|
Ruwam-puló a saray surat-suratan
nin abakada sa Binubolnao:
a (ä) · b (bä) · k (kä) ·
d (dä) · e (ə) · g (gä) ·
h(hä) · i (ē) · l (lä) · m
(mä) · ng (ngä) · n(nä) ·
o (ô) · p (pä) · r (rä) ·
s (sä) · t (tä) · u (ōō) ·
w (wä) · y (yä)
Say balikas ran kitutunoy udino
kunsunanti, naikalamó yay tumutumnoy udino bukalis
nin ä. Say anted a tunoy nan ä. Say balikas ran tumutumnoy
maparngé sara kunran sarayti nin susaritá: a (ä)
· mata (mä·'tä), e (ə)
· tepet (tə·'pət),
i (ē) · kili-kili (kē·'lē-kē·'lē),
o (ô) · mako (mä·'kô), u (ōō)
· urer (ōō'·rər).
Papatandaan: Kasan balikas nin (ĕ) sa Binubolinao.
Ibat yayti sa Kastilá tan inagamiren ya sa Tagalog tan
Ilukano. Saray susaritá nin nádam a main nin (ĕ)
ra, mag´in sara nin (ē)
bilang sarayti nin susaritá: princesa (prēn·'sĕ·sa)
Kastilá–prinsisa (prēn·'sē·sa)
Binubolinao, Enero (ĕ·'nĕ·rô) Kastilá–Iniro
(ē·'nē·rô)
Binubolinao.
Teglé
Saray surat-suratan nin tumutumnoy
a main gurit nin teglé sa ababo bilang sa (á·é·í·ó·ú),
say balikas ra ay mabigrá tumgem sa bias udino silaba
ra, bilang sarayti nin susaritá: ánem (ä´·'nəm),
balé (bä·'lə´), ibatí (ē·'bä·tē´),
ilutó (ē·'l·tö´), múdit
(mōō´·'dēt)
Say gurit nin
teglé inagamiren ya anamaet sa sumunor nin kitutunoy
pigaw maikalamó yay tunoy kunan sayan bias. Main anamaet
nin bugá a tumgen sa balikas balé ambó kapada
sa teglé nan tumutumnoy. Kikiten mo sarayti nin susaritá:
marat´anan (mä·'rät´·ä·nän)
ambó ya nin (mä·rä·'tä·nän)
siner´ep (sē·'nər´·əp),
kagaw´an (kä·gäw´·'än),
mag´irgo (mäg´·'ēr·gô),
man´lumalako ('män´·lōō·mä·lä·'kô),
pag´ong (päg´·'ông).
Diptungo
Saray tumutumnoy nin naikalamó
nin kitutumnoy nin "wa" tan "ya" sarayti a
diptungo sa Binubolinao: ay · nanay ('nä·näy),
aw · balaw (bä·'läw), ey · liey
('lē·əy),
iw · siwsiw (sēw·'sēw),
oy · andoy (än·'dôy), uy · uysa
(ōōy·'sä). Papatandaan:
Say diptungo nin “ao” sa saritá nin Bolinao
(Bōō·'lē·näw),
nangibwat yayti sa pakasuratan nin Kastilá. Makit yayti
tamó sa saritá nin Bolinao tan Binubolinao.
Nádam Nin Susaritá
Sa Kastilá tan Inglis, main raruman
surat-suratan nin c, ch, f, j, ñ, q, rr, x, tan z. Makákit
sarayti nin surat-suratan sa ngaran rantu tawo tan ngaran nin
kamimínan. Balé main anamet a binulinaw nin ngaran
bilang saraytin ngaran: Marya (Maria), Dyun (John),
tan Oswí (Josue). Say ngaran nin kamimínan
anamaet main nin surat ra sa Binubolinao bilang yay Amirika
(America) tan Yurupa (Europe). Say nádam
nin susaritá sa Kastilá tan Inglis main anamaet
surat ra sa Binubolinao. Saraytin raruman surat-suratan a main
sara nin kapada sa abakada nan Binubolinao. Wanti sara: c=k
udino s, ch*= ty, f=p, j=h udino dy, ñ=ny, q=k udino
kw, rr=r, x=ks tan z=s.*Say “ch” sa Tagalog tan
Ilukano ay ikipada ray “ch” kunan “ts”.
Mákit yayti sa saritá nin “atsara ·
(ä·'chä·rä)” tan “otso
· ('o·cho)”. Bale no basawen mo sarayti
sa Binubolinoa, nabalikas saran wanti, (ät·'sä·rä)
tan ('ōōt·sô). No kikiten mo saray raruman
saritá nin Binubolinao, say “ch” kapada yay
“ty,” bilang yay saritá nin "tyan".
Nakasurat yayti nin “tyan”, ambó nin “tsan”
tan say balikas na sa Binubolinao ket (tyän) udino (chän)
ya. Saray raruman susaritá sa Binubolinao main balikas
nin “ch” nakalamó sarayti: mutyá (mōō·'tyä´),
patyen (pä·'tyən) tan katyangan (kä·'tyä·ngän).
Say susaritá nin atsara, utso tan
pitsa ket inagamiren sara anamaet sa Binubolinao balé
kai yay nakabalikas nin “ts” kunan “chä”,“
t” tan“s” a tunoy ra.
|
