Nabyan na ni Willy De Perio
Naaburuyan yay pangagamiren.

Say Wani Laking Ko
Ginwá tan sinurat na ni: Milton "Mike" Camaso Cuarteron
taga Anda, Pangasinan

Say wani laking ko sin saytaw
Mayaman yain kano si taaw
No kasaynan kuná, mako ka tamó mangidáda
Abaw a kuritá wanin et sa didilá

Balé kiten mo payna busat ko
A idya nan taaw tamo
Kasayna nin kuná, wanin et sa didilá
Mako ka mangidáda pulos tana pana-pana

Say wani laking ko sin saytaw
Abaw manuk-manok sa tágay
Libri saran lumpad sa siri kaway-kaway
Abaw a agila wanin et sa kanaway

Balé kiten mo payna busat ko
A idya nan tágay tamo
Kasaynan manlumpad, kasaynan kaway-kaway
Kasaynan agila wanin et sa kanaway

Páno rayna lí, nin mag´in nin apupo tamo
Kanyá edet busat ko, isip-isipen mo a wani laking ko
Kawánanen tamo a taaw tan manuk-manok tamo
Kawánanen tamo

Say wani laking ko sin saytaw
Makubpal a tatalon sa tangkar
Abaw a alalaki tan kayon atatágay
Abaw a aguso, lumboy tan madrikakaw

Balé  kiten mo payna busat ko
A idya nan tangkar tamo
Kasaynan alalaki tan kayon atatágay
Kasaynan aguso, lumboy tan madrikakaw

Páno rayna lí nin magin nin apupo tamo
Kanyá edet busat ko, isip-isipen mo a wani laking ko
Kawánanen tamo a taaw manuk-manok tan kawkayo
Kawánanen tamo
Kawánanen tamo
Rengen mo!

Sumblí sa Ababo

Nabyan na ni Willy De Perio
Naaburuyan yay pangagamiren.

Mangtingkapen Ko
Ginwá tan sinurat na ni: Milton "Mike" Camaso Cuarteron
taga Anda, Pangasinan

Mangtingkapen ko sawanin
A tutoon kanakman
Mantingkapen ko sawanin
A tutoon kadiryan

Say kansyon nin Bolinao
A tawir et konran laking tamo
Kai koyna nin mangkarngé
Kai koyna mangkaingar

Kasay na nin Kansyon
Say kansyon nin Bolinao
Kai koyna nin mangkarngé
Kai koyna mangkaingar

Kanyá edet bapá ko
Tandá mi nin tandá mo
Kansyonen ma pa edet
Pigaw tandá ra lí nin ari  ko

Kasay na nin Kansyon
Say kansyon nin Bolinao
Kai koyna nin mangkarngé
Kai koyna mangkaingar

Pirmi tamon kansyonen
Pirmi tamon ete-eten
Andé tamo nin lingwanen
Pirmin tamo nin paswiten

Kasay na nin Kansyon
Say kansyon nin Bolinao
Kai koyna nin mangkarnge

Kai koyna mangkaingar
Mantingkapen ko sawanin
A tutoon kanakman
Mantingkapen ko sawanin
A tutoon kadiryan.

Sumblí sa Ababo

Nabyan na ni Willy De Perio
Naaburuyan yay pangagamiren.

Bapá Uwan (Tatang Juan)
Ginwá tan sinurat na ni:
Milton "Mike" Camaso Cuarteron
taga Anda, Pangasinan

Nako ko nagpasyar sa Anda
Nasnaan kuya si Bapá Uwan
Awit-awit nay sayay bay´ong
Dumugol-dugol yay sayay bilog
Say idya na ket nabok ana
Kanyá naibarita ko kona

Bapá Uwan adti keen mo
Bapá Uwan adti keen mo
Bapá Uwan nabok kayna
Bapá Uwan kustoy na
Bapá Uwan tumgen kayna

Napalabas awro tan panaon
Nasnaan ko yay naet si Bapá Uwan
Awit-awit nay sayay bay´ong
Sawanin napnó yay nan byas tan bag´ong
Say lakad na ket matúrir ana
Kanya naibarita koyna kona

Bapá Uwan adti keen mo
Bapá Uwan adti keen mo
Bapá Uwan gwapo kayna
Bapá Uwan maturir kayna
Bapá Uwan ulidan kayna.

Sumblí sa Ababo

Nabyan na ni Neto C. Deperio
Naaburuyan yay pangagamiren.

Inadó Nan Pusó
Sinurat na ni: Kai tandá

Inadó nan pusó
A mankawánanen
Iti ka et a lamang
Síkay nay man´iliwen

Balo ana lí no
Síkay nay kai mapastang
Tumoró a luwá ko nin
Kai kapukpokan

No makáno man awro
Tan makánon bulan
Kaibwat mo inadó
Ta síkoy nay baliwan

Áwit moy ririket
Tan nibatí moy kaberengan
Ta ugalí a naod
Síkoy lalakwanan!

Sumblí sa Ababo

Nabyan na ni Wilfredo M. De Perio
Naaburuyan yay pangagamiren.

Burak A Mariga
Sinurat na si: Kai tandá

Man´ibegan ran rway mata
Síkay liwa-liwa
Sa puso a sidu-dusa
Bangno yumabina

Say udas mibusyag ka
Say banglo moy kasan kipada
Man pismak lawas ana
Sin wankoynan masanglap

A banglo mon manpismak
Nakem koy nadagdag
A mako komon mangikap
Iyaburoy mo pa komon

A get´en tan iyator
Sa pusó ko, sa pusó ko, sa pusó kon
Manpangimaton nin labi
Sa komon isipen
Ta bukod mon peteg
A liwa-liwan magnayon

Sumblí sa Ababo

Nabyan na ni Wilfredo M. De Perio
Naaburuyan yay pangagamiren.

Bituen A Maslag
Sinurat na si: Kai tandá

Mantumbuken ko yay bituen a maslag
A nangibwat sa adayó sa komi nangayat
Sayti nin katutumbok kai mi balé tandá
No gumungan ririket o gumungan dyádyá

Ket wanin man ta teed ginagara
Ani may a pirat´anan pakisasalamatan ana
Ta ugalí umapes o  pusó umanos ka
Ta magkapagal ka yapó báyo ka uminawa

O maslag a bituen andí pa nin ikuyep
A palaway mon inin ta síkami pay kikapet
Ta kasan kararaté no sa komi isiblet
Ta kadó kami na lí lawas mangirang´ep

Mapilit man wadí a dirin kanakman
A kumapet komon sa main moyon palaway
Saytin bistan apes kasa lí kaugotan
No say palaway moyo sa komi salembengan

Sumblí sa Ababo

Nabyan na ni Wilfredo M. De Perio
Naaburuyan yay pangagamiren.

Ulidan Ra Nin Ikwan
Sinurat na ni: Teofilo De Perio

Ani nay andá ran
Kulidang ra nin ikwan
Piskal si tutukro
Padri si uurang
Namaswit si siwi-siwi
Nangitara si bayang
Nanganta si urompita
Ta anro yay marukmok na

Sumblí sa Ababo

Nabyan na ni Wilfredo M. De Perio
Naaburuyan yay pangagamiren.

Kapayawan
Sinurat na ni: Kai tandá

Nagpistay kapayawan
Tinmangkar saray aramang
Nagkapitan ya si bagsang
Tursi-tursi yay bulan-bulan

Ayama ayama ayama
Isen yaynan palna-palná
Si padaw, si padaw, si padaw
Napikló yay balangbang na

Isen yay nay waro-waro
Bebey nay tudó-tudó
Linmukso si pantat
Balangbang nay beywak-ewak

Isen yaynay siwi-siwi
Kumadayó kumadani
...

Sumblí sa Ababo