Binungey

Sitin dulsi nin kanen ket mákit yayti sa Bolinao, sa Anda tan sa rarumam lugar et sa Pilipinas. Balé sa babali tamon diri ket lutuen yayti para sa pista udino ukasiyon nin pamiliya. Main et nin Ikatlon Pistan Binungey sa Anda a nakayayadí tamó sa Mayo nin 2007. Mákit mo anamaet sa Bolinao no mako ka sa palingki sa Sabado.

Ipasiya no makáno a rabay nin lutuen.

Rikado:

• Madiket nin biyas udino malagkit
• Ungot nin gataen
• Kawayan

1. Ipagataen a ungot: Ipikngá yay ungot tano kayudkoden yay laman nan ungot. Ibarbar et sa ranum tano maipespes yay gatá.
2. Uyasen yay madiket báyo ilaok sa gatá ta ibarbar yan kapikngá nin awro.
3. Iká yay naibarbar nin madiket sa kawayan. Andí ya ipapnó tuloy a kawayan ta lumbag et a madiket no bayawen lí. Ipakasakeb yay kawayan nin say bulong batag a naiberber sa kawayan. Maguwá et nin iyusar yay lalaman nin ungot a napespesan sa pakasakeban.
4. Pisien yay sayan anro tan mábeng nin kawayan mísa itaker saray kawayan a napnó nin madiket konan napisí nin kawayan. Ipatayó saray kukawayan ta ipabaya sara nin naitabiyan sa mapuoran. Andí anamaet nin puoran yay kukawayan balé ikadani yan bugá a maipámot tamó.
5. Ipabaya saray kukawayan nin ruwa udino tulo nin udas tano mapasingaw yay nabarbaran nin madiket.
6. No nalutó sarayna, iparay´epen yapó saray naibayan kukawayan. Ibiyaken saray kukawayan, mísa nin isirbi yay binungey.

Sabugan bugá nin masam´it. Maguwá et a kasoy, mapalet gatas nin masam´it udino sariwan manga.