakipayabor a kinagaw´an,
Sa adayó a lawlugar,
Ta say mundoy ginurutan,
Pigaw say Langit a kagámuran,

O San Ruki síkami ilaban
Sa masakit a mandumalan.

Agwapindyinti naraté mo,
Huspital a nagtuluyan mo,
Ket nakángap yan tutuo,
A mapangalilá kunran tawo,
Say sarot nakain kapingmat,
Ta say dawat moy naaburoyan.

O San Ruki síkami ilaban
Sa masakit a mandumalan.

Pinarot muynaod sa Kesina (Cesina),
A sarot makalilímon dusá,
Siray magmasakit umandá sira,
No luuben moy bawbabali ra,
Síkay anghil a pakabyayan,
Man´igalang tan kisalamatan.

O San Ruki síkami ilaban
Sa masakit a mandumalan.

Sitin lamang a sakit,
Sa Ruma kiná mo inep-ep,
Sa Lumbardya wanin et,
Tan sa raruman sawsiudadis,
Ta kai nakaynaod sinebletan,
Nin Dyos a mablin Katawan,

O San Ruki síkami ilaban
Sa masakit a mandumalan.

Nisubray moy Plasinsya,
Ta kapresan anamaet a kulira,
Sin sain a nipagmasakit na,
Nin si pawiri mon paa,
Pinaipaliisan linumukwan,
Sa babalin mampiikapan.

O San Ruki síkami ilaban
Sa masakit a mandumalan.

Rinumsaya sa dani mo,
A balin piikapan mo,
Subor a nipanguyas mo,
A nakainaw na nan sugat mo,
Say ranom nagin tambar,
Ran main masakit a makudtaw.

O San Ruki síkami ilaban
Sa masakit a mandumalan.

Sayay aso ni Gutardo,
A mampamin tinapay mo,
Nakisalamat yaynaod kumo,
Sitin mablin kabalyiro,
Kiná naka dinaraw,
Sa tawo naka nipapalaway.

O San Ruki síkami ilaban
Sa masakit a mandumalan.

Tampor a sinumublí ka,
Sa mangkasarutan a Plasinsya
Say sakit bigrá a naparot ya,
Sin síkay rinumaté ana,
Sin saytaw raka piaarakan,
Ta say milagro moy man´itáway.

O San Ruki síkami ilaban
Sa masakit a mandumalan.

Sinumublí ka sa bálag mo,
Ket sin dalan a kamainan mo,
Busis a nabatingaw mo,
A wanan nangimáno,
Ruki kasa kai nan bueblay,
Sa babali mo in a (muinay) sublian.

O San Ruki síkami ilaban
Sa masakit a mandumalan.

Rat´anan mo in a (muinay) babali mo,
Ket kasan makaalilbí kumo,
Nipásar rakan kuntraryo,
Ta wanra duká kan tawo,
Sipangamawen mon mag´uray,
Wana syay manliputan.

O San Ruki síkami ilaban
Sa masakit a mandumalan.

Limay taon a eteng mo,
Sa kurungan a kamainan mo,
Mampakángap yay kawiliro,
Sa simpit tan anos mo,
Kasan balot nakaalilbian,
Ran kakanayon mon sarba.

O San Ruki síkami ilaban
Sa masakit a mandumalan.

Nipatnag nan Dyos a namarsa,
A awron ipapati moyna,
Si kunpisor mo say ginawá na,
Nipapalaway nan santo ka,
Siray kakanayon mo sin natandaan,
Nakisalamat a kinagawan.

O San Ruki síkami ilaban
Sa masakit a mandumalan.

Si kurungan napnó palaway,
Silag anaod a pakángapan,
Anghil anaod a nangikwadtaw,
Kunan naisurat sa ulwanan (uluanan),
Say wana kai na líi masarutan,
A tawo no kanakeman.

O San Ruki síkami ilaban
Sa masakit a mandumalan.

Lawas edet tawayan mi,
A ngaran mon pinabli-pabli,
Kanyá wami Sinyor San Ruki,
Ilaban rakami sa patiti,
Bang ta síkay nasuyuan
A lulong min sangkatágayan.

O San Ruki síkami ilaban
Sa masakit a mandumalan.

Sumublí sa tágay

Antipuna (Mangumbatan)

Makarmá a tawon sipapanemtem lawas sa kunan Katawan tamon Dyos baná sa byay nadti sa babon lutá ta matinek tanay nakem na sa awro tan yabi, ta magámuran na lí a kawkaabigan.

Mamunó: Ipapasi.
Mamunó: Ipasisingádo rakami O makarmá a San Ruki.
Umbat: Pigaw kumaná kamin kibiang koni Hisukristo.

Urimos (Dasal)

O Dyos ko nipangakó mo kunan matayungaring a San Ruki sin ibakí may sayay anghil a nangikwa kunan sayay nakaisuratan a nipapalaway mon peteg kuna a kai mati sa sarot a sarban tumawag mablin tulong na; dawaten mi kumo Katawan a pakailaban mi sa sakit a mangmatin kararwa tan lalaman mi a síkamin sipapanemtem sa kakana ana (kakanaana), tan mampakidawat nin tulong na ipáká mo pa in a Katawan kuni Hisukriston Katawan mi a mablin Anak mo. Amen.

Sumublí sa tágay

Kadadasal Nin Santo Rusaryo
Say Tandá tan Katawan Kon Hisukristo

Say mamunó: Butien mo, Katawan a lawlabi mi
Siray umbat: Pigaw marayo miká nin tawtunoy mi.
Say mamunó: Dyos mi tulungan mo kami
Siray umbat: Tan ilaban mo kami sa kawkabunó mi.
Say mamunó: Igalang a Dyos Ama, Dyos Anak tan Dyos, Ispirito Santo
Siray umbat: Lawas anan lawas. Amen.

Sa Lunis tan Wibis

Say múnan mistiryon ririket: Say nipamatandá nan Arkanghil San Gabriel kuni Santa Maryan Birhin ta syay pinili nan Dyos a ipag´ina nan anak na.

Say ikarwa mistiryon ririket: Say katitiro ni Santa Maryan Birhin kunan kapisaná a si Santa Isabil.

Say ikatlon mistiryon ririket: Say nipangabing ni Santa Maryan Birhin kunan Anak nan Dyos .

Say ikapat a mistiryon ririket: Say pamamaringas no puripikasyon ni Ina tamon Santa Marya tan papangidungo na kunan mablin Anak na sa Simbaan sa Hirusalim.

Say ikaliman mistiryon ririket: Say nipakákit na ni Marya tan si Husi kuni Hisus sa simbaan sa Hirusalim sin ikatlon awro sa nikabarang na tan nipaningkap ra kuna.

Sumublí sa tágay