Nangibwat sa Wikipedia Tarúman Nin Binubolinao
Say pikalalamuan tan uaso tan tutawo a namin kanawa-nawa sa pakabyayan ray tutawon kaadaan tan sa pakaanmuan ran uaso siti pa layi in saya pakayadian a nakatulong sa pakaligwas nan tawo.

Say Tarúman nin Páno yay Aso
a Nag´in yan Kamuko kunan Tawo
Tinungtong na sa Binubolinao si Masiken Oswí


Nangibwat sa ACMP

Say Tarúman nin Páno yay Aso a Nag´in yan Kamuko kunan Tawo.

Say tarúman tumaraná ya sa ruribo nin pananaon sin saytaw sin si Ason Tatalon nangagwang ya kuna a kanen nangibwat sa tawo. Kunan sitin nipakagketan siti yay puon nan Aso a nag´in yan kamuko nan tawo.

Si Ason Tatalon naiyarak ya sa kamínan nan tawo baná ta sa mabanglon angot a natrá kanen nin mabatí-batí sa kunran pakasirungan ra laluyna sa uubot nan talugtog. Tinmaraná a basta-bastan panaon nin napámot tan napakrang dandani sa rwampuló-ribon tutaon sinsaytaw, kunan siin nin pananaon saray tutawo tinmaraná sarayna a magtatalon nin kanen ra.

Si Ason Tatalon nabatí yan adani, tan palna-palná yan nanguman; maburik-burik yaynan maputí, mangisit tan makayumanggi sa sabot na. Nagsikabarang anay kalalakyan na, tan say tutulyan na lumaylay sin umalaki yayna tan say ikoy na tinmaraná yan kumulet. Si tawo naaraman na nin ambó tamó sa pakákitan na no kai say ugalí na. Sakalako ya sin saytaw.

Si Ason Tatalon nag´in yayna nin maamó sa pitarusan na, gumang-gang ya no lumakwan udino rumaté yay tawo; maikap ya tan marabay-rabay nan kumayap-kayap. Kanyá sayan awro si Tawo wana ambó yaynayti a peteg Ason Tatalon no kai sayan bagay nin sakalako. Wana si Tawo maabig yaytin panguman tan nangipatanda ya kunan sitin Ason Tatalon sawanin yaynay Ason Maamó. Sa anggawan si Ason Maamó nipakit na kunan Tawo nin abaw bubagay, man´ikalamó et a adó. Kanyá siti pay páno yay Aso a Nag´in yan Kamuko kunan Tawo.