Say Tulumpuló Taon nin Gawá
a Namin Biblya nin Binubolinao

Pista nan Biblya nin Bolinao, —sa Bolinao, Uktubri 30, 2012

Pinataros sa nangibwat nin sinurat na ni Yolanda Sotelo
—Wednesday, November 7th, 2012

Dagupan—Mísay abaw et nin tulumpuló tutaon, say únan pangipatarusan nin Biblya sa Binubolinao, say saritá nin inirgo sa panrupan Pangasinan itaw sa bubabali nan Bolinao tan Anda, ket nayadí yayna.

Say gawá nin pangipatarusan tinmaraná sa minsan sa mapuló taon nan pupitumpuló sin saray Amirikanon mitraasawa nin main gawá sa dupong nin Wycliffe Bible Translators a nangibwat sa San Francisco, California, ket napilí saran makudtaw sa Summer Institute of Linguistics sa Pilipinas. Sara si Gary tan Diane Persons, nangibwat sa Minnesota, pinilí rayay pakasaritánan nin Binubolinao a ipataros nin kasuratan.

Saray mitraasawa rinmaté sara sa Pilipinas sa 1977 tan sa sumunor nin taon tinmaraná saraynan mag´adal nin Binubolinao legleg saran miirgu-irgo sa kunray tutawon taga Bolinao tan mampamasay kasuratan Binubolinao, wana ni Harrison Caasi, 75, mikakalamó ya sa dupong nin mangingipataros. Mísa saraynan nakasadyá, saray mitraasawa, tinmaraná saraynan ipataros a Biblya, tinutulong ra ni Rhoda Carolino tan Emerita Caasi, tan minsan si Nery Zamora sa Bible Association nan Pilipinas.

Say Biblya nin Binubolinao nakaliwá ya sa babalin puró nan Anda (bilang nin tutawo: 34,389 sa 2007) sa Uktubri 29 tan sa Bolinao (bilang tutawo: 75,545 sa 2010) sa Uktubri 30.

Wana ni Caasi, si Gary Persons, síyay únan linggwista sa gawá, nako ya sa pakaliwaan tan namaritá ya sa kunran kábawan tutawo a mampag´irgo nin Binubolinao.

Si Diane nati ya sa banggá nin ruranan legleg saya et nin manginngitaros, si Carolino, nati yayna sin umnoy taon intaw.

“Legleg saray mitraasawa nin Persons tinaraná ray gawá nin pangipatarusan, pinag´irguwan rasara sa sakalakon kamínan nin idumog a pangipatarusan nin talagan peteg,” wana nin Caasi, pastor ya sa Jewish Carpenter Methodist Church.

Wana sara sa dupong nin pangipatarusan inagamir ray kaúnawan kasuratan nin Grigo a únan banggit tan nikipáno sara sa kunray raruman pangipatarusan. Sara sa dupong nin mangusisá, wana, ket inusi-usisá rayay pangipatarusan nin subuken no main abas sa gan-gan nan pakasaritánan tan no masadag yay kabalikasan na, “kanyá unon eteng yan mayadí a gawá,” wana.

Wana ambó tamó nin mapamain sa kunray taga Bolinao, say Biblya nin Binubolinao makatulong layi sa pakatuluyan nan pakasaritánan, ket nauryan yan nabatí nin kai magminar sa kunran Ilukano and Tagalog.

Si Fred Castelo, síyay mangingipalalako nan babali, wana ket rwampuló tamó nin pursyinto sa ngámin ran tutawoy mag´irgon Binubolinao.

Wana saray mangingirgo nin Binubolinao mákit sara sa syam nin baranggay sa babali, saray ánem itaw sara sa Puró Santiago.

Si Persons, say wana nin naisurat sa pirak anibirsaryo a prugrama nin pamanemtemen sa kunan Bolinao Historical and Cultural Society Inc. sa 1989, wana say gawá ket “nangipaingar ya sa kunan adó nan Dyos tan napanggep ya sa mantaw´en a saritá na sa kunan pangipatarusan nin kasuratan sa pakasaritánan ran tutawo sa Bolinao.”