San Francisco
Patandá nin Naiyator
 
AMIRIKA PAGLAKUAN PAKATANDAAN TIKNULUHIYA PAKAINGARAN IIKAPAN IISIPAN ARTI ISTILO PASYAR LUTÁ RURANAN
  LOS ANGELES   |   San Francisco   |   Seattle   |

Patandá nagibwat
sa San Francisco
nin naiyator

No main nin kuminto muyo kunran saraytin patandá, suratan muyay Binubolinao.com udino magpusto kamo sa Mag´irgo Atamo nin siksyon pigaw maikalamó saray kuminto muyo.

Si Apl.de.ap (aka Allen Pineda) Tan Saray Blackeyed Peas
Agusto 19, 2005

Sini: The Great Raid
Agusto 18, 2005

Say Nabatí Nin Pakipanemtem Nan Manilatown
Hulyo 22, 2005

Pantandá nin Kansyon


Grupo nin Blackeyed Peas

Bebot Tan The Apl Song, Kansyon Nin RAP Sa Pilipino

Nangibwat sa San Francisco Chronicle Agusto 19, 2005

Si Apl.de.ap (aka Allen Pineda) nanurat yan Pilipino rap, Bebot, para sa grupo nan Blackeyed Peas. Sitin rap, nikalamó na yay istorya sa byay na intaw sa Pampangga ket nako ya et sa Amerika para ya magtrabaho ta tulungen yay nanay na. Makákit yayti nin rap, Bebot sa báyon CD album ra, Monkey Business.

 

Main et núnan nin rap sinurat na nin The Apl Song a nikalamó nay Chorus sa Pilipino. Makákit yayti namaet nin rap, The Apl Song sa CD album ra, Elephunk.

Sa interview nabasa ko nin rabay na ibaritá sa Music Business, nin Pilipino ya tan rabay na namet nin ikalamó yay kultura na.

Mag-perform sara lí, si Blackeyed Peas tan si The Dave Mathews Band sa SBC Park sitin Sabado tan Linggo, Agusto 20-21, 2005.

Sumublí sa babo

• • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • •

Sini: The Great Raid
Nangibwat sa San Francisco Chronicle Agusto 18, 2005

Nakabasa ko nin artikulo sa piryudiko a main nin sini: The Great Raid, nin makabuyawen ya sa  San Francisco Metreon. Sitin sine, ipaliwá yay rescue efforts konran saray liman-yasut nin Amerikanon sundaló nin na-POW sa Bataan Death March tan say sakripisyo ra nin saray sundaló nin Pilipino tan gurilyas a nag-rescue konra. Balé anamaet nakapaikákit yay kontribusyon ran Pilipino konan gira (WWII).

Wanan artikulo, main kano nin rwan-yasut nin Pilipino betiranos ampagiikap sa San Francisco sa lugar nan Tenderlion tan South of Market. Saraytin betiranos ket antumágan sara et konan Guberminto nan Amerika nin makaipakalamó sara ra konran U.S. betiranos tan mabyan sara nin benefits nin naka-promise konra intaw.

Sumublí sa babo

• • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • • •

Say Nabatí Nin Pakipanemtem Nan Manilatown
Nangibwat sa San Francisco Chronicle Hulyo 22, 2005

Tandá moyo, main intaw nin lugar sa San Fracisco nin Manilatown. Sa taon nin 1920s-1930s, saray kalsada sa California Street tan Kearny Street angan sa Columbus Avenue ay lugar nin Manilatown. Iti saray rwampuló-ribo a immigranti nin Pilipino ay nagtrabaho sara sa gagawá, kaneri and paktori. Abaw sara nakiikap sa I-Hotel. Sarayti nin Pilipinos ket nakaguwá sara namaet ni ristoranti ra, barber shops ra tan raruman businesses ra.

Karamaram balé, sa taon nin 1960s, saray Financial District kinalap ray lugar nin Manilatown. Sitaw sa I-Hotel nin nabatí tamó a Manilatown.

Sa 1968 saray báyo nin owner's nin I-Hotel nin marabay ran gaw´en nin báyon developments tan rabay ra et nin ibiktawen a tenants ra, abaw sara a Pilipino. Balé naka-rally sara tan nakatulong konra a Asian American Community ket nilaban yayti nin ibiksyon ra sa courts nin kai nayadí a walon taon.

Sa 1977, natalo yay laban sa courts tan saray ngamin nin tenants ay naibikta. Binungó rayay I-Hotel sa 1979 balé kasa gapo nin báyon developments nakaguwá ra nin rwam-puló a taon.

Sa 1994, saray Katoliko Romano Archidiocese sinaliw ray lutá ta ipádeng ray báyo nin  eskilawan ra tan ikalamó ray I-Hotel para sa senior facilities.

Nakayadí a namádeng yayna nin  I-Hotel  tan sa Agusto 26, 2005, makaabran yayna lí. Saraytaw a núnan nangiikap intaw sa I-Hotel nin naibikto ket sísara nin naibi nin first choice nin makipiikap sa báyon I-Hotel senior facilities.

Si Bill Soro, Vice President nin Manilatown Heritage Foundation, limalako ya sa báyon I-Hotel ket immakis ya ta napanemtem na saray liman-puló nin Asian immigranti nin naibikto, abaw sara  a masiken nin nagtrabaho sa gagawá tan taga-Pilipinas sara.

Sumublí sa babo

Síkami      |      Pakánuan      |      Nangyayadian      |      Inglis      |      Raruma